عشك الضابط والثلاثينيه

البارت 4

هلااااو بنات👋
شلونكم حبايبي مشتاقلكم "تومه" ع كوله ابن خالي الصغير 😍😂
بارت سرريع🔥 لعيونكم الحلوه
بنات اكتبولي رئيكم بالتعليقات 😘
واضغطو ع هااي👈 ⭐ حتئ استمرر مو بس تقرون وتغلسون 🔪😁

البارت 4
#عشك -الضابط -والثلاثينيه
                ،،،،،،،،،،،،،،،،،،،،،،،،،،،،،،،،،،،،،،
                ليشـ آبجي عليهہمـ 😔✋
                  وآخسـر دمـوع😥
                # بآعوني برخصـ 😟
               وآنتهہئ آلمـوضـوع💔

❤️❤️❤️❤️❤️❤️

فراح: تعرفين منو راح يجي علينه
ملاك: منووو
زينه: امال وحيدر
زينب: اهوووو امال وزعاطيطها شيخلصنه
ملاك دحكتلها بطرف عيني: وجع شبيج متحمله عليهم
فرح : هااي حتئ لا تشيل الجهال مرات امال تنطيهم الها
زينب: والله ما يسكتون يمي يعني شسويلهم اني ماحب الجهال
ملاك: ما يسكتون يمج لو انتي تدقرينهم ( يعني مثل الحيه تلدغ وتضم راسها ما لكيت غير هاي التشبيها😂 )
زينه: بحضي صحيح اني اضل اشوفها تكرص بيهم وتكول ما يسكتون يمي
ملاك: اعرف سوالفها تعلميني بزينب
فراح: هسه كومن خل نحضر الغدا امال وحيدر علئ جيه
ملاك: كمنه وطبخنه الغده وحضرنه المقبلات طبعآ امال ساكنه ب البيجي لان بيت عمي هناك ساكنين اذن ضهر كمنه صلينه شوي وصلووو طلعنه عليهم نسلم
امال وحيدر: السلام عليكم
الكل: وعليكم السلام
حيدر وهوه يصافح ابو اياد: شلونك عمي اخبارك
ابو اياد: هلا بيك وليدي الحمد الله انت اخبارك
حيدر هوه يتوجه ع ام اياد : الحمد الله شلونج عمه
ام اياد: هلا يابه شلونك شخبارك
حيدر: الحمد الله علئ الله .وبعدين توجه علئ الولد وسلم عليهم وصافحهم وسلم علينه احنه هم
امال وهيه تبوس ابوها :شلونك يابه شلون صحتك
ابو اياد :هلا بنيتي هلا بيج شخبارج
امال :والله الحمد الله شلونج يمه
ام اياد وهي تبوسها :هلا يمه شلونج شلون صحتج
امال: الحمد الله يمه .. شلونج يبنوان شخبارجن
فرح: هلا بيج والله مشتاقيلج
ملاك: عاش من شافج يابه، وسلمنه عليه كنه وامي وابوي ضلوو يبوسون ب جهالها والولد هم عدها ولد وبنت بعدين فوتناهم للصاله وكعدنه نسال عليهم وعلئ احولهم شوي وكامو يصلون واحنه رحنه للمطبخ نحضر لاكل حضرنه الاكل ونقلناه بالصاله وكعد ويتغدون رحت وديت مي الهم واسمعتهم فاتحين موضوع جاسم رحت لزينب كتلها انطي الهم ورحت للغرفه كعدت احس عبره بصدري اني اريد انسه وهمه يذكروني احس هذا الشي راح يبقه وياي طول عمري مسحت دمعتي وكمت للمطبخ جانو مخلصين اكل بديت اعزل والم الهوسه ويه البنات حطينه اكل واكلت شوي احس انست معتي كمت تا اغسل
فرح: وين شو ما اكلتي شي
ملاك: مو مشتهيه راح اصبلهم جااي واديره الهم
زينه وهيه تاكل: يمعوده عوفي هسه انادي اسد يجي يديرلهم
