البارت الاول
ليلان حكمت...
انولدت بعائله متوسطة الحال ام واب واثنين اخوات
واخ واحد وواحد امي حامل بي مانعرفه ولد لو بنيه
اخواتي سميره واميره واخويه عبد الله
واني الجبيره اسمي فوزيه
ههههههه
جنت اكره اسمي كلش بس امي جانت تصيحلي
فوزه
ومرات اعيط عليها واكللها صيحيلي سعاد
فرحه اي شي بس لا فوزيه
هي تضحك وادكول لا تضوجين سميتج على اسم بيبتج ام ابوج
انتي تشبهينها..
جان عمري اربعطعش سنه وصلت للسادس ابتدائي ابوي بطلني من المدرسه
جان عصبي ومتشدد كلش ...مايقبل باي شي
يكول الابنيه ما الها عندي غير خبزه وثوب
من تروح بيت رجلها تسوي اللي تريده
كلام ابوي قاسي عليه كلش وجنت اضوج بس
امي وسوالفها وضحكتها مهونه كلشي عليه
جانت صمام الامان النا
ابوي اكثر الايام غايب بالجيش يروح مرات بالشهرين
مايجي يكول انذار ما نطونه اجازه ...
ومرات من يجي يبقى يومين على كد المسواك
وينطينه كم فلس ويروح
ومن نسال امي عنه ادكول عنده اشغال
راح يخلصهن ومناك يروح للدوام ...
ما جنت اصدك بامي اشوفها تتعذر لابويه
وتريد تسكتني وبس
لان جنت نبها واقره الحزن بعيونها واحس
هي متضايقه ومهمومه بس ما تبين هالشي
مرت ايام وليالي واحنا على نفس حالنا
حياتنا تسير بطئ عجيب غريب
وامي بطنها بدت تكبر وما بقه شي على ولادتها
وابويه على نفس وضعه طبه وطلعه وما نعرف عن طلعاته اي شي ..
امي قبل ولادتها بايام تغيرت وصارت اكثر حنيه
وتوصي بينا واكثر توصي على اخوي عبد الله
ادكلي ديري بالج عليه
هالواحد ما عندي غيره ...
وبيوم ولادتها دزت على جيرانه ام حازم علمود تروح وياها للمستشفى
وكالتلي خاف ما ارجع ديري بالج على اخوج واخواتج
وعلى نفسج وصيري سباعيه ولبستني بركبتي
جيس بي فلوس وذهب زغير كالت هذا لا تخلين ابوج يعرف بي
الج انتي واخوتج ضمي وصري مثل ما تصرين على روحج...
وبوستنا وراحت طلعنا وراها للباب وشفناها
صعدت بالسياره وعينها علينه والدمعه بطرف عينها
ساعات وصاح الصوت بيتنا وحياتنا كله تلخبطت
وقيامتنا قامت
امي اتوفت هي والطفل وام حازم اجتي تملخ بروحها وتصيح يا خيه يا ام عبود
عمت عيني ولا شفتج نايمه بالثلاجه
وكعت بالكاع امي ماتت بعد منشوفها حضنت اخواني وبجيت ضميت راسي بنصهم ما ردت
احد يشوفني ابجي وضعيفه
امي وصتني اصير قويه ...
بقيت ابجي ساعه وافرفح ماحسيت الا ايد لزمتني
رفعت راسي شفت ام حازم
كالتلي كومي خاله دزي برقيه لبوج خلي يجي
وعمامج خابريهم وخوالج بسرعه
لبست انعالي واني فاقده وخليت عباتي على راسي
ورحت للبريد ادز برقيه لبوي
وهمين خابرت لعمامي وخوالي ....
رجعت للبيت واني ادعي ربي
كون هذا حلم وافز منه واشوف امي
بالبيت كاعده .....
