BALVEER RETURNS FANFIC

Balveer Returns ?

"Log kehte hai, bure insaan mar sakte hain… par burai ko khatam karna asaan nahi. Isliye hamesha ek masiha aata hai, jo is dharti ko burai se bachata hai."

Veer Lok, jo sadiyon se dharti ki raksha karta aaya tha, aaj ek anokhi shanti mein lipta pada tha. Na veer yodhon ki gungaan hoti awaaz, na kisi naye veer yodha ka udbhav. Sab shaant tha. Bas ek naam ab bhi logon ki yaadon mein ghoonj raha tha—Balveer. Ek veer jo aakhri saans tak burai se ladta raha, ek rakshak jo veergati ko prapt ho gaya… par sirf uska sharir gaya tha, uski taqat nahi.

Kehte hain, kahaniyan khatam hoti hain… par virasatein jeeti rehti hain. Kahaniyaan naye rang leti hain, naye moolyon ke saath, naye chehron ke saath.

Aaj ek naya suraj ugne wala tha. Ek naye bhagya ki neev rakhi ja chuki thi. Ek naya masiha jag utha tha. Kahani ab shuru hone wali thi ek naye naam ke saath. Happy Pandey.

Kanpur ki galiyon ka ek masti-maula. Har waqt ek naye drama ke mood mein, har cheez ko apni Happy Pandey style se dekhne wala. Masti uski pehchaan thi, drama uska junoon, aur bhaukal uska attitude! Par taqdeer ka mazak dekho, jo banda apni dunia ko ek comedy show samajh ke jeeta tha, uske jeene ki asli wajah ab duniya ko bachana thi.

Bharat Nagar ki ek shaadi ka mahaul apni shiddat par tha. Dhol ki dhamak, phoolon ki sugandh, mithaiyon ki meethi khushbu, aur rang-birange kapdon mein saj-dhaj kar ghoomte mehmaan—sab kuch ek sapne ki tarah lag raha tha. Log hans rahe the, baatein kar rahe the, khushiyon ka jashn mana rahe the. Aur isi beparwah mehfil mein, apne alag swag ke saath, Happy Pandey entry leta hai.

Uska kadam padte hi jaise hawa bhi uska swagat karne ko bechain ho gayi thi. Shaadi ke shamiyana ke neeche aate hi, ek ajeeb si cheez hoti hai. Log usse ghoorne lagte hain.

Ek pal ke liye toh Happy socha ki sab uske killer looks pe fida ho gaye hain, par jaise-jaise nazrein uske chehre par jamti gayi, waise-waise uska andar ka swag bhi halkasa hilne laga. Aaj kuch alag tha.

Happy ki maa, jo ab tak mithaiyon mein busy thi, yeh nazara dekh ke pehle toh chonki, phir thoda tense ho gayi. Uski nazrein apne bete se zyada aas paas ke logon par thi, jinme ek ajeeb si chhupi hui pehchaan thi.

"Yeh sab log hamare lalla ko aise kyun dekh rahe hain?" unhone halki si fikr bhari awaaz mein kaha.

Par Dimple bhabhi toh puri filmy thi. Usne nazar ghumayi, ek flying kiss hawa mein uchhalte hue muskurai, aur puri shiddat se bola, "Arey! Happy bhaiya hai hi itne handsome!"

Peeche khade chhote cousins toh aur bhi zyada excited ho gaye. Chhoti si umar mein bhi itni badi baat keh gaye, "Mummy! Chachu toh bilkul Kanha jaise lag rahe hain!" Kehte hi sab uske upar chipak ke lag gaye, jaise uske andar sach mein koi devta chhupa ho.

Happy ne thoda sharma ke apne cool chashma adjust kiya, lekin tabhi ek thandi aawaz hawa mein gunji.

"Ghanta Kanha jaise!" Jolly bhaiya ne dono haath jod ke bola, jaise bas ab aur bardasht nahi ho raha. "Pakka koi naya drama soch liya hoga. Maan lo, bhaukal machane ka ek aur tareeka dhoondh liya isne!"

Happy ne ek lambi saans li, jaise koi badi philosophical baat bolne wala ho. Chashma utara, aankhein thodi uchi ki, aur ek cool smirk ke saath bola, "Arey bhaiya, aap kahe tentiniya rahe hain? Hum keh de rahe hain… is shaadi ke baad bas ek hi naam goonjega – Happy Pandey!"

Tabhi shaadi ke rasmon mein busy Dipali ji aur Karuna ji beech mein aati hain. In dono ki entry aise hoti hai jaise koi serious scene me comedy ka tadka laga diya ho.

"Arre, aap log yahaan kyun khade hain? Chaliye, ghar chaliye!" Dipali ji ne haath jodte hue kaha. Karuna ji ne bhi haan mein haan milayi, "Haan, andar chalo na sab. Chalo chalo, shaadi dekhni hai ya road pe gossip karni hai?"

Log dheere dheere andar jaane lagte hain, par Happy wahi atka rehta hai. Aise ghoom raha tha jaise ek bacha nayi jagah aake apne ghar ki talaash kar raha ho.

Thoda confused sa bola, "Behna ji, baat yeh hai ki humko apna ghar hi nahi maloom. Toh thoda confujiya gaye hain!"

Dipali ji hans padi, "Arre toh hum bata dete hain na! Chaliye, aaiye!"

Karuna ji tabhi sochti hain ki kisi parichit bande se hi Happy ko ghar dikhwa diya jaye. Mobile nikalti hain, aur bina kisi waqt gawaye call lagati hain. "Vivan beta, inse mil lo. Inhe inka ghar dikha do."

Aage se ek shaant si awaaz aayi, "Ji maa, main inhe ghar… dikha deta hu."

Par jaise hi Vivan saamne aata hai, ek dum se hawa tez chalne lagti hai. Uske haath se phone gir jata hai. Uska chehra ekdum shock mein. Uski aankhein ek hi jagah chipak gayi thi—Happy ke chehre par.

Jaise usne koi bhoot dekh liya ho.

Uska gala sookh gaya. Shabdon ko ek saath jodna mushkil ho raha tha. Par jo awaaz nikli, woh bhi halki si kanp rahi thi.

"D-Debu bhaiya… aap?"

Aur bas. Ek dum se hawa thodi aur thandi ho gayi. Happy ke chehre pe confusion aur surprise dono thay. Kahi na kahi… ek naya raaz khulne wala tha.