((((( على الرف ))))))
#لولو_محمد
الحلقه الاولى
فى شقه فى منطقه متوسطه
بنت نايمه جنب ست يتفزعوا على صوت رزع الباب
صوت شاب / اصحوا ... انا جيت
البنت / نموت لو صحينا مره طبيعي نموت
الشاب يدخل الاوضه
الشاب / الفطار يا بشر
الست / صحينا صحينا ايه دخله المطبخ
الشاب / انجزوا ورايا محاضرات يلا
البتت تعدى تروح الحمام و تقفل الباب الشاب يروح يرزعلها على الباب
الشاب / فى السريع يا حجه مش هنكمل نوم جوه بقول ورايا محاضرات لو الساعه جت سبعه و الله انزل و اسيبك و اتمشيها بقي للكليه انتى سامعه
الست تعدى من جنبه
الست/ ربع نشاطك بس
الشاب / نقى على ابنك بقي نقى الا كل الامهات تصحى تدعى لعيالها الا انتى تصحى تنقى عليا
الست / كل الامهات المنبه بيصحيهم الا انا بصحى على صوت جعورتك الا ما بترمى السلام و انت داخل
الشاب / بقوله فى سرى و بعدين انا شايف رغى رغى مفيش فطار
البنت تطلع من الحمام
البنت/ ما توضب انت هو انت اتشليت
الشاب / و الله الحق عليا انا كنت فطرت على العربيه و طلعت من بره بره و اسيبكوا تاكلوا عيش بايت و لا بلاها فطار خالص بلاها فطار
البنت تدخل الاوضه الشاب يروح يرزعلها على الباب
الشاب / نلبس فى السريع واخده بالك مش هنقعد سنتين ننقى الطقم و سنتين نظبط الطرحه زى كل يوم
الست / وله يا مروان تعال سد بقك بلقمتين بدل صداعك ده على الصبح
مروان يجرى على المطبخ ياكل و الست تعمل سندوتشات
مروان / منه لله قاسم امين كان زمانا مجوزينها و خلصنا بلا تعليم بلا قرف
الست / سد بقك ده على الصبح سد انا داخله الحمام
الست تخش الحمام مروان يروح يرزع على باب اوضه البنت
مروان / هنتاخر
البنت تفتح الباب بعنف و غضب مروان يلم نفسه
البنت / ايه ايه انام بطرحتى يعني بعد كدا عشان ترتاح ايه
مروان / انا كنت جاى اسال بس لو عاوزه مخلل مع السندوتشات بس
البنت / مش عاوزه
البنت تدخل تحط الكتب فى الشنطه مروان يروح يقعد على السرير فى ايده ساندوتش
مروان / انا باخد معايا ورقه و قلم بالعافيه انتى ايه اللى بتحشي بيه الشنطه ده و ترجعى كل يومين الشنطه اتقطعت هاتلى واحده يا مروان
البنت تتنهد و تروح تعدل طرحتها
مروان/ اخبار المصروف ايه
البنت / معايا شكرا
مروان / الحمد لله اديني بقي عشرين جنيه قبل ما عمتك تطلع من الحمام
البنت تضحك و تبصله فى المرايه تلاقيه مبتسم تروح المطبخ يروح وراها يعدى على الحمام يرزع على الباب
مروان / نمنا و لا ايه
الست / يا ابن الجزمه
مروان / انا اسف
البنت / ما تهداش الا اما تتشتم
مروان / كلو الا رضا الام يا بنتى
البنت / احنا نازلين يا عمتى سلام
الست / سلام يا نهى
البنت تسبق و مروان يمشي وراها ينزلوا يركبوا عربيه مروان سايق تليفونه يرن
مروان / ست البنات و الباقي عاهات
نهى تبصله بطرف عنيها
مروان / عشر دقايق و هكون تحت ما تلطعنيش زى كل مره و الله امشي
مروان يضحك نهى تبص من الشباك
مروان / سلام يا بيبي سلام
مروان يقفل و يكمل سواقه
نهى / انت بقي ناوى تحكى لامك عن بيبي امتى
مروان / و احكيلها ليه
نهى / ازاى يعني
مروان / انا و مى زمايل بس فككوا بقي من الجو القديم ده مش كل ولد و بنت اتصاحبوا يبقوا لازم يتجوزوا فى الاخر
نهى / انت متاكد انك جاى من صلاه الفجر مش من حته تانيه
مروان / ابقي اركعيها يا اختى قبل ما تنظرى عليا
نهى / بصلى ما لكش انت فيه مش لازم اعمل يعني على كل ركعه هيصه و فيلم و ياللى ما شوفتنيش بصلى انا بصلى اهو
مروان / و مين بقي اللى بيعمل كدا ان شاء الله انا
نهى / انت كل حاجه فى حياتك بتعمل عليها هيصه اصلا دا انت دخولك الحمام الجيران بيبقوا عارفين
مروان / انا الحق عليا انى عاملكوا حس فى البيت انتوا من غيرى ناثينج
نهى / ماشي ماشي
مروان يركن تحت بيت بنت بشعرها و بلوزه على الكمر تركب
مى / هاى بيبي
مروان/ مش اتكلمنا على الطقم ده قبل كدا
مى / سوق يا بيبي سوق خلينا نلحق المحاضره هاى نهى ازيك
نهى / اهلا
مروان يسوق فى صمت
....................
