اليوم حبيت اكتب عن موضوع كلش مهم وموجه بصورة خاصة للاميرات الي بعمر الزهور والذي هو عمر المراهقة ..
احب اوضح شغلة مهمة اني قديم هنا بالوتبات وصادفت هواي شغلات غريبة لذلك صارت عندي فكرة وتولدت لدي قناعة اتطرق لهكذا موضوع ..
جدا اتألم لمن يجي شاب وينصب مصيدة لفتيات بعمر الزهور حتى يستغلهن لشهواته بطريقة حيوانية .. هسه تكلولي شنو هذه المصيدة وليش هن ماعدهن عقل.. والجواب كالتالي :-
اولا _ مرحلة المراهقة بعض العلماء يسمونها (الميلاد الجديد ) لان انت الشاب وكذلك الشابة راح يحدث تغيير كبير بأجسامكم واكيد نمط تفكيركم راح يختلف بحيث تصير نظرتكم للامور بنظرة مختلفة ويقابل هذا النمو زيادة بالهرمونات الذكرية والانثوية مما ينعكس على التصرفات الخارجية مرات بالايجاب ومرات بالسلب ..
اوكي لهنا تمام ...؟
تأسيسا على كلامنا فوك راح نرجع لموضوعنا الاساسي وهو اكو مجموعة من الذئاب البشرية(ذباب الكتروني ) يحاولون يجرفون البنات الصغيرات المراهقات بل حتى الاولاد الصغار من اجل استغلالهم بأمور منافية للاخلاق .. من خلال اهتمام مزيف وكلام رومانسي معسول وهنا هو بدأ بنصب مصيدته، ولايخفى عليكم المشاعر الرقيقة للنساء وخصوصا المراهقات بحيث البنت بعدها صغيرة ويجي هذا الشاب يغريها في بعض الكلمات فأحتمال كبير راح يسرق قلبها ويشغل عقلها..( طبعا هذا الكلام مو للكل لأن اكو بنات قويات ومباشرة يهفنه ببلوك)
هذول الي سميتهم فوك الذباب الالكتروني همهم الاساسي شلون يشبعون غريزتهم مع البنت المراهقة وبعدها يرميها مثل اي سلعة قديمه (مااحب اوصف بغير شيء).. بينما هي المسكينة تبقى تعيش وياه بأحلام وردية وتفكر ان هذا الشخص يحبها وراح يعيشها بحياة سعيدة و رومانسية ويجي يوم يتزوجها زهذه العواطف الجياشة تأثر حتى على سلامة تفكيرها بحيث هي تعرف ان بالحقيقة هي بعدها طالبه واهلها مايمكن يزوجوها او يوافقون.. الخ هاي اذا صدك تقدم رغم ان الطرف الثاني يخدعها فقط بس هي تحاول تبني امال على كذبة كبيرة هي مرات تعرفها بس تحاول تغالط نفسها وتصدكها..
الى ان توصل اللحظة وتتفاجأ اما يجيها حظر او يظل يهددها بصورها او ابسط شي يغلق حسابه..
طبعا هاي حالات استغلال المراهقات والشباب الصغار منتشرة بشكل كبير عالوتباد لذا نصيحتي لكل بنت لاتخلين احد يلعب بعقلج واذا احد راسلج وحاول يتقرب منج وحسيتي عنده نوايا شريره مباشرة بلوك
او اذا هو صادق دليه بيتكم خل يجي يخطب
لاتصيرين سلعة رخيصة .. ترى السمعة اهم شيء لذلك لاتنزلين راس اهلج وتخسرين دينج .