ملاك :لا عادي اني ما يمي شي. كمت غسلت وصبيت جاي واخذته الهم وزعت عليهم وكعدت يم امال ابتسمتلي وكالت
امال: شوفي ملوكه لا تزعلين ولا تشيلين هم طز بي راح هوه يجي عشره غيره
ملاك تسوي روحها مو مهتمه: لا يمعوده اصلن ما يهمني
امال: اي عفيه عليج خل يولي هوه الخسران وين يلكه وحده مثلج
ملاك :ابتسمتلها وسكتت شريد اكول اعرف جااي تواسيني بحجيها بس شيفيد خله جرح بكلبي ما انساه طول عمرري اااه اااه  ذكرت شعر يكول
آريد آنسـهہ وشـريد آنسـهہ 😔
ترآ آلمـلجومـ مـآ ينسـهہ 💔
اي والله ما انسه... صحيت من صفنتي علئ صوت   حيدر ابو آدم وهوه يكوم
ابو آدم وهوه يكوم: يالله اني اترخص لازم اروح
ابو اياد: وين تروح بعد وكت ضل اليوم بات يمنه
ابو آدم: لا والله عمي تسلم بس لازم اروح باجر يمي دوام
ام اياد: والله لحالك لو طالب اجازه وبايت يمنه اليوم
ابو آدم: لا والله عمه تسلمين انشاءالله غير مره يالله ثيمالاه
الكل: الله وياك توصل بالسلامه
ملاك: راح ابو ادم ماقبل يبقئ لان هوه عنده دوام يشتقل بمصفئ بيجي وبقينه احنه كاعدين اخذنه الوقت والتهينه بالسوالف والضحك اذن مغرب وكمنه صلينه وحايرين شنسوي عشه عاد امي كالت سوي البان احنه تغدينه متاخرين سوينه البان وعشه خفايف تعشينه وكعدنه نتعلل واجني ام عمار وبنواتها جيرانه يسلمن علئ امال وكعدنه نتعلل
زينب: اكلج امل شفتي الحلقه مال البارحه شكد حلوه
امل بنت ابو عمار: اي والله تخبل بس ذيج خبيثه بس لا تكتل البطله
زينب: ااخ كلبي يغلي عليها مال الزمها وبالصونده ووين اليوجها
امل: اي والله مال ااءء
ملاك صحت بيهن: وتالي احنه نضل نسمع سوالفجن البايخه غيرن الموضوع اتركن المسلسلات الجذب
زينه: هههه والله ما تلامين بيهن
نوريه اخت امل: ايي ام آدم شكو ماكو شلون اعيالج
امال: والله الحمد الله كلهم بخير وزينين انتو شلونكم
نوريه: احنه بخير بس انتي كاطعتها ما تسألين
امال: ووين ما اسأل والله ابو آدم يروح للدوام خفر ما يجي اربع ايام وجهالي ذيج الفتره حيل تمرضوو وضليت نايمه بيهم بالمستشفه
نوريه: اي والله صحيح كالتلي زينب من اجت علينه
ملاك: ضلينه كاعدين نتعلل سوالف وضحك شوي واجه اسد كال صبو جاي اجوي ولد عمي ولد جيرانه كمت اني وزينه سوينه جااي واجه ياسر اخذه واخذت جااي لامي وام عمار البنوات ما يشربنه وكعدت يمهن جان تكول ام عمار
ام عمار: اكلج ام اياد قبل اربع تشهر من اسد انكسرت ايده وين اخذتو جبرتو ايده
ام اياد: يم عمي حماد هوه يعرف يجبر جبره بس بوكتها خبصنه خبيصه وهوه يصيح منها
نوريه :ليش خاله انكسر. طبعآ نوريه متزوجه بالموصل بس كل فتره تجي لاهلها تسياره (يعني تزورهم كل فتره 😁 )
ام اياد وهيه تأشر علئ زينب: والله يا يمه هااي زنيبه مو خوش ادميه
نوريه وهيه تلتفت علئ زينب: ليش خاله شوت زينب