فى كافتريا الكليه
نهى تدخل تلاقى مروان قاعد وسط شله منهم مى تروحلهم
نهى / السلام عليكم
مروان / حماتك بتحبك طالبين اكل
نهى / لا الف هنا انتوا انا المحاضره اتلغت هروح هتعوز حاجه
شاب ١ / ما تقعدى يا بنتى دا قاعده الكافتريا ما تتعوضش
مروان/ انا هاجى اوصلك تعالى
مروان ياخد نهى بعيد
نهى / خليك انت طالب اكل
مروان / انا لسه فاضل ساعتين فراغ على سكشنى هوصلك فى السريع و ارجع
نهى / مش هتلحق الطريق هتلاقيه واقف دلوقت انا هركب اى حاجه و انت لما تخلص بقي
مروان / معاكى فلوس تركبى
نهى / قولتلك الصبح معايا يلا سلام
مروان / طب تعالى اركبك برضه تعالى
مروان و نهى يمشوا و صحابهم متابعينهم
مى / على فكره هو اللى قايلها ما تقعدش معانا
شاب ١ / ليه يعني هناكلها
بنت / هو انت يعني مش عارف دماغه الحمد لله انه سايب مى تقعد وسطينا
مى / دا على اساس انى نهى يعني يقولى اللبس ايه او اقعد مع مين
شاب ٢ / عشان كدا كل يومين تتخانقوا و نقعد نصالحوا على بعض
مروان يرجع
شاب ١/ خدت رقم التاكس و ارتحت
مروان / اه اخدته فيها حاجه
البنت / بس تاكس للمحل عندكوا هياخد مبلغ كنت ركبتها ميكروباص و لا حاجه
مروان بهزار / ايه يا لوزه ما باخدهمش من جيبك
شاب ١ / ما تهدى يا ميرو سمر ما تقصدش هى تقصد انك
مروان / والله فاهم قصدكوا و كلامكوا اللى كل مره تسمعوهونى انت بتديها مصروف ليه مش انت اولى بالفلوس دى واحد غيرك معاشه من ابوه يكفيه و يحوش منه كمان انت قدامك مستقبل لازم تجهزله حفظت والله حفظت مش كل ما تشوفوها تقفلولى اليوم يعني
مى / ما عاش و لا كان يا بيبي اللى يقفلك انا هقوم اشوف دورنا جه و لا لسه تعال معايا
مروان يقوم مع مى
مى / الناس دى صحابك من سنين و عارفينك من قبل ما خالك يموت و بنته تيجي تعيش معاكوا فاهدى عليهم هم بيتكلموا من خوفهم عليك مش اكتر
مروان/ هو المحل اللى بشتغل فيه انا و امى ده محل مين مش ابوها ما حدش بيجبى عليها على فكره
مى / للمره المليون بقولك لو ما كانش خالك مات ما كنتش هتضطر تشتغل طول الليل فى محله اصلا انت باباك ما سبلكش شويه يعني
مروان / بقولك ايه يا بيبي مش كل مره نضيع الخروجه فى البقين دول هاف فن هاه فكيها كدا ببلوزتك دى تمام
مى / على فكره انا لبساها عشان اغيظك و لو ما جيتش الرحله معانا هلبسها لوحدى و انا هناك ايه رايك بقي
مروان / انتى عارفه ان الاسلوب ده ما بيمشيش معايا فاهدى على نفسك كدا
مى / يعني هتطلع و لا لا
مروان / هو انا قولتلك مش هطلع ليه
مى / عشان الفلوس ... اللى سعادتك لسه مركب بيها نونو التاكس بدل ما تركبها ميكروباص
مروان / دورنا جه
مروان يروح يجيب اكياس السندوتشات و يرجع الترابيزه و مى بتنفخ
............
فى محل بقاله
نهى تدخل الست تتفاجئ
الست / الله ايه اللى رجعك بدرى
نهى / المحاضره اتلغت فروحت و قبل ما تسالى مروان لسه ما خلصش و ركبنى تاكس و حاسبه و اخد رقمه تمام ؟
الست / تمام يا اختى بقولك ايه اطلعى غيرى و اتشطفى و علقى على صينيه الفراخ و اتغدى
نهى / تمام
نهى تتمشي شارعين و تعدى الشارع لبيتها تقابل بنت نازله على السلم
البنت / ازيك يا نهى راجعه بدرى خير
نهى / ما شاء الله انتى حافظه مواعيدي
البنت/ الله مش جيران
نهى / اكيد
البنت / انا كنت رايحه عندكوا الدكانه اجيب شويه حاجات هو مروان هناك
نهى / لا مروان لسه فى الكليه خير كنتى عوزاه فى حاجه
البنت/ لا كنت مكسله اروح فلو هو جاى يبقي يجيبهالى عادى يعني
نهى / لو عاوزه انا ممكن اروح اجيبهالك
البنت / لا خلاص مفيش مشكله هتمشي يلا سلام
نهى تبتسم و تطلع الشقه تليفونها يرن
نهى / لسه داخله الشقه
مروان/ طب مش تطمنيني يعني
نهى / معلش والله انا حتى لسه ما غيرتش اهو
مروان / تمام هسيبك بقي ترتاحى
نهى / سلام
نهى تقفل و تدخل جوه
..................
قدام بيت مى
مروان يركن العربيه
مى / الرحله دى مش هيبقالها طعم من غيرك دول اربع ايام بحالهم
مروان باصص قدامه و ساكت
مى / كلم مامتك و انا متاكده انها هتديهملك انا