نِسْوَة

تمهيد

#نسوة
#حنين_الشوق
.
.
.
|أكبر التغييرات الجذرية تبدا من الداخل|

'كانت هذه أخر جملة قالتها بعد الترحيب بمجموعة صغيرة من النساء اللي كانوا حواليها، جبدت كرسي و قعمزت معاهم في الدائرة، شدت ورقة و قلم في يدها و شافتلهم' : و توا من اللي تبي تبدا تعرف بروحها الأولى ؟ 'قعدت تشوفلهم كيف مترددات و ملامح الارتباك واضحة في وجه كل وحدة فيهم... تنهدت و حطت الاوراق و القلم على جنب، مالت للقدام شوية و قعدت تشوفلهم' احنا هنا باش نكونوا سند لبعض و موجودين باش نفرغوا الطاقة السلبية اللي في داخلنا و نلقوا حلول لمشاكلنا، كلكم هنا لنفس الهدف لذلك مش لازم من الخجل و الخوف، انا زي اختكم بالزبط.
'وقفت مرأة كان واضح من هيإتها انها في بداية العشرينات، تنهدت و دارت طلة سريعة على الأربعة اللي حواليها' أنا إسمي مريم، عمري 19 سنة، متزوجة من سنة و نص تقريبا 'شافت للسقف شوية' خديته عن حب و كانت صدمتي بعد الزواج هي اللي خلتني نجي هنا و نشوف حل للحياة اللي عايشتها 'سكتت شوية' انا محطمة جداً 'تنهدت' وبس! 'قعمزت من جديد'

: مرحبتين بيك و انستينا كلنا 'شافت للي بعدها' عرفينا عليك يا قنينة.

'وقفت مرأة في منتصف الثلاثينات و ابتسمت' : انا منى، 34 سنة، متزوجة و عندي وليد و بنية، ان شاء الله ربي يرزق كل مشتاق؛ اعتقد ان نفس المشكلة انا والمدام، الزواج اكبر كارثة في الحياة، خاصةً اني مش قادرة نوازن بين حياتي الزوجية و حياتي العملية اللي هي اصلا فاشلة و زي ما تشوفوا يعني انا مش هذيكا المرأة اللي يتمناها كل راجل، يلا ليا رب كريم.. و هدا هو 'هزت كتافها و قعمزت'

'قعدت تهز في رأسها و شافتلها للحظات، تلفتت لمرأة تانية' : دورك يا جميلة.
'ابتسمت البنت و شافتلهم بحب': انا اسمي اريام، 21 سنة 'تنهدت' بصراحة انا مش عارفة شن اللي خلاك تناديني بالجميلة رغم اني مش جميلة ابدا قدامك و قدام النساء هادوا، ممكن مجاملة! و هدا اكثر شيء نكره الحقيقة، المجاملات... ع العموم انا نقرا اعلام و مشكلتي كبيرة و..

: تمام اريام شكرا، توا تعارف بس خلوا المشاكل على جنب مش وقتها.

اريام 'هزت راسها و ابتسمت'

'شافت لآخر وحدة' : عرفينا عليك يا قمر.

' عدلت جلستها' : انا جلنار، 20 سنة، نقرا في كلية الادارة... 'حمحمت بصوتها' الحق انا جيت هنا لإن اريام نصحتني نجي و خلاص، غير هكي انا مش مضايقة ولا حاجة.

'هزت رأسها و ابتسمت' : اوكى فهمت.. 'خدت نفس و شافتلهم' تشرفت بيكم كلكم و نورتوا المكان والله، توا لازم نبدوا بمشاكلكم بالخطوة، كل واحد فينا عنده مشاكل نفسية مأثرة على حياته و تفكيره و الحل الانسب لكل شيء هو ان نحكوا عليها لشخص يفهمنا و يسندنا، و هدا هو واجبي معاكم و شكرا لانكم اخترتوا تحكولي على مشاعركم و مشاكلكم... المهم توا، مني تبدا تحكيلنا جزء من قصتها؟
____________________________________

#نسوة 🤍
كونوا في الانتظار