فتيات الخلطبيطة

آرو

تقترب الكاميرا من باب منزل مكون من خمس طوابق، يطرق بخفه وما لبث حتى فُتح الباب وطلت ثلاث فتيات، سارة، ميكي، وملك يناظرون الطارق بنظرات متفحصه.

وعندما ادركوا من هو ابتسموا باتساع قائلين بنبرة مسرحية. "اهلًا بكم في منزل الغرباء يا سادة."
وتعاود سارة الحديث. " النهاردة بنقدملكم أولى التعريفات عن أعضاء منزلنا اللطيف الهادي.. منزل الغرباء."

وتتجه الكاميرا ناحية ميكي التي كانت تضحك وهي تنظر لسارة لترمقها بحده فـتكمل عنها ميكي. "هتتعرفوا معانا على كل الخلطبيطات وتشوفوا معاهم اهتماماتهم ،وحياتهم."

انتقلت العدسه ناحية ملك الواقفه على السلم لتبتسم وتبدأ بالصعود وخلفها الكاميرا "وأول واحدة هتتعرفوا عليها هي.. آرو." لتتوقف عند باب غرفة تطرق بخفة، وتختفي من أمام الكاميرا سريعًا.

ويُفتح الباب لنواجه ابتسامة آرو المشرقة وهي تقول. "merhaba arkadaşlar odama hoşgeldiniz ben roaa" وتضحك بخفه.

_ "لا واللّٰه؟ وتحبي نجبلك اسلام الجيزاوي يترجم؟"

نظرت آرو لمَن خلف الكاميرا بغيظ وتعاود الحديث بلا اهتمام. "هاي يا جماعه! انا آرو و اهلًا بيكم في غرفتي."

أغلقوا باب الغرفه لتنتهي الضجة القادمة من الخارج ويعم الهدوء و تجلس آرو على الصوفا أسفل شُباكها الكبير المطل على حديقه المنزل.

_"عرفينا عن نفسك."

ابتسمت آرو بتوتر لتتلعثم بتوتر طفيف. "عادي.. مش عارفه انا رؤى في أولى جامعه و بس!"

ألتفت الكاميرا في ارجاء الغرفه تُظهر اللوحات المعلقه و تُركز العدسه على صورة صغيره في برواز لـإحدى فرق الكره المصرية و تذهب آرو وتحمله. "الأهلي، العشق."

_" بتحبي الكوره من زمان صح؟"

ضحكت آرو قائلة بابتسامة. "في الاول مكنتش بحبها أوي او بوافق اتفرج مع إن بيتنا كله أهلاوي دلوقتي هي عشقي."

_" بدأتي تحبيها ازاي؟"

صمتت آرو قليلا لتتذكر و ترتب كلامها. "مش عارفه.. مقدرش أحدد حبيتها فعليا ازاي! الكورة كدا شغف أول ماتحس بمتعتها وتبقا منفعل معاها بتتسلل جوه قلبك على طول."

_"واضح جدا بدليل ملابسك النهاردة."

ضحكت آرو وهي تؤشر بيديها نحو التيشيرت. "تيشيرت الأهلي الاسود دا اجمد حاجه."

عادوت الكاميرا إظهار باقي اللوحات لتتوقف عند عدة صور مطبوعه ومُلصقه للحائط. "الصور دي انا الي وخداها على فكره، التصوير هواية لطيفه بجد وممتعه كمان إن اغلبهم مناظر طبيعيه ف مُريحه للعين ان اشوفها كل شوية."

_ "اول ما فتحنا الباب رغيتي بالتركي كنتِ بتقولي ايه؟"

رمقت آرو المصور بقرف مجددًا. "اتكلمي عن التركي باحترام بعد كدا، وبعدين كنت بقول أهلا يا اصدقائي مرحبًا بيكم في غرفتي، انا آرو."

