Horror Stories (Bisaya)

" Tingog Sa Kagabhi-on "

        Tuig 1988...Sa usa ka lugar, nga layo sa kabihasnan diin simple lang ang panginabuhi nga ato masaksihan.Diin wala pay mga kutay sa mga sugang dagitab na-istalar didtong dapita.

     Usa ka adlaw niana sa tindahan ni nang Iska didto nagkukabildo ang managhigalang Edgar ug Niki.. Mao kini ang unod sa ila gikabilduhan;

"Bai Niki anaa daw dakong bayle sa Basketball Court karong gabii.Mangadto ta bai ha?"

"Sige bai Edgar mangadto ta.Balita nako naa daw mga dayo nga mga dalaga nga gi-agni sa ato Kapitan sa pikas balangay. Manguyab ko ug alisdan na nako ako uyab uy. Sumo naman gud."matod pa ni Niki nga mingisi lang.

"Ikaw gyud bai Niki palakero kang dako. Tagam ra ka kon makapili ka pinili-an."

"Ako pa? Dili ko ganahan mag-maintain uyab bai Edgar. Basta mao nato ha? Didto na lang ta magkita sa baylehan."

      Pila ra istorya miabot na ang gikahinaman nga bayle sa uban. Ug didto sa baylehan miki-at lang ang dagway sa duruha ka managhigala sila Edgar ug Niki.Sa pagtugtog sa sweet music haguros dayon ang mga kaulitawhan aron isayaw ang mga dalaga nga naglingkod sa nagtalaytan nga mga lingkuranan. Sa dihang nakapili na si Niki sa iya ika-bayle, Haska niya lipaya kay ang gikasayaw niya usa ka maanyag nga binuhat ug matod pa sa iya kaugalingon: "Pagkagwapa ani nga babaye ah.Ang iya mga mata,w0w! Pagkagwapa gyud niya."

     Kalit lang mitingog ang babaye ug nagkanayon kini. "Mister ngano imo ko gitutokan sama niana? Naa bay buling akong nawong?"

"Ah, wala man..pasenya na kon ugaling dili ka ganahan sa ako pagtutok sa maanyag nimong dagway. Bitaw sa tinuod lang, gwapa kaayo ka.Karon pako nakakita nimo.Tabi una,ako diay si Niki taga dinhi lang. Ikaw pwedi masayran imo pangalan?"

"Si Dina ako pangalan taga pikas baryo." 

"Salamat kaayo sa ato panag-ila ha? Dako ako kalipay nga nahimamat nako ang usa ka binuhat nga hilabihan ka-gwapa sa ako nakita dinhi sa among dapit."

"Boladora lage ka Niki noh?By the way salamat sa pagdayeg."

"Dina..kanang...Huuu!Maulaw man ko mosulti nimo." Sa nag-ukon-ukon nga tingog ni Niki.

"Unsa man na Niki?Ayaw kaulaw gud.Unsa man lage na?" pangutana ni Dina ngadto kang Niki.

"Kanang, Dina..pwedi ko mouban sa imong pag-uli unya?Kon dili ka mosugot okey lang gihapon."

"Unya, dili ka ba mahadlok mokuyog nako? Layo ra ba kaayo among pinuy-anan gikan dinhi Niki?"

"Dili ko mahadlok uy! Dili man kaha ka mamaak nako Dina?" mga pasi-aw ni Niki ngadto kang Dina.

"Ok, human sa bayle uban ta sa amo-a pinuy-anan."

          Pila ray istorya, mga insaktong alas dose sa tungang gabii nahuman ang bayle. Sigon sa giingon ni Niki nga human sa bayle mouban siya ni Dina padulong sa pinuy-anan niini. Ug sa didto na sa dalan nga ila gilaktan, hilom ra kaayo ang duruha nga misubay adtong dalan nga grabe ka gamay nga igo lang maagi-an ug tawo.Unya nagsugod na pagpang-uwang sa mga iro.Mga tingog sa kagabhi-on nga maoy mabati adtong tungora sa ila paglakaw subay adtong dalan paingon sa pinuy-anan ni Dina. Ug matod pa sa kaugalingon ni Niki, "Wala man ko masukad maka-agi ani nga dalan? Lumad man gyud ko nga taga dinhi ug tanan mga pasikotsikot nga dalan dinhi dapita ako na nahibaw-an, apan kini amo gisubay karon nga dalan murag karon pako nakaagi ani?"Nagpadayon pag-uwang sa iro inubanan sa mga tingog sa mga mananap sa kagabhi-on. Milingi si Dina kang Niki ug matod pa niya kang Niki. "Niki, padayon sa paglakaw ug ayaw paglingi-lingi.Nahadlok ka ba Niki?"

