#خطوة_مُميته 5
اذن صلاة العشاء وبدت الشوارع فاضيه بكري بكري
بسبب الصقع❤️
النسمه البارده صعب يتحملها اي حد بدون دفئ❤️
روحت ريان من المشفى بعد ما تأكدو ان كل شي سليم وتمام
روحت وهيا متحشمه قدام فجره وادم بسبب الحادث
مع سيف والساعه11في الليل اي حد رح يفكر غلط ❌
خشت غرفتها والاوضاع كانت متوتره !
سكرت على نفسها الباب وقلبها بيطلع من الخوف تراجي امتى تخش عليها فجره يلي ربتها كأنها امها ❤️
وكيف رح تكون ردة فعلها على الحادث يلي صار !!
اما فجره كانت في الغرفه يلي جنبها لكن!!!
لكن كانت في عالم تاااااني خايفه ومرعوبه من يلي صار في هديل 💔
لانها من اول ما روحت من الشيخ وهيا ترجع في دم ومش قادره توقف على رجليها ووجها اصفررر💔
الصدمه والرهبه كانت عند مصعب !
مصعب يلي بعد ماقلب الدنيا على مرتها وسألها بتهديد وين كنتيييييي ومع منو وشتمها بي افضع الكلام
ردت عليه بي كلمتين بس !
كلمتين خلاته واقف مصدوم مش فاهم يلي سمعه جديات ولا يتوهم
الكلمتين هاذم كانو ....منو انت ؟!
وقف مصعب بصدمه مفهمش كلامها
لان حرفيا حتى نضراتها كأنها اول مره تشوفه 💔
ادور بي عيًونها في الغرفه كأنها تبي تشوف شخص واحد تعرفه لكن مش لاقيه
حتى راجلها متعرفتش عليه من يكون ؟
نهد حيله اكتر واكتر لما فهم من الدكتور ان الضربه جت ع راسها واثرت على جزء الدماغ متع الذاكره !
يعني مش رح يعرف هيا مع منو كانت
ولا يقدر يعاقبها ع شي هوا ميعرفاش وميقدرش يكتشفه
___________________________________
يعقوب:ماشي جاي قدام الحوش ...لوح دخانه ووقف على ادم لما شافه طلع ...وين بوك؟
ادم:جاوب ونضرة الكره في عيونه لي عمه واضحه ....ميشاورش فيا لما يطلع
يعقوب:تنهد بي تعصب....من الصبح نتصل بيه عاطي موعد لي الناس من الصبح يراجو فيه والف مكالمه اتصلت بيه بدون رد
ادم:قام عيونه الناعسه وحط يديه في جيوب الجاكيته متعه....ياما مدايرهم الحركات هاذي قبل مش جديد عليه
يعقوب:حشمني اليوم لا حول ولاقوة الا بالله بسسس الواحد شنو بيقول استغفر الله وخلاص
قاطع حوارهم سياره درست قدام الحوش
نزل منها راجل كبير في السن واضحه علي وجها ملامح الكبر❤️
لحيته ناصعة البياض وكثيفه بشكل كبير
ملابسه كانت بسيطه نفس سيارته يلي نزل منها
ادم:يشوفله من بعيد نازل من السياره ....هاذا قاعد يجي ؟
يعقوب:كل نهاية اسبوع لازم يطل ع ريان
ادم:السريب هاذا بنسكره خلاص معش نبي المشي والجي الزايد
يعقًوب:شافله بعلامات استغراب....هاذا حمدي يا ادم
انت عارف كويس انه كان يخدم عند بوها قبل وكان يربي فيها من صغرها
مقدرش ينساها وبين فتره وفتره يطل عليها مرات حتى يطمن في بوها عليها بتمنعه حتى هوا ولا شنو
ادم :جاوبه بي استفزاز ...هوا واي حد تاني ميعجبنيش
يعقوب:شن دخللللك؟؟؟
البنت لو رسمي خايف عليها ابعتها لي بوها في مصر و....
حمدي:السلام عليكم ياوجوه الخير
يعقوب:ابتسم....وعليكم السلام
ادم:ساكت ويشوفله من فوق لعند لوطه
حمدي:يحكي بتوتر....ست البنات قاعده ولا.....
ادم:قاطعه ...راقده
يعقوب:شبح لي ادم بحقد....الراقد ينوض ياولدي
نوضها خلي عمها حمدي يطمن عليها
ادم:قرن حواجبها .....نومة الشتي حرام يقطعوها ويلي يبي يجي زياره يجي في مواعيد مناسبه
حمدي:ارتبك وابتسم بي توتر....اي صح عندك الحق سامحني
هاذا وين كملت خدمتي خلاص خليها راقده المهم هيا بخير تو نجي وقت تاني نطمن عليها
بس بالله عليك لو مفيهاش تعب عطيها هاذم ...ومدله كيسه
ادم:شافله من فوق لعند لوطه وبعد وقت طووويل خذي الكيسه وخش بدون حتى مايخلي السلام
يعقوب:تنهد بعدم راحه....الزفت هاذا
مدوراش لان هاذا حاله معاهم كلهم تعالا في اي وقت تاني يكون هوا مش موجود
حمدي:ابتسم بطيبه❤️....صحيت ربي يخليك يارب
يعقوب:العفو