ام اياد: والله يمه ذيج المره اني جنت ماني هين و ااءء
زينب كمزت وكعدت يم نوريه وتربعت: يمه امانت الله خليني اني احجي اسمعن يبنوات جنت كاعده وضايجه ومالي خلك واسد بس يقهر بيه وهوه منا حامسني من زمان وداكاته جثيره وياي وغير ينطز ( يعني يكمز) فوكاي كتله يابه اسد اكعد ما يقبل اسد ماليي خلكك ماكو ما يوخر لزك دحكت اكو برميل مكصوص بالحوش ما نريده كتله
زينب: اسد كوم خل نلعب لعبه
اسد :شنو هيه
زينب بمكر: شايف ذاك البرميل تكعد بي واني ادرجك براحه شتكول
اسد وهوه يفكر: بس شلون خاف اتعور
زينب بخباثه :لا ماعليك شي ما تعور بعدين اني هم اطب بي من تطلع انت
اسد: عجل يالله
زينب: كمت وياه وجضعت البرميل وفوته بنصه كتله يالله راح ادرج
اسد بحماس: اي اي يالله درجي 
زينب ضحكت بمكر: هههه اي من عيوني ..ودرجته كل قوتي وهوه كام يصيح ويبجي واني مستمره اريدد انتقم منه لان مبزعني حيل اخر شي كام يصيح ايدي ايدي واني مستمره بعدين كسر بكلبي وكفت البرميل وطلعته واشوفه وجها احمرر ويصيح ويبجي بصوت ولازم ايده
البنوات: ههههههه شخبيثه
زينب: ههه اسمعن.طلع اياد علئ صوته وكام يصيح عليه بعدين اسد كاله ايدي وهوه يبجي عااد اجوي امي وابوي وتخبلو واسد بس يصيح اخذو رئسآ علئ عم امي بس اووويلي بيومها خفت مو علئ اسد لا خفت لا انكتل ما عبالي ايده تنكسر هههه
ام اياد وهيه تعض اصبها :اااخ منج ما تبطلين سوالفج مالت الزرد من شفتي اخيج يبجي ليش ما بطلتي
زينب بضحك: يا يمه غير جان حامسني
نوريه بشقه: خاف محد كتلج والله لو اني جان لزمتلج عصه يابسه ووين اليوجعج
زينب: هههه اووويلي بوكتها حصلتلي كتله معدله من الوالده العزيزه 
ام اياد: والله مستاهله اليجي من ايده الله يزيده
ام عمار: والله زنوبه ورده بس غير يحمسوها شسوي خطيه
ملاك: اي والله خاله شلون ورده كلها اشواك واليجي يمها تجرحه
ام اياد: عجل اسمعن مره من زمان  رحت اني وام عامر للسوك وابو اياد جان طالع واياد هم طالع ويه جمعه صديقه كلت للبنيات اني راح اطلع عينجن علئ اخوانجن نايمين والله رحت ورجعت الضهر البيت صنته تعجبت سالت البنوت وين ياسر كالن نايم وين اسد سكتن وبقن وحده دحك ع الثانيه كلت خيرر انشالله عرفتهن مسويات مكسوره رحت دحكت ولكيت اسد مربوط جوه الدرج وسادات حلكه تخبلت ورحت فكيته وكمت احجي علئ البنوات تالي فرح كالتلي والله عمه هاي زينب ربطته وما تخلينه نفكه تكول لتفكه اربطه وياها
الكل: ههههههههههه
امل:هههه خرب بيومج زنيبه ليش ربطتي يولي
زينب:هههه جنت نايمه بفراشي واجه كعدني تعاي سويلي ريوك واني منا شلون احبه اسد وخرر وخرر. ما يقبل وهوه يسوي عناد ما يجي الئ عليه كمت وربطته وارتاحيت منه
ام عمار: هههههه ما تبطلين سوالفج