_"اشمعنا التركي؟"

عاودت الصمت للتفكير مجددًا ثم اردفت. "عادي انا بحبه بسبب المسلسلات، والممثلين بس كمان بحب المسلسلات الكوري، والانجليزي."

تركها الكاميرا مان تتحدث وهو يلتف في الغرفه لينظر على شيء ويتوقف.

_"مش دا مايكرفون الكايروكي بتاع ماري يا حرميه؟"

لتنظر لها آرو وتمسكه. "اصلا ميكي الي سرقته، وجتلي نغني هي وعبدالله.. متتهمنيش فيه."

_"دا طبعا علشان انتِ واحدة من مُطربات فريقنا الكِرام، والطبلة دي جت امتى ؟"

صمتت آرو وهي تنظر للطبلة وتجاوب بتردد. "بتاعتي؟!"

لينُزل المصور كاميرته للاسفل ويتحدث بحدة  "وانتِ من امتى عندك طبلة اصلا!"

لتجاوب آرو بارتباك."عادي انا بس نسيت اقولكم انا بلعب طبلة شرقي من أولى ثانوي، لكن مش بلعبها بشكل رسمي يعني زي مابغني في الحفلات مثلا دي مجرد هواية."

_ "نسيتي تعرفينا ؟ دا انا هبهدلك النهاردة، هخليكِ تطبخيلنا غدا، وتعملي عشا وحلويات كمان، علشان تبقي تنسى اوي."

لتصيح آرو بمزاح."زولم! كان يوم اسود يوم ما قلتلكم اني بحب الطبخ."

_"ايًا كان خلينا نكمل وتتهزقي بعدين، دلوقتي في أخر فصل نزل من 'منزل الغرباء' بعد تجديدها كنتِ شخصيه رئيسية فيه انتِ، ومالك، وعلاقتكم الي الكل بيحبها، عرفينا بقا عن مالك."

ضحكت آرو باحراج، وتقول بينما ترجع خصلات شعرها خلف اذنها."هو  فعليا مالك مش موجود، وموجود برضو."

_"اة وانا مش عارفني انا تهت مني!"

ظلت آرو تفكر مع احمرار وجنتيها لترد. "بُصي يعني مفيش حد اسمه مالك فعليًا في الحقيقة، مالك خيالي بالنسبه لمنزل الغرباء، لكن على أرض الواقع في شخص موجود و اعرفه بيجسده مالك بالنسبالي، بس كدا."

_"بس خلاص كدا كفايه محن."

_ "اهم سؤال بقي دخلتي خلطبيطه ازاي؟ والبنات بيعنولك ايه؟"

ابتسمت آرو بعلو وهي تردف بابتسامة متسعة. "كان جروب ميلاجروس وانا كنت فيه، بعدين غيرنا اسم الجروب، واتعلقنا اكتر مع بعض وبقينا اكتر من عيله ليا مش مجرد صحاب."

ابتسم لها الكاميرا مان واردف بابتسمة صغيرة. "خلاص كده اخيرًا خلصنا."

ابتسمت آرو. "اخيرًا، انتظروا المقابلة القادمة مع خلطبيطايه جديدة بتحبوها." القت قبله في الهواء وهي تبتسم،

لتنزل الكاميرا، ويعم الظلام و يبقى صوت آرو. "اوعي تكوني هتنزلي التهزيق دا بجد؟!"

ليبتسم الكاميرا مان بِـشر "متقلقيش هشيله في المونتاج ياله ننزل نعمل الاكل."

--------------

هيلو جايز ✨

قُلنالكم تابعوا الحسابات في أي وقت ، مفاجئتنا مش بتخلص

انهرده ممكن تكونوا اتعرفتوا على واحده مننا

لكن فاكرين احنا اصلا كان عددنا كام ؟ 👀

جربوا تخمنوا المقابله الجيه مع مين 🤡✨

و عرفونا مين اكتر حد متحمسين تتعرفوا عليه 🐼

All love Khaltabita 💛