အေးစက်မှု....
အသက်ရှူသံတစ်ခုကို မင်းတို့ကြားကြလား???
ဖျော့တော့တဲ့ ရင်ခုန်နှုန်းနဲ့ အတူ စည်းချက်ကျနေတဲ့ အေးစက်တဲ့ အပေါ်ယံ အသက်ရှူသံ ခပ်ပါးပါး....
ဆောင်းဦးညရဲ့လေအေးတွေက ဒီစူးရှရှမျက်ဝန်းတွေရဲ့ အေးစက်မှုကို ပြန်လည်အရှုံးပေးရတဲ့အထိ....
San Francisco မြို့စွန်နားက ဆင်ခြေဖုံးရပ်ကွက်တစ်ခုရဲ့ ညနေခင်းအချိန်...
လမ်းပေါ်မှာပိုင်ရှင်မဲ့ကြောင်တွေက ဟိုဟိုဒီဒီ သွားလာရင်း အစာရှာထွက်နေကြတယ်.
လမ်းထဲအဝင်အထွက်လုပ်တဲ့ကားဘီးသံတွေနဲ့ အိမ်မွေးခွေးတချို့ရဲ့ တအီအီ အသံတချို့က လွဲရင် အရာရာက တိတ်ဆိတ်နေတယ်.
" Sophie, The Witch Tarot"
Open : 24/7
ဆိုင်ခန်းငယ်လေးရဲ့ မှန်နံရံမှာရေးထားတဲ့ ဆိုင်ဖွင့်ချိန်နဲ့ ဆန့်ကျင်စွာ အဝင်တံခါးဝမှာတော့ "Close" ဆိုတဲ့ ဆိုင်းဘုတ်လေးကိုချိတ်ဆွဲထားတယ်.
ဆိုင်လေးထဲက တစ်ခုတည်းသော ခပ်မှောင်မှောင်အခန်းငယ်ထဲ ဖယောင်းတိုင်မီးတချို့ထွန်းထားတဲ့စားပွဲမှာ လူ၂ယောက် မျက်နှာချင်းဆိုင်ထိုင်နေကြတယ်.
တစ်ယောက်က သူ့မျက်စိရှေ့က စားပွဲပေါ်မှာဖြန့်ချထားတဲ့ Tarot card တစ်ချို့ကို သေချာအာရုံစိုက်ကြည့်နေ တယ်... ရောင်စုံကျောက်လေးတွေကိုလက်စွပ်လှလှလေးတွေအဖြစ်ဝတ်ဆင်ထားတဲ့ သူမရဲ့လက်ချောင်းဖြူဖြူတွေကလည်း tarot card 3ခုထဲက တစ်ခုပေါ်ကို အရောင်မဆိုးထားတဲ့လက်သည်းလေးနဲ့ ခပ်ဖွဖွခေါက်နေတယ်.
ကဒ်ကနေ အကြည့်မခွါနိုင်တဲ့သူ့ပုံစံက တစ်ခုခုကို လေးလေးနက်နက် အာရုံစူးစိုက်ထားဟန်ရှိတယ်.
ချည်သားဂါဝန်ရှည်အသားရောင်လေးဝတ်ထားပြီး ရွှေအိုရောင်ဆံပင်ကျောလယ်လောက်ကိုမှ ကျစ်ဆံမြှီးလေး ကပိုကရိုကျစ်ထားတဲ့ သူမပုံက အသက် ၂၀ကျော် လှချင်တိုင်းလှနေတယ်.
သူနဲ့မျက်နှာချင်းဆိုင်မှာတော့ ဆယ်ကျော်သက်အရွယ်လူငယ်က ထိုင်ခုံနောက်မှီကိုမီရင်း ခပ်လျော့လျော့ထိုင်နေတယ်. ပျော့အိနေတဲ့အနက်ရောင် ပိုးသားရှပ်အင်္ကျီလက်ရှည် ကို တံတောင်ဆစ်အထိခေါက်တင်ထားပြီး ရင်ဘတ်ကြယ်သီး ၂လုံးလောက်ဖြုတ်ထားကာ အပြဲရာတွေပါတဲ့ ဂျင်းဘောင်းဘီ အနက်အရှည်ကိုစတိုင်ကျကျဝတ်ထားတဲ့ သူ့ပုံစံက ဂျစ်ကန်ကန်နဲ့ ...
ပုံသွင်းမထားတဲ့ ပုခုံးထိလုအောင်ရှည်နေပြီဖြစ်တဲ့ အညိုဖျော့ရောင်လှိုင်းတွန့်ဆံသားတွေက မျက်နှာပေါ်ဝဲကျနေတယ်. မျက်ခုံးခပ်ထူထူအောက်က ကော့ညွတ်နေတဲ့မျက်တောင်ရှည်တွေ ဝန်းရံထားတဲ့အပြာရောင်မျက်ဝန်းတွေနဲ့ ထင်းနေတဲ့ jaw line တွေကြောင့် ဂရိနတ်ဘုရားရုပ်ထုက အသက်ဝင်နေတာလားလို့ထင်ရတယ်. နုနယ်နေတဲ့ မျက်နှာလေးနဲ့ဆန့်ကျင်စွာ ပြာလဲ့နေတဲ့မျက်ဝန်းတွေကတော့ မျက်မှောင်ကျုံ့ထားတာကြောင့် စိတ်ရှုပ်နေပုံမှန်းသိသာတယ်.
ခပ်မှိန်မှိန်မီးရောင်အောက်မှာတောင် အနက်ရောင် အဝတ်အစားတွေအောက်က တစွန်းတစ မြင်ရတဲ့ခြေတံလက်တံရှည်ရှည်တွေနဲ့ သူ့အသားအရည်က ဖြူစွတ်နေတယ်.
