إسكريبتات

"إسكريبت"🍂

"إسكريبت خفيف"

دخلت الشقة، وانا هلكان من التعب اليوم النهاردة كان صعب بغباء..
بس ليه الشقة ضلمة كدا، فين ريم!!

ــ"ياماااااا إيه دا...؟!
أعوذ بالله من الخبث والخبائث، أعوذ بالله من الشيطان الرجيم إنصرف ... إنصرف .."

إيه دا ثانية دي ريم بس ليه عاملة فـِ نفسها كدا

_ " في إيه ياريم وإيه إلي عملاه في الشقة وفـِ نفسك دا "

كانت لابسة بيجامة سودة، وشعرها لماه على هيئة كحكة، وربطاه بطرحة من قدام، زي الي عندها صداع، وحاطة روچ إسود، وكحل إسود، ومتقلاه

ــ"كنت فين لِدلوقت يا هدهد الجناين؟!.. فهمني بسرعة، لإني مسيطرة على نفسي بالعافية، إنى ماقطعكش، وأحطك في كياس سودة، وإنت شايف ماشاء الله، حالات قتل الأزواج مافيش أكتر منها "

تلقائي لما سمعت كلامها، حطيت إيدى على رقبتي ، وبعد ما أخدت بالي عملت نفسي كُنت بشتال حاجة وهمية من على رقبتي علشان ماتفكرنيش لاسمح الله خايف منها... لاااا أنا راجل وراجل قوي كمان ، كملت مشي لجوا، وانا مش عايز ابص في وشها؛ أنا لسا صغير مش عايز اتفزع من شكلها تجيلي جلطة، وأموت لاسمح الله بسبب الي عملاه فـ وشها دا

ــ " لو سمحتِ، لو مش هزعج روح الست المصرية الِـ جوا حضرتك، ممكن تبطلي نكد، ونكمل بعدين؛ لإني مش قادر النهاردة . "

ـــ " إنتَ الخسران ، كله هيتراكم عليك .. "

ــ "خدي يابت إنتِ هنا، هو إيه الي هايتراكم عليا؟ هي ضرايب!! "

قولتلها كدا، وأنا ماسكها، وبضربها على قفاها، ولا أجدعها قفا مخبرين، وبحاول برضوا مابصش فـِ وشها ..

ــ" إيه ياعم براحة إيدك مزربة. "

ــ" ياعم، ومزربة يابيئة!
في واحدة تقول لِجوزها حبيبها وقرة عينها إيدك مزربة !،وإيه الي عملاه في خلقتك دا، وطافية النور، وداهنة سحنتك إسود مش خايفة تتلبسي؟! "

ــ" بص بقولك إيه مالكش دعوة بشكلى، و ماتوهش في الكلام، كنت فين يا يوسف؟ ، وماتقوليش كُنت فى الشغل، إنت ميعاد شغلك بيخلص الساعة أربعة، والساعة دلوقتِ داخلة على تمانية، غير إنك كُل يوم كنت بتيجي بعد الشغل على طول،ولو وراك حاجة بتتصل بيا ماتصلتش النهاردة ليه؟، أيوة.. أيوة إستني أنا عرفت دلوقتِ كنت فين، أكيد كنت عند مراتك التانية ياخاين مش كده؟ وماتصلتش بيا لإنك كنت هاتتوتر وانت بتتكلم فـ كنت هكتشفك صح... إتجوزت عليا يا يوسف ، كنت عملتلك إيه ها قولي؟ عملتلك إيه علشان أستاهل منك كدا؟ رد عليا ولا صحيح هترد عليا وتقولي إيه يالخاين يالموكوس .. "

_" إيـــــــــــــــــه في إيـــــــــــــــه؟
وهو إنت سيبالي فرصة أتكلم ياما؟ نازلة رغي وتحليل وتن تن تن وكلوا ورا بعضه، إديني فرصة أتكلم، ياشيخة يخرب بيت هرموناتك، إيـــــه دا "