تزوجت عاشقه جعلتني أعشقها💜🤍

الحلقة الثامنة

"" ولو أوجعتك الظروف وظننت أنك تستحق أفضل مما حدث !!

تذكر أن الله أختار لك الأفضل... وأنك لو علمت كيف يسير الله أمرك... لذاب قلبك من فرط رحمته بك❤💜🧡 ""

فرح قعدو عمتي والبنات عندنا وأني عاديه بصراحه مش إمضايقني الموضوع، خلود ياناري على حالها وقاعده مريضه وتبي فتره باش ترجع زي قبل، وعمتي كويسه معاي بكل، بس خوله هيا رأس الحربه تحاول إضايقني على أبسط شي وديمه معقدتني مركزه معاي في كل شي حتي كلامي وتصرفاتي مع خالد

خالد الحق أني عكس فرح تماماً مضايق هلبا من قعدت أمي والبنات عندنا، مش لأني كاره أمي أو خواتي لا بالعكس بس مش قادر نأخذ راحتي في حوشي ولاقادر نقول حتي ربع كلمه مع فرح إلا وإطب علينا خوله، وبعدين قعد الحوش زي الوكاله من غير بواب😓 يعني عمتي طالعه خالتي خاشه، خالتي طالعه مرت خالي خاشه طبعا أمي مفهمتهم أنهم يديرو في صيانة للمطبخ وللحمام (أكرمكم الله) في حوشهم، وهذا علاش قاعدين عندنا، وهذا من غير خليل وخيري اللي خاشين طالعين😒

كنت ملاحظ تصرفات خوله المزعجه وكل مانخش نلقاها مقعمزه على التلفزيون ولا شاده التليفون وتلعب، وفرح غاطسه في الحوش والمطبخ، وقاعده بين الغذي والعشي وفطور بوي والضيوف اللي خاشين طالعين، وكل مانكلمها نقوللها نوضي ساعدي فرح شويه تحرج وتقولي أحني ضيوف عندكم تبيني نخدمكم !!

مش عاجبتني فرح هاليومين ذابله وواضح عليها التعب بس هيا ماتتكلمش، وأني مروح من العمل خطمت خديت حاجات للحوش

خالد: السلام عليكم، كيف حالك ياأمي اليوم؟

زاهيه: وعليكم السلام، الحمدلله ياوليدي

خالد شفت لخوله بنص عين😏: شوره ماتبيش تلوحي هالتليفون من إيدك وإديري حاجه فيها فايده

خوله بحقد🤨: يالطيف هذا كله على خاطرها، ساحراتك حق شورها

خالد بعصبيه😡: تعرفي تسكري فمك وتحترمي نفسك ياحيوانه ولا لا

خوله بحقد: لا مش إمسكره فمي تعبيلك في رأسك هاللفعه وأنت إتجي إطيح فيا

خالد توا أني قاعد كيف خاش وحتي الشوفان ماشفتها شني تعبيلي في رأسي أستغفر الله وخلاص، بعصبيه😡: ياللي ماتتحشمي على وجهك، أحمدي ربك أنها متحملاتك وساكته، قربت بنشدها خاطري نعجنها طريحه إنبرد ناري شويه، بس عقلت وراء أمي🤨

زاهيه بخوف😟: خلاص ياخالد خليها على خاطري هالمره، وتلفتت لخوله والله غير نروحو للحوش لما نربيك من أول وجديد

فرح كنت في المطبخ، تنهدت لما سمعت خالد شكله يتناقش مع خوله، هذا حالهم كل يوم، وهيا قويه بصراحه ماحد قادرها، طلعت نجري وشديت خالد من إيده، وبرجاء😦: خالد خلاص باللهي عليك، تعالا معاي نبيك شويه😊