وجعتني معقول محستش؟
إزاي محستش؟ وكلهم لاحظوا وعرفوا أن أنا بحبك
أنت أزاي مش ملاحظ طب نظاراتي مقالتلكش اهتمامي مفضحنيش أنت أهملتني أوي على فكرة أنا مش عارفة أعمل أي علشان تحس وتعرف اني بحبك؟
خايفة أقولك وألاقي منك رد يكسرني وانا عمري ما هستحمل انك تبعد عني، أنا مكنتش كدا انا قوية وأقدر أستحمل أي حاجة وأواجهها بس باجي عندك وأضيع بحس اني تايهه الكلام كله بيروح ومش بيفضل غير كلمة «صباح الخير أو عامل أي»
فقت من تفكيري والصراع اللي جوايا بين قلبي اللي نفسة يقول كل حاجة هو حاسس بيها وعقلي اللي رافض يتكلم على صوته وهو بيناديني
:-قمر.. ياقمر!! روحتي فين
قمر:-ها أنا هنا اهو
:-بنادي عليكي مش سامعاني
قمر:-معلش مأختش بالي، في حاجه!
:-كنت بقولك أنتي حاطة الشراب الأسود فين دورت علية ومش لاقيه والكراڤتة السودة بردوا مش لاقيها
قمر:-إزاي انا حطاهم بأيدي في الدرج
:- تعالي شوفيهم طيب علشان دورت وملقتش
قمر:-حاضر أنا جاية
قومت وروحت وقفت قدام الدرج وفتحته وأول ما فتحته لقيتهم قدامي:-أهم يامحمد
محمد:- معلش مأخدتش بالي.. تعبتك معايا
قمر:-لا ولايهمك تعبك راحة
قمت وكنت لسة همشي لقيته وقفني ومسك إيديا وباسهم وبصلي وقال:- شكرًا
اتوترت وقولتله:-شكرًا على أي
محمد:-شكرًا أنك متحملاني ومتحملة طبعي الهادي أنا عارف أني مبتكلمش كتير بس انا كده غصب عني على طول لوحدي فمتعودتش احكي وأتكلم مع حد
وبعد ماخلص كلامه باس راسي وبعدين وقف ربط الكراڤته بتاعته ونزل راح الشغل وانا كل دا واقفة مصدومه ومذهولة اول مرة يتكلم معايا بوِد كدا كلامة مفيهوش برود احنا أه متجوزين بقالنا سنة بس كان جواز صالونات هو ابن عمي وبابا قالي هتتجوزيه هو أولى بيكي من الغريب وهيحافظ عليكي محاولش ياخد رأيي وانا أستخرت ولقيته جايلي في الحلم انا كنت بغرق وهو لحقني وطلعني من البحر وبعدين مشينا لحد ماروحنا بيت وقالي دا بيتنا صحيت من الحلم وكنت حاسة براحة عرفت أن دا نصيبي ورضيت بيه واتجوزنا بس هو طول عمرة هادي لوحدة ومبيتكلمش كتير كلامنا دايما قليل بس أول مرة يتكلم معايا كدا فقت من سرحاني وروحت أظبط الشقة عدى حوالي ست سعات قومت أحضر الغدا بس منغير قصدي ايدي اتحرقت طهرت الحرق وحطيت علية مرهم ولفيته بلزق هو فاضله نص ساعة وهيكون جه خلصت الغدا وبعد شوية لقيت الباب بيتفتح عرفت أنه جه روحت قدام الباب وأخدت منه الشنط والحاجة اللي طلبتها منه وقولتلوا حمدللة على السلامة
ابتسملي وقال :- الله يسلمك
ودخل ياخد دوش هو على طول كلامة قليل عايزاه يتكلم معايا عايزة أعرف عنه كل حاجه.. بعد شوية خرج من أوضته كنت أنا حطيت الأكل على السفرة ومستنياه اول ما شوفته قولتله
قمر:-أنا عارفة أنك بتحب ورق العنب علشان كدا عملتة دوق وقولي رأيك
رد عليا وقالي وهو بيبتسم
محمد:-كل حاجه من أيدك جميلة ياحببتي
فضلت بصاله حوالي دقيقة ومش بتكلم ومصدومة وبعدين رمشت وقولتله
قمر:- محمد أنت كويس
محمد:-أه ياقمر مالك
قمر:-لا أبدًا ماليش.. طب أنت اترقيت النهاردة في الشغل ولاحاجة
محمد:- لاء لي
قمر:- تصرفاتك غريبة
أبتسم وقالي
محمد:- ولا غريبة ولا حاجة.. يلا ناكل علشان الأكل هيبرد وانا بحبه وهو سخن
هزيت دماغي ليه وقعدت بس مأكلتش أنا كنت بتأمله وهو بياكل طريقة أكله هادية زي شخصيتة بالظبط كل حاجة بيعملها فهدوء هو مش بيحب الدوشة
محمد:-قمر ياقمر
قمر:-أيوا
محمد:-مبتاكليش ليه.. أي دا مال أيدك
قمر:-لا أبدًا دا حرق بصيت وانا بعمل الأكل
بصيلي وقالي بنبرة حنينة غريبة عليا
محمد:- مش تخلي بالك وبعدين دي بسيطة مش شايفة أيدك عامله إزاي حطيتي عليها حاجة للحرق ولا انزل اجبلك
قمر:-لالا حطيت متقلقش مقولتليش رأيك في الأكل
محمد:- حلو اووي ياحببتي تسلم أيدك
رديت جوايا حببتي تاني أنا مش متعودة على القمر دا رديت عليه وقولتله
قمر:- الله يسلمك ألف هنا
قام غسل إيده ومسك اللاب توب بتاعة علشان يشتغل عليه وأنا قومت لميت الأكل وغسلت الأطباق وبعدين قعدت مفيش حاجه أعملها مسكت كتابي اللي بقرأه عن علم النفس وكملته أنا بحب علم النفس أووي والكتاب دا بيوصف الأمراض ومراحل تطورها وإزاي نتعامل معاها الكتاب دا فقلبي بجد
بعد حوالي ساعة ونص لقيت محمد بينادي عليا رديت عليه وقولتله
قمر:-أي يامحمد في حاجه
محمد:-امم هو انتي بتعملي أي
قمر:-مبعملش قاعدة بقرأ شوية
محمد:- طب أي رأيك نخرج
#يتبع
بقلمي/ملك حمدي
