حكاوي الست روما 🖤

حكاية "2"

" تُهزمني ملامحك التيّ لازلت أراها في كُل وجوه العابرين❤️"

" أمي ثم أمي لحد أخر يوم في عمري.."
- متحاوليش يا حور
" أمي يا ست النااس ملكة الاحساس ملكيش وجه مقارنة.."
- هتيجي يعني هتيجي
"أمي ملكة ده انا لو معايا كنوز الدنيا حبك ليا تركه.."
- أبوكي مش هيغير رأيه يا حور
" ماما يا أمي يا اماتي سلاماتي احتراماتي قبلاتي.. يا ست الكل انتي رايحه فين طاااه استني طيب لسه في اغنيه عن الأم مقولتهاش"
=عملتي ايه يالموكوسه

*بصيت ورايا لقيته ادهم اخويا اكيد جاي يشمت فيا المهزق ده*
" عملت محشي تاخد شويه؟!"
=والله علي حسب لو نوع انا بحبه اشطا لو لأ يبقي خليهولك
" امشي يا ادهم من وشي عشان انا عفاريت الدنيا بتتنطط قدامي دلوقتي"

*لقيته قرب مني وخدني في حضنه، ادهم مع اننا علطول ناقر ونقير بس حنين اوي هو الوحيد اللي بيقدر يقنعني بحاجه انا رفضاها وتقريبا ده اللي بيحاول يعمله دلوقتي*
=مضايقه ليه بس يا حوري
"يا ادهم افهمني انا مش هقدر اغير مسار حياتي لمدة شهر لمجرد ان احنا لازم نقضي وقت مع عمنا اللي سافر بقاله 7 سنين ولسه راجع"
=بالله عليكي موحشكيش
"يعني احنا اللي وحشناه يا ادهم ده سافر هو ومراته وعياله بقاله 7 سنين منزلش غير مرات يتعدوا علي الصوابع وكان بينزل لوحده يقعد يخلص مصلحته ويسافر "
=معلش يا حوري احنا لازم نستحمل ظروف بعض ومنمسكش علي الواحده واديه رجع لبلده اهو يستي ومش هيسافر تاني
"مش فاهمه برضو ليه يروح يقعد في اسكندريه وبيته في القاهره موجود لازم احنا اللي نشحطط نفسنا المسافه دي كلها ومش يوم ولا اتنين لأ شهر، شهر يا ادهم؟! "
=ما احنا كده كده في الاجازه يا حور وكنا هنروح نغير جو برضو واهي جت من فوق وهنروح اسكندريه يستي اللي نفسك تشوفيها من زمان
" بتدخلي من ثغراتي انت ياض يا ادهم بالك انت لو مش اخويا كان زماني اتجوزتك بعيونك القمر دي"
=حاسس ان انا بتعاكس سيكا
" حاسس مش متأكد"
- يلاااا يا ولاااد العشا جاهز

*قومنا انا وادهم وناديت علي بابا، خلصنا اكل وقعدنا شويه مع بعض وبعدها كل واحد دخل اوضته ونام عشان هنسافر بدري وكالعاده بفضل صاحيه طول الليل وانام قبل السفر بساعة*
-ياااااا حوووووور انتييييي ياااااا زفتاااااااه قوميييي جهزييي شنطتك اناااا لووو مربيه ارنب كان نفعني

*صحيت مفزوعه علي صوت نبع الحنان، المنبه الصباحي بتاعي، هما لو لقوني قدام معبد يهودي مش هيعملوا فيا كده، قومت اتوضيت وصليت وجهزت شنطتي وطلعت افطر، خلصنا فطار وبدأت رحلتنا الغير مرغوبه بالنسبالي، وكالعاده برضو مبعرفش انام في الطريق، وصلنا عند عمي علي الضهر وده لاننا طالعين بدري، وهنا بدأت السلامات والترحاب*
مرات عمي: يا اهلا وسهلا نورتونا والله
ماما بابتسامه: بنورك يا ام ليث
بابا: الا صحيح ليث والاولاد فين
عمي: ليث في الشغل انما عُدي مع جني بيقدموا ورق الجامعه
بابا : ماشاء الله عُدي اللي كان في اعدادي والبت جني اللي كانت في ابتدائي بقوا في جامعات دلوقتي
عمي بابتسامه: العيال كبرت يا محمد زي ما انا شايف بسم الله ماشاء الله حور بقت عروسه قمر