Unicode //
"လွှတ်တော်နာယကကြီး၊လွှတ်တော်ကိုယ်စားလှယ်များ၊တက်ရောက်လာကြသော ဂုဏ်သရေရှိဧည့်သည်တော်များနှင့် နိုင်ငံသူ၊နိုင်ငံသားများခင်ဗျာ......"
Tvဖန်သားပြင်ထက်မှထွက်ပေါ်လာသော ဩဇာပါသည့်အသံကြည်ကြည်ကြောင့် သူအလုပ်လုပ်နေရာမှ မော့ကြည့်လိုက်မိသည်။ ညလုံးပေါက်အလုပ်လုပ်ခဲ့ပြီး ယခုထက်တိုင် အနားမယူရသေးသော်လည်း အမြင်တို့ကဝါးမနေသလို၊အကြားအာရုံကလည်း မှားမနေပါ။
ဖန်သားပြင်ထက်ပေါ်နေသည်က လောလောလတ်လတ်လုပ်သွားသော ရွေးကောက်ပွဲမှ ရွေးချယ်ခန့်အပ်ခြင်းခံရသည့် နိုင်ငံတော်သမ္မတအသစ်၏ မိန့်ခွန်းပြောကြားခြင်းအစီအစဥ်ဖြစ်သည်။
မောင်....
ရင်ထဲမှ လှိုက်လှိုက်လှဲလှဲတမ်းတကာခေါ်ဆိုမိသွားသည်။ မိန့်ခွန်းပြောကြားနေသော အမျိုးသား၏ မျက်နှာအားငေးကြည့်နေမိသည်။
ဪ ရွေးကောက်ပွဲတောင်ပြီးသွားပြီပဲ....
မောင်တို့ပါတီအနိုင်ရသွားသည်ကိုလည်းမသိလိုက်၊ မောင် သမ္မတအဖြစ်ရွေးချယ်ခံလိုက်ရသည်ကိုပင် ယခုသတင်းမကြည့်မိပါက သိလိုက်မည်မဟုတ်။ ရွေးကောက်ပွဲနေ့ကိုလည်းမသိခဲ့သလို မဲလည်းသွားမထည့်ဖြစ်ခဲ့။
တည်ကြည်လေးနက်စွာဖြင့် မိန့်ခွန်းခြွေနေသောမောင့်ကိုကြည့်ရင်း မောင်နှင့်သူအဆက်အသွယ်ပြတ်သွားတာ ၃လနီးပါးရှိလောက်ပြီဟုခန့်မှန်းမိသည်။ တိတိကျကျတော့ သူလည်းမသိ။ နေ့ကိုလည်းမှတ်မထားမိပါ။ လွန်ခဲ့သော ၈နှစ်၊ စတွေ့စဥ်ကတည်းက လက်ရှိအချိန်ကာလအတွင်း မောင်နှင့်သူ ပထမဆုံးအဆက်အသွယ်ပြတ်သည်အထိ ပြဿနာဖြစ်ခဲ့ကြခြင်း။ မောင်ကလည်း တစ်ချက်မျှမဆက်သွယ်ခဲ့သလို သူကလည်း တစ်ချက်မဆက်သွယ်ခဲ့။ ဘယ်သူမှားလည်းမသိပေမယ့် နှစ်ဖက်လုံးမှားသည်ဟုပဲယူဆချင်သည်။
"ငယ်က အတ္တသိပ်ကြီးတယ်"
နောက်ဆုံးတွေ့ခဲ့သည့်နေ့က နောက်ဆုံးစကားအဖြစ် မောင်ပြောခဲ့သည့်စကား။ အဲ့တော့ သူရောဘာပြန်ပြောခဲ့လဲ။
