إسكريبت " *أحببتك.. و كأنني سأموت غدا ! "*
المطر كان شديد جدا ، و البرق و الرعد كانوا مرعبين ، *مالِك* في الوقت دهه كان بيذاكر لإنه في كلية الطب ، و بسبب الهواء الشديد شباك أوضته إتفتح و دخل منه هواء عبارة عن تلج ، *مالِك* قام من مكانه و راح عند الشباك عشان يقفله و يتربسه كويس و إتفاجأ بحد واقف تحت العمارة و بيلعب تحت المطر ، *مالِك* بحلق جامد و هو مش مصدق إن ف حد ممكن يستحمل الجو ده ، *مالِك* أخده الفضول لإنه ينزل و يشوف مين الشخص المجنون ده ، و فعلا لبس چاكت و كوفية و نزل و هو بيتكتك من البرد ، و أول ما نزل إكتشف إنها بنت ، كانت فاردة دراعتها و رافعه راسها لفوق و بتلف و هي بتضحك ، البنت مرة واحده نزلت راسها و فتحت عينيها و قلعت الكوتشي بتاعها و شمرت البنطلون شوية و بقت تتنطط و تلف حوالين نفسها في الماية لإنها كانت غزيرة جدا ، البنت كانت مستمتعه جدا بالمطر و فاردة إيديها كإنها عايزة تحضن كل نقطة مطر .. البنت كانت بتصرخ بعفوية و هي فرحانه فرحة طفل عنده 3 سنين فرحان بلعبة جديدهه ، البنت و هي بتلف لاحظت إن ف شخص بيراقبها من بعيد ، ضمت حواجبها باستعجاب و راحت ناحيته و هي سنانها بتخبط في بعض من كتر البرد ، البنت وقفت قدامه و مدت إيدها و قالت و هي مبتسمه برغم إنه باين على ملامحها إنها بدإت تتجمد
سارة : هاااي .. أنا سارة و إنت !؟ ، *مالِك* مد إيده و سلم عليها و هو لسة في حالة صدمة من اللي شايفه
مالِك : مالِك
سارة : واقف بعيد كدهه لي !؟
مالِك : وهي دي عايزة فكاكة !؟ إنتي مش شايفة الجو عامل إزاي !؟ ، سارة نفخت بضيق و قالت
سارة : أوووف لا بقا إنت هتعمل زي ماما ولا إي !؟ متلعبيش فالمطر هتاخدي برد !؟ طب بزمتك .. أنا راضية زمتك إزاي المطر يإذي الإنسان وهو نازل أصلا يغسلة من ذنوبه !؟
مالِك : أراهن على إنك هترقدي في البيت أسبوعين عشان لعبك في الماية ده
سارة : إنت غريب جدا .. أنا بستنى الجو ده والمطر من السنه للسنه أكيد يعني مش هضيع فرحتي بيه خوفا من إني آخد برد ، سارة رجعت كام خطوة لورا و هزت كتافها ورجعت تلعب تحت المطر.، مالِك بص عليها و هز راسه شمال و يمين و هو بيقول في باله إن البنت دي أكيد مجنونه.، مالِك راح ناحية السلم و فجأة عطس جامد.، قام بص على سارة اللي لسة بتلعب تحت المطر و قال
مالِك : بكره هسمع خبرك أكيد ، وسارة من بعيد كانت بتضحك عليه لإنها شافته وهو بيعطس و قالت
سارة : دايما الحاجه اللي بنخاف منها بتبقى أولى بينا من غيرها😂 ، مالِك طلع العمارة .. وسارة ضحكتها إختفت شوية شوية و بدإت الدموع تتجمع في عينيها و بصت للسما و قالت
سارة : يارب .. أنا استنيت كتير و عملت اللي عليا ، بس دلوقتي أنا خايفة .. كل ما أفتكر العملية جسمي كله بيترعش ، يارب أنا مش خايفة من الموت قد خوفي من إني أكون عملت ذنب يمنعني من نعمة النظر ليك يارب ، يارب إغفرلي وسامحني يارب و إجعلني من عبادك الصالحين ، يارب.. يارب كل ذرة تعب تعبتها يكون قصادها مغفرة لذنوب عملتها ما ظهر منها وما بطن يااارب ، سارة نزلت راسها في الأرض و مشيت كام خطوة و بعدين رجعت تاني و هي بتجري و بصت لفوق و قالت
سارة : آااه صحيح شكرا يارب أنا فرحت أوي بالمطر و فرحت أكتر لإنك تقبلت دعائي و نزلت المطر ، سارة قالت كده و جريت على العمارة و طلعت شقتهم ، و فجأة خرج مالِك من ورا عمود كان قريب من الحته اللي كانت سارة واقفه فيها
ـــــــــــــــــــــــــــــــــــــــــــــــــــــــــــــــ
*تاني يوم الصبح*
مالِك قام صلى الفجر و قعد يذاكر و كان بيقرا بصوت عالي
مالِك : قد يبدو الصداع والغثيان والقيء من الأعراض الشائعة والتي قلّما يهتم بخطورتها العديد من الأشخاص أثناء إصابتهم بها. حيث أن هناك إضطرابات أخرى في الجسم قد تأتي مع هذه الأعراض مثل:- الكلام، السمع، الرؤية يمكن أن تكون مؤشرات لمشاكل تتعلّق بالجهاز العصبي ووظائف المخ.