ملاك: بقينه كاعدين شوي وراحن البنوات وام عمار اجه اياد كال صبي جاي للولد رحت للمطبخ لكيت زينب واكفه ويه ابن عمي وليد هوه شاب  وبيدها ورقه ويحجون بصوت ناصي استغربت شعدها زينب من فتت سكتو وليد سلم عليه وطلع لزمت زينب وجريتها عليها
ملاك: تعاي ولج شسووين ويه وليد وشنو هااي الورقه البيدج
زينب بارتباك وهي تقبي الورقه : ااءء هذا شسمه هيج ماكو شي ورقه مال احرف انكليزي حتئ احفضهن
ملاك بعصبيه: ززينب تحجين شكووو لو اااروح اكول الامي والله
زينب: اششش يمعوده فضحتينه ولله هاي رساله مال حب
ملاك ضربت خدي: يمصخمه شسوين بالرساله وبعدين شنو بينج وبين وليد
زينب: اهوووو بس لا تحاسبين اني عندي شي ويه وليد هذا حتئ باحلامي ما يمر ترا هااي الرساله مو الي الوحده من كرايبنه انطاها الي حتئ اوصلها الها فتهمتي
ملاك باوعتها بطرف عيني: عجل ليش ارتبكتي بالبدايه
زينب وهيه تنفخ خدودها :لان هوه محلفني ما احجي الاحد وردت اضم السالفه عليج بس وووين انتي ما ينضم عليج شي
ملاك: الله الله وانت من يمته صايره مرسال حب
زينب: اووو من زمان جان كل ما يجي علينه ينطيني رساله اوصلها
ملاك: ديله عيني يالمرسال كومي خل نحط افراش الامال وجهالها .بعدين كمنه وحطينه فراش وولد عمي وجيرانه راحو طلعت للصاله عزلتها وكنستها وسددت البوب وطفيت الاضويه  امي وابوي راحو نامو رجعت للغرفه لكيت البنوات واياد واسد وياسر كاعدين يم امال ملتمين يمها يحجون ويها كعدت يمهم
اياد : اسد انت وياسر باجر اريدكم تطلعون وياي علئ الشقل
ياسر: والله اني ما اطل لو شصيرر
اسد: واني هم
اياد :ليش بله عيني خاف نزعج حضرتكم
اسد: امال الله عليج يصير هيج
امل: شنو هوه اليصير هيج
اسد: اياد ياخذنه وياه للشقل من الصبح وما يجيبنه الئ العصر نضل نشتقل وياه وتالي ما ينطينه لو ربع
اياد ضرب اسد علئ راسه: طايح الحض هوه اني وين اودي الفلوس غير انطيهن لبويه وامي وهمه يصرفون علينه
ياسر: ميخالف انت لو تنطيهن النه واحنه ننطيهن لبوي وامي
اياد: اي والله شلون جذب حتئ لبين ما توصلون البيت ما الكه لو ربع تخلصونهن اكل وسولف طايح حضها
امال: ههههه ميخالف انتو اخوان جيبكم واحد وبعدين حتئ اذا انت او اياد او اسد انطيتو الفلوس الاهنه خما راح يكولون فلان انطاني راح يكولون هااي الفلوس من شقل الولد 
ياسر : طبعآ انتي تفتهمين عليه
اسد وهوه يضرب ياسر: لااا حيللل مبين انت تفتهم من وكعت المعلمه ام الاسلاميه علئ وجها
اياد باوع لياسر: صحيح هذا الحجي هاااا ليش سكتت ما تحجي بحلكك عضم
زينب وهيه تحجي بصوت ناصي : الله يرحمكم والله جنتو خوش ويلاد محبوبين حيلل ما سويتو شي مو زين بالدنيه ابد بس كسرتو خشم المعلمه
ملاك كرصت زينب هااي ما تسكت الئ اطلعها: اسكتي لا يسمعج اياد
