إن الذين قد قلت عنهم أضلعي ، قطعوا الوريد و مزقوا الشريان🖤
عندما تجاهلت أخطائك لم أكن مغفلاً ، و لكن لا أريد أن اخسرك ♥️
لأول مرة في حياتي أمد يدي على زول و ما أي زول دا أنس 💔صدى صوت الكف اتردد في مسمعي كأني انا الأخدتو بدلو ، كنت متفاجأه و مصدومه أكتر منو ، ما عارفه كيف قدرت اعمل كدا في أنس ، بس ما ندمانه والله ما كنت عايزا كدا بس كلامو عني بالشكل دا جرحني شديد 💔.
بعد دقايق من الصمت رد علي و قال : دا كلو عشان حبيب القلب ؟ عشان رفعت يدي و ضربتو جايه تنتقمي مني ؟ ما كنت متخيل انو حيجي يوم و ترفع يدك علي ولا كنت متخيل انو يجي يوم و اقول ليك كدا ، بس عمايلك هي الوصلتنا لهنا انا ما غالبني أرفع يدي عليك و اضربك بس ما ح اقدر اعمل كدا ، لسه في شي جواي مانعني أأذيك أو اكون سبب في دموعك ، و انت مستغله حتة اني ما بقدر أمد يدي عليك اني ما بقدر أزعلك و أعلي صوتي عليك ، يمكن لو من البداية حسمت الموضوع دا و اتصرفت زي أي راجل شاكك في خيانة مرتو ليهو ما كان اتجرأتي و رفعتي يدك علي ، تصدقي انك أكتر انسانه انا كنت بثق فيها و بخاف على زعلها أكتر من زعلي ؟! عارفه احساس بكون كيف لمن اكون متأكد انك داسه مني حاجه ؟! عارفه حسيت بشنو لمن كنت بمشي ليك في الجامعه و اعرف انك ما بتجي طوالي ؟! عارفه حسيت بشنو لمن كنت اسألك كنتي وين أو جيتي من وين و تقولي لي من الجامعه و انا سلفا عارف انك كنتي وين ؟ طيب عارفه شعوري كان شنو لمن شفتك طالعه مع راجل من بيتو ؟! الإتحملتو انا يا مها ماف راجل بتحملو ، الغيظ الكنت كاتمو ماف راجل بقدر يكتمو ، ما كان غالبني امسكك مع الراجل الكنتي معاهو و اسألك قدامو ، بس ما حبيت استعجل و أقل من احترامك قدامي و قدامو و تاني قلت أكيد في حاجه مهمه و بعدين حتحكي لي ، بس كنتي بترجع على اساس انك جايه من الجامعه و بكل برود و عين قويه كنتي بتكذبي علي ، ليه كنتي بتستغبيني بالطريقه دي ؟ عشان احترمتك و وثقت فيك ؟ حصل مره عليت صوتي عليك ؟ حصل مره غلط في حقك ؟ عملت شنو انا عشان تمشي تخونيني بالطريقه القذره دي ؟ يمكن عشان وضعي الإقتصادي ؟ والله لو جيتيني و قلتي لي يا أنس انا ما بقدر اكمل معاك و الوضع دا ما عاجبني و عايزاك تطلقني والله كنت طلقتك احسن من البتعملي فيهو دا ، ياخ كان تحترمي نفسك شويه انتي مره متزوجه كي....للمرة التانيه ضربتو كف ، بسمع في كلامو و دموعي نازله ما قادره أوقف بكي ، قلت ليهو و انا بتنهد لو كنت عارفه انك بتفكر فيني بالطريقه دي كان من نفسي جيت و حكيت ليك ، انا ما كنت بحكي ليك لأني عارفه الضغوط العايشها انت ، بحاول قدر الإمكان اني اخفف عنك و أحل المشاكل من غير ما الجأ ليك لأني عارفه الفيك مكفيك ، لو جيت و ختيتني تحت الأمر الواقع و قلت لي انا شفتك في الحته الفلانيه و مع زول غريب و عايز اعرف دا منو والله كنت حكيت ليك عشان ما ادخل الشك بيناتنا ، ما حكيت ليك لأني ما اتخيلت انو انت يمكن تفهمني غلط و تشك فيني ، فكره انو انت ممكن تفتكرني بخونك دي كنت شايلاها من بالي خالص ، ما ظنيت انو أنس ممكن يفكر فيني كدا ، كنت بشوفك دايما زهجانه و زعلان مني ، متذكره كنت بقول ليك شنو ؟ بقول ليك خلينا نتناقش يا أنس ، بس كنت دايما تتهرب مني ، مدام كانت في شكوك في راسك ليه كنت بترفض تتناقش معاي مش كانت فرصه عشان تعرف الحاصل ؟ مادامك شايل في قلبك مني ليه ما جيت كلمتني ؟ أنس انت عارفني اني بتعامل مع كل شي بطول البال و الهدوء و عندي لكل سؤال جواب ، صح اني ما بشاركك و صح اني كتير ما كنت بجاوبك الإجابه العايزها ، بس حتى أجوبتي عندها زمن معين و مواقف معينه ،، لو جيت و سألتني بهدوء و رواق في موقف زي دا غصبا عني كنت حأجاوبك احتراما لطريقة السؤال و تفهما لسعيك عشان ما تخلى شي في نفسك و حفاظا على علاقتنا 💔قاطعني و قال لي بضيق كويس هسي بسألك و هسي تجاوبي ، دا منو ؟ و بتعرفي من وين ؟ و الجمعك بيهو شنو ؟ ما كنتي بتمشي الجامعه اذا كنتي بتمشي وين ؟