"Wala uy. Natingala lang ko kay mura ko nabag-ohan sa ato gi-agi-an karon.Karon pa ko naka-agi aning dapita Dina uy."

"Mao ba Niki? So, karon naka-agi kana gyud. Ikaw ra baya ang gusto mo-uban nako diba Niki?"

"Oo gusto nako nga mouban nimo. Wala man ko nagmahay uy. Gusto pod nako maila-ila imo pamilya Dina."

          Kalit lang miingon si Dina, "Niki ania nata sa amo-ang pinuy-anan."

"Asa man diha inyo balay Dina? Wala man ko nakita nga balay dinhi dapita? Mga dagkong kahoy man ako nakita aning dapita."

"Nia nata sa lagwerta sa amo pinu-anan Niki." Kalit lang mitunga ang panimalay nila Dina diha gyud sa ila atubangan. Matod pa ni Niki sa iya hunahuna, "Wala paman ni kaganina sa pag-abot namo. Murag lain na ni dah? Agarayyy...Kalain sa ako gibate uy.Nanindog man akong mga balahibo."

     Nagkanayon napod si Dina ngadto kang Niki."Niki dayon sa amo pinu-anan, naa si mama naghulat kanato sa sulod sa amo panimalay." 

     Sa dihang pagsugod na pagtikang sa iya mga tiil si Dina sa hagdanan sa ila panimalay, nakita ni Niki nga mi-alsa ang mga tiil ni Dina ug mikawan kini gikan sa hagdanan. Sa tumang kahadlok ni Niki midagan kini ug nagpanampit kini sa pakitabang.Human sa iya pagsinggit kalit lang mingitngit ang palibot ug sa takulahaw lang nahanaw ang pinuy-anan nila Dina sa gibarogan niini.Midagan si Niki rumbo sa iya gikikanan ug walay pihong direksiyon basta lang mahilayo siya didto dapita. Sa dihang medyo halayo na siya, mihunong kini ug nagtigum ug kusog aron makasugakod paghilayo didto dapita.Miapadayon napod siya pagbaktas adtong dalan nga sa iya pagtuo agi-anan lang kadto sa mga hayop sama sa mga kabaw, mga baka. Hangtod misangko siya sa dakong kahoy ug ang mga sanga niini mihalok na sa yuta.

"Unsa man ning dapita uy.Wala nako katultol pauli paingon sa amo-a." Mipadayon paglakaw si Niki agi adtong ilawom sa dakong puno-an sa kahoy. Sa dihang nahatungod na siya sa dakong kahoy, wala niya tuyo-a nga nakahangad siya sa ibabawng bahin sa maong kahoy.Didto nasugat sa iya panan-aw usa ka dakong tawo nga naglingkod adtong dakong sanga sa kahoy.Subli napod siya midagan nga walay insaktong direksiyon uban sa pagpaninggit sa pagpakitabang nga nagla-om nga unta anaa makadungog sa iya pagsinggit.

           Wala pa tanto mibiya kaniya ang dimalas tungod kay sa tantong dagan nakita na niya ang dalan paingon sa ila pinuy-anan.Ug didto iya gisuginlan iya mga ginikanan sa iya nasinati-an sa iya pagpamayle.Ug anang pagka-ugma sa tindahan ni nang Iska nagkakita ang duruha ka manghigala. Matod pa ni Edgar ngadto kang Niki.

"Bai Niki, nganong namiya ka man kanako kagabii uy? Porbida nimo mamiya ka man tawon."

"Pasensiya bai unsaon man gud nga misabay man gud ko sa ila pinuy-anan adtong akong gikasayaw kagabii.Haskang dimalasa. Giabat ko bai."

"Unsa guy abat bai Niki? Unsa man pagkahitabo-a? Suginli daw ko bi?" "Aron nimo masabtan suginlan teka sama niini bai Edgar..."

          Human kasuginli si Edgar ni Niki mibuhakhak kini pagkatawa si Edgar. "Ha ha ha ha! Mao na na resulta sa imo kadukirok sa babaye.Tan-awa nag-ani gyud imo binuhatan he he he he!Tabi una bai, unsa man pangalan sa imo gikauban kagabii?"

"Dina man daw iya pangalan bai.Hangtod karon nanlimbawot pa ako mga balahibo uy."

        Dinhi natapos ang sugilanon ni Niki sa usa sa mga lugar nga nahisakop sa lalawigan sa Misamis Oriental..  ♣♣♣

      

Author: ♠Dodge Olmillo Maglangit♠