الرجاء ترك تعليق لطيف أو إنتقاد بناء بعد الإنتهاء من القراءة
~ متابعة ممتعة💙🌻~
__________
#زوجتك_نفسي8
**
قعدت سلمى و حوالينها أمها و أخواتها ، دار الحديث كالتالي ..
سندس : ترجعي لي ! بعد كل العملو فيك ؟
سلمى شابكة يدينها في بعض بتوتر : ارجع عشان انس ما عشانو هو
ميساء : لو سبب الرجعه انس ما ترجعي ، انس محتاح أب و أم بحبو بعض و عايزين بعض مش مستحملين بعض عشانو ! عمرو ما حايكون مبسوط لو العلاقة بينكم يغلبها المشاكل
سلمى نزلت راسها و حركت اصابعها : هو قال تاب " سكتت شوية و كملت ": وعدني ما يعمل كده تاني و انا فكرت في الموضوع ..
قاطعتها سندس بصرامة : بالله ! ومن متين المتعود بتوب و بخلي عادتو ؟
سلمى : المهم انس ..
ميساء قاطعتها : قولت ليك و حاعيدو انس ما تدخلو في مشاكلكم الخاصة !
ماما زينب : كلامها صح ترجع عشان ولدها يربى في نصهم .. وهي ما اول ولا اخر واحده راجله يعاين لغيره ..مافي راجل في دار الدنيا دي عينو ما بترف للنسوان انتو مكبرين الموضوع ليه ؟ الراجل ما بتملى عينو غير التراب
سلمى عاينت لامها بزعل : لو بحب ما بعاين !
ماما زينب ضحكت : حب شنو يابتي ؟ نان انتِ لسه عايشه في الوهم ده ؟
سلمى بصوت خفيت : ما وهم يا امي ..
سندس : والله القرار قرارك لكن ما بنصحك ، ديل الكلب عمرو ما يتعدل
ميساء : انا مع سندس ، إتذكري العملو فيك لو قادرة تسامحي وتبدي معاه صفحة جديدة كملي لولا .. ما بنصحك
ماما زينب : فكري في ولدك مافي نفسك الام لازم تضحي عشان اولاده
ميساء : الاولاد بكونوا مبسوطين لمن الام و الاب يكونوا مبسوطين و متفقين ، غير كده بطلعوا مريضين نفسيين ما اكتر ، بعدين هي مقفلاها على نفسها ليه ؟ ما يمكن نصيبها في مكان تاني !
ماما زينب بنبرة حادة : ان شاءالله عايزاها تعرس تاني ؟
ميساء : اي مالو ؟ هي لسه صغيرة و الحياة قدامها
ماما زينب : هوووي يابت عرس شنو تاني ؟ نصيبها ياهو مزمل إن دارتو تكمل معاه كمان دايراها تجيب ليهو راجل أم !!؟
ميساء : وفيها شنو يا أمي ؟
ماما زينب : فيها كتيير ، دايرها الناس تقول عرست تاني ؟
ميساء : ويعني ! هي شغلتها بالناس شنو ؟
ماما زينب : أسمعي هنا ، أي زول في الدنيا مقسوم ليهو واحد بس ، زي ما انت اخدتي نصيبك و فاتك سلمى كمان اخدت نصيبها و ياهو مزمل ده .. يا تواصل معاه يامافي داعي تجيب لنفسها و لينا الكلام و الفارغة