قال الكلام دا كلو دفعه وحده و ملامح وشو كلها غضب و ضيق ، قلت ليهو زي ما قلت ليك بجاوب حسب الموقف و اسئلتك دي كان تسألني ليها من زمان قبل الموقف الجارح دا ، امبارح لمن كنت عايزا اقول ليك احمد دا منو و علاقتي بيهو شنو مش قلت لي ما بهمك ؟ و هسي خليك كدا ، كل العايزا اقول ليك اني ما خنتك و ما حيجي يوم اخونك فيهو فشيل الفكره الشيطانه دي من بالك ، و فعلا انا ما بمشي الجامعه إلا مرات مرات و عندي سبب قوي و حأقولو ليك لمن يجي الوكت المناسب ، ضرب يدو مع الحيطه و قال لي ما تجننيني يا مها ، احسن ليك تقول كنتي بتعملي في شنو من وراي ؟ اتفكيت منو و طلعت خليتو ، دخلت الحمام و قعدت ابكي ، بكيت بحرقه شديد ، كيف يعنى أنس يشك فيني و انا بعمل كدا عشانو و عشان اختو 💔
بعد ساعه من البكى ، مسحت دموعي و قلت انا السبب انا الخليتو يفكر فيني بالطريقه دي ، لو ما كنت بكذب عليهو ما كان شك فيني ، رغم انو عارف اني كنت بكذب عليهو مع ذلك سكت و اتحمل و كان متأمل اني اجي و احكي ليهو ، أنا الوصلتو للحاله دي 💔
مشيت المطبخ عملت عصير ليمون و جبتو ل"أنس" رغم اني زعلانه منو شديد بس ليهو الحق يزعلك و يعاتبني و لي الحق ازعل من طريقتو دي ، مديت ليهو الكبايه و قلت ليهو أنس والله انا ما حصل خنتك و ما حيحصل ، المسأله مسألة وكت ، بوعدك لمن ننتهي من قضية سجود اوريك كنت بعمل في شنو ، و للوكت داك خلينا نحاول ما نفقد الثقه في بعض ، خلاني بتكلم و طلع كالعاده 💔
بعد الموقف دا علاقتي بيهو بقت متوتره شديد ، و كلامي معاهو بزهجو زيادة و بخليهو يبعد عني . مرة لقيتو قاعد مع عمتي و كانو بتكلمو سوا أول ما وصلتهم سكتو و عمتي كانت بتعاين لي بغيظ و شاماني شديد ، أنس أول ما شافني قام و مشى خلاني ، كنت ماشه ألحقو بس عمتي وقفتني ، جاتني قريب و رفعت لي اصبعها و قالت لي ولدي دا احسن تخطي دربو ، ما بتخجلي هسي تطلعي و تنزل مع الرجال ؟! عشان لقيتي ولدي مسكين و ما سائلك بقيتي تقلي أدبك و بتخونيهو مع الرجال ؟! اصلا من يومي عارفاك ما بتنفعي معاهو ، كاتله جسمك و عامله فيها مسكينه و مظلومه و انتي أعوذ بالله منك ، لو كنت عارفه إنو القروش الأديتيني ليها دي جايباها من عمايلك مع الرجال الما ياهم ما كان شلتها منك ، قلت مدام انا عاقر فأحسن استغل الحاجه دي و اجيب لي منها قروش مش ؟ اقيفي لي بلململ ليك قروشك و بجيبا ليك ما لازماني قروش حرام ...
معقوله الكلام دا لي أنا !! الكلام دا انقال عني أنا ، واصلت كلامها و انا خلاص بقيت ما سامعه شي ، جملتها الآخيرة دي بقت تتردد في مسامعي ، تجيني من منو انا من أنس ولا أمو ؟ يعنى أنس حكى ليها ، كيف يحكي ليها حاجه خاصه بيناتنا ، في وقفتي معاها دي كملت دموعي دي كلها ، اعمل ليها شنو ؟ اضربها كف و احاول اشرح ليها زي ما عملت مع أنس ؟ غطيت وشي بيديني و بقيت أبكي و هي بتسمعني في الكلام الفارغ ما سكتت إلا لمن أنس قال ليها قلتي شنو يا أما ، نزلت يديني و عاينت في اتجاهو ، ملامح وشي ما كانت بتتفسر ، باين عليهو الزهول و الصدمة واضحه في وشي ، بديهيا عرفت إنو سمع كلامها كلو ، قالت ليهو زي ما سمعت يا ولدي و مرتك دي انا تاني ما بغطي ليها ، بخطوات متثاقله اتحرك ناحيتي و هو كأنو منتظر مني رد على كلام أمو القالتو عني ، اكتر من دقيقه و هو بعاين لي ، لمن ما لقى رد عني وصلني و عيوني كلها شرار و من غير أي تردد رفع يدو وضربني ، كأنو غضب الدنيا دا كلو اجتمع في الكف دا ما لقيت نفسي إلا و انا واقعه في الأرض 💔
يتبع.......
