Lop_Eared Guard (နားရွက်ကျလေးနဲ့ သက်တော်စောင့်)

အခန်း(၄)

ယန်ယိက ခန့်ညားလွန်းတဲ့သူ့ရဲ့ အိမ်တော်ထိန်းဝတ်စုံပေါ်မှာ အဖြူရောင်အေပရွန်ကိုထပ်ဝတ်ကာ ခြေဖဝါးနုနုတွင်လည်း အညိုရောင်ရင့်ရင့် ဖိနပ်အပါးစီးပြီး မီးဖိုချောင်စားပွဲအရှေ့တွင် ရပ်နေသည်။ သူက အံဆွဲထဲက တစ်ဝက်သာကျန်တော့တဲ့ ဟင်းအနှစ်ဘူးတွေကိုထုတ်ပြီး ထိုထဲမှသုံးဘူးကို အမဲသားဟင်းအိုးထဲသို့ ဟင်းခတ်အနှစ်အဖြင့် လောင်းထည်လိုက်သည်။ ထို့အပြင် အုန်းနို့ဘူးကိုပါထုတ်ပြီး ချိုစိမ့်သောအရသာအတွက် ထပ်မံပေါင်းထပ်လိုက်သည်။

ဟင်းအနှစ်နှင့် အရသာအတွက်လည်း ပြင်ဆင်ထည့်ပြီးတဲ့အခါ တဗွက်ဗွက်ဆူလာမည့် အမဲသားဟင်းအိုးကို စောင့်ဖို့ရန်သာဖြစ်သည်။ ဟင်းချက်နေရင်းနဲ့ အနည်းငယ်အလုပ်ရှုပ်နေဟန်ရှိသော ယန်ယိက ဟင်းအိုးဆူဖို့စောင့်နေတဲ့ အချိန်ခနလေးမှာတော့ နှစ်လိုဖွယ်ကောင်းအောင်ပြုံးလာသည်။ ထို့နောက်ချက်ချင်းပဲ သူ့ရင်ဘတ်ရှိအိတ်ထောင်ထဲမှ မုန်လာဥနီရင်ထိုးကို ထုတ်ကာ ကြည်နူးစိတ်များဖြင့် သက်ပြင်းဖွဖွချပြန်သည်။ မုန်လာဥနီပုံက ချစ်စရာကောင်းလွန်းပြီး စိန်ရောင်က နဂိုကတည်းမှ တောက်ပနေပေမယ့် ယန်ယိကတော့ ပိုပြီးတောက်ပလာဖို့ အဖြူရောင်လက်ကိုင်ပုဝါဖြင့် တသသ ပွတ်သပ်နေပေသည်။ သူ့မျက်ဝန်းထဲ၌ ပိုပြီးလင်းလက်လာတဲ့ ရင်ထိုးကိုကြည့်ပြီး ရင်ဘတ်တွင် ဂရုတစိုက်တပ်ထားလိုက်သည်။

အပူရှိန်လည်းတိုးလာပြီး ဟင်းအိုးကပွက်ပွက်ဆူလာသည့်အလျောက် မွှေးပျံ့သည့်အငွေ့များလည်း အိုးအဖုံးမှတဆင့် လှိုင်လှိုင်တက်လာသည်။ ယန်ယိက သူ့ရင်ဘတ်ပေါ်က ရင်ထိုးကိုဖြုတ်ကာ ချက်ချင်းပဲ အိတ်ကပ်ထဲပြန်ထည့်ထားလိုက်သည်။ ဟင်းငွေ့တွေနဲ့ လှပတဲ့ သူ့မုန်လာဥနီလေး အရောင်မှိန်သွားမှာကို စိုးရိမ်မိတာကြောင့်ပင်။

မီးဖိုချောင်၏မှန်တံခါးကိုဖြတ်ကျောက်ပြီး အထဲတွင် ဟင်းချက်နေသည့် ယန်ယိကို လုရှန်းကျင်မြင်နေရသည်။ ခေါင်းကိုအနည်းငယ် ငုံ့ပြီး မျက်လုံးတွေကို အောက်ဘက်သို့ ရွေ့လျားကြည့်တဲ့အခါ လစ်လပ်နေသည့် ဖြူဖွေးနေသော လည်တိုင်၏ ယုံမှားဖွယ်ရာမရှိအောင် သန့်စင်ပြီး ချောမွေ့လှပါသော အကျိတ်ကလင်းကို တွေ့ရပေမည်။ ခြေထောက်တစ်ဖက်ကို အနည်းငယ်မြှောက်တင်လိုက်တဲ့အခါ ပေါ်လာသည့်ခြေဖဝါးနုနုတွေက နောက်တစ်ဖက်၏ ခြေသလုံးနှင့်လည်း ပွတ်သပ်နေသည်။