فرح رادت تستر السالفه : لاااا اسد يشاقه ويه ياسر مو اسد وهيه تغمز الاسد
اسد: هاا اي اشاقه ويه ياسر ههه اصلن ياسر اعقل واحد بالمدرسه
اياد وهوه يباوعلهم بطرف عينه: ايي خوش عبالي كلت عكال ابويه صار فتره محد مضروب بي
زينب: اي والله مو بس عكال عندي صونده يابسه ضامها من زمان
امال:ههههه يولي لا تضلين تخبثين ويه اخوتج
زينه: لا اصلن زينب عاقله حيللل اكثر من الولد بحيث اسد وياسر تطبكهم علئ صفحه
اياد: علئ سالفتج هااي كومي جيبيلنه شي ناكله من دكانج بلاش
زينب: هههه هيج احسلج
اسد وهوه يهمس الياسر: ترا ما حجيت شي لاياد مو خايف عليك لااا بس خايف انكتل وياك لان اذا اني حجيت انت هم تحجي
ياسر بهمس: ااي عفيه انت لا تحجي شي حتئ اني هم ما احجي يعني حب الخير الاخيك كما تحبه لنفسك
اسد: امممم كتلي خيرر . احم يله زينه شو ما جبتي شي
ياسر: والله عيب عليج يعني امال جايه خطار علينه وانتي بالجذب ما جبتي نستله الادم ابنها مو الها
زينه بضوجه : اي اي راح ارح اجيب شبيكم جلبتوو
امال: هههه تعاي يمعوده ما اريد شي لا تجيبين
زينب كمزت: لااا لااا عيب شلون ما تجيب اذا مو الج الادم بعد خالته
ملاك بهمس لزينب: هسه بعد خالته ومن تعوفه يمج يشبع تكرص
زينب وهيه تغمز وتعض شفه لملاك :اششش عيب لا تسمعج امال خليها بيناتنه
ملاك: ههههههه
اسد: ضحكينه وياج
ملاك:هههه احم لا هيج ماكو شي
اياد وهو ياخذ آدم من ايد امال: شو جيبي بعد خاله ماشاءلله هلا هلا بعد خالك شلونك
ملاك: اباوع علئ سيف ابن اياد من شاف ابوه شال آدم اجه بحضنه يغار منه
اياد: ههههه شبيك وليدي تغار من ابن عمتك تعال اكعد هنا
ملاك: كعدهم ثنينهم بحضنه ويشاقيهم ويضحكهم وسيف يغار شلون آدم بحض ابوه اياد يكول لاآدم من تكبر اريدك تصير مثل خالك يقصد نفسه واسد يكول لا والله يصير مثلي وكلمن يكول لا مثلي  وامال تضحك عليهم كتلهم
ملاك: شبيكم متكاونين ابو المثل يكول ثلثين الولد ع الخال يعني راح ياخذ من كل واحد شويه
زينب: دخيلك ربي ويطلع مثل اسد حتئ العرب تهج
الكل: ههههههه
ملاك: شوي واجت زينه جايبه حلاويات وببسي وجباسه وكعدنه ناكل ونسولف ونضحك والولد ناصبين علئ زينه لان جابت حلويات بقينه شوي كاعدين عاد اياد شال سيف وناده فرح وراحو والولد  كلمن كام لفراشه ينام والبنوات تمددن يم امال واني تمددت بفراشي وكل عاده. ما يجي ابالي الئ جاسم والسواه بيه شكد ما احاول انسه ما اكدر احس صعبه وخاصه من الكل يدري انو هذا الشخص اجه ومشه وانطه سياك وبعد سبوع يرجع والله هاا اريد سياكي هنا فشله عليك اتمنئ لو بوكتها جاي عليه مفهمني الموضوع جان اني نهيت كلشي من يمي هيج احسن الي مو مثل هوه يجي ويكول ما اريد هنا صعبه عليك وما تكدر تبرر للعالم موقفك مسحت دمعتي الوكعت ودرت وجهي ونمت
........

ملاك: كعدت الصبح لكيت امال وفرح وامي كاعدات كبلي والولد طالعين علئ الشقل كمت غسلت وصليت ولميت الفراش وطبيت للمطبخ
ملاك: صباح الخير
الكل: صباح النور
ملاك: دحكت امي مدده ومتقطيه بالبطانيه بالمطبخ احنه مطبخنه شوي جبيرر وجان الجو بدايه شته هيه صارلها جم يوم وضعها مو هل كد سالتها
ملاك: هاا يمه خما بيج شي شو متمدده
ام اياد بصوت متحشرج: والله يا يمه ماادري احس روحي صارلي جم يوم مو زينه وما اكدر امشي دايخه
امال: اني هم من اجيت شفت وضعج مو عاجبني العصر ناخذج اني وابويه واياد للدكتور
فرح: اي عمه روحي لا تضلين انتي بساع ترتمين ما تحملين المرض
ملاك: كعدت يم امي ولزمت راسها زين مو مصخنه سألتها يمه تريكتي لااا
ام اياد: والله يمه مو مشتهيه معدتي ما تقبل الاكل
ملاك: ميخالف يمه شلون تصيرين زينه اذا ما تاكلين راح اكوم اسلك بيضات لج
زينب وهيه تفوت للمطبخ: واني هم سويلي ريوك وياجن جوعان صباح الخير
الكل: صباح النور
ملاك : وانتي شبيج حضرتج متكسره ما تسوين النفسج
زينب وهيه تسوي روحها مسكينه: ترر هوه ريوك اني شطالب وبعدين انتي راح تسوين الجن يعني اذا طكيتي بيضتين وياج ماراح تنقصين 
ملاك: منو يلحك السانج اكوم احسلي
فرح وامال: هههههه
فرح : لاا هاي هيه زينب وفكت حلكها شيسكتها ام لسان
ملاك: كمت وسويت ريوك النه وتريكنه بس وضع امي ما عاجبني اكلت لكمتين وكامت تزوع كلنه خفنه عليها وامال كالت العصر ناخذها ما نخليها كمت اني عزلت البيت وزينب غسلت المواعين وفرح طبخت الغده. للضهر اجوي الولد وابويه تغدينه بس امي ما اكلت شي تكول مالي نفس وبقت متمدده واحنه كملنه شقلنه وكعدنه يمها كلنه وابويه والولد    بقو يحجون ويشاقون وياها لان شافوها حيل مريضه اذان عصر وكمنه صلينه وامال خلت جهالها يمي وراحت هيه وابويه وامي واياد واحنه بقينه ننتضرهم كمنه نضفنه البيت وصارت الدنيه مغرب وهمه ماكو ما اجو فرح كالت خل نسوي عشه ابين ما يجون انطيت آدم لزينه وعشق لزينب جهال امال وكمنه نسوي عشه اني وفرح وهمه حيل تأخرو ومنا جهال امال كامو يبجون زينب تكول ما يسكتون يمي ويبجون جان تجي زينه وتكول
زينه: والله جذابه شوفت هلعين تكرص بعشق حتئ تكوم تبجي وما تخليها يمها
ملاك صحت بزينب: ززينب مو وكتج هسه ما تشوفينها فرطت من البجي الزميها ابين ما تجي امها
زينب: الئ هيه ما تسكت شسويلها
ملاك: جيبيها عليه واتعاي عاوني فرح بالعشه
زينب: اي هاج
ملاك: اخذتها واسكت بيها شوي واجو من الدكتور بس وجوهم ما تبشر بخير فاتو للصاله وامال عدلت امي بفراشها واجت اخذت عشق من ايدي اجت فرح والبنوات من المطبخ سالتهم
ملاك: هاا شكاللكم الدكتور من رحتو علي
اياد: والله لازم نسويلها عمليه باسرع وقت
البنات بصدمه : شنوووووو

عمليه مال شنو تسوي ام اياد وليش بهل السرعه ?

احبكم ❤️

❤️❤️❤️❤️❤️❤️❤️❤️❤️❤️

( بنات خاف تشوفون اللهجه شوي تغيرت بالكتابه اي صح لان هااي لهجتنه الصحيحه اهل الغربيه بس اني لان مدمنه روايات واقره اربع وعشرين ساعه احس حتئ لهجتي تغيرت بحيث من اجي اكتب الاحداث اسردها بقير لهجه لان اغلبيه الروايات الاقرها جنوبيه وصرت احجي مثلهم وعلئ فكره اني اموت علئ اهل الجنوب)