ميراث نور الجزء الثامن " سر ناير "

مفاجأة

اليوم 24 – 7

يوم مميز فى حياتى , يوم  أكيد هتهتم بيه عيلتى , بس بالنسبه ليا يوم عادى .

خلصت شغلى ورجعت البيت , الجو هادى جدا ومفيش صوت خارج من البيت خالص .

الدنيا هسس مع اننا لسه المغرب .

طلعت المفاتيح  من جيبى ومديت أيدى وفتحت البوابة الخارجية للبيت .

عديت على شقة نصير و مارو اللى فى الدور الأرضى , خبطت على الباب  وناديت محدش فتحلى ..

طلعت على السلم اللى بيطلع لشقتى , وأنا محضر نفسى للمفأجأة .

حطيت مفتاحى فى الكالون .. سمعت التكة الأولى  ..التانية و زقيت الباب .

الشقه ظلمة جدا .

مديت أيدى علشان أفتح الكوبس لكن مالحقتش  !

فجأة الشقة كلها نورت  ..

فشوفت بلالين متعلقة فى السقف ..

حنوش ومارو ونصير لابسين طراطير فوق رأسهم !

سندس ونورا فى بوقهم زمارة  وفى أيدهم شمع منور !!

وكلهم بيقولوا فى صوت واحد :

هابى بيرث داى تو يو ... يلا حالا بالا بالا حيوا أبو الفصاد

نورا قالت :

كل سنة وأنت طيب يابابا النهارده عيد ميلادك ..

حنوش شاور على تورته ضخمه وهو بيقول :

كل سنة وأنت طيب يانينو .. جايبلك تورته مخصوص من باريس  ومش من أى حتة  من مطبخ  بيير هيرمى !

نصير خدنى بالحضن وسندس بصتلى بحب ...

حقيقى انا سعيد بعيلتى ,بالرغم من كل الصعوبات اللى مرينا بيها ألا أننا زى ما أحنا متماسكين ومترابطين وبنخاف على بعض ...

أغرب عيلة ممكن أى  حد يسمع عنها  ولو حكينا  لأى حد على اللى مرينا  بيه فى حياتنا هيقولوا علينا  كدابين ، مخابيل أو مجانين !

وده طبيعى جدا ..

مين اللى هيصدق أنى ورثت جنى من أجدادى ( نصير ) ومين هيصدق أن الجنى ده حاليا بنى أدم ومش عارف يرجع جنى تانى  بسبب رحلة مش فاكرين منها حاجة .

مين اللى هيصدق أن أقرب صديق لعيلتى عفريت من الجن  ( حنوش ).

مين اللى هيصدق أن أبنى مارو نصف جن نص أنسان , نصه البشرى منى ونصه الجنى من جنية خدعتنى وأتجوزتنى على أنها بشرية .

ومين اللى هيصدق أن بنتى   أتولدت عاجزه  عن المشى  وحاليا بتجرى بسرعة الضوء  بفضل حذاء سحرى أهداه  العفريت حنوش ليها .

مين هيصدق أنى لابس قميص سحرى بقدر أختفى بيه عن الانظار وأقدر أتشكل بيه لآى بنى أدم أو حيوان زى جنى الغيلان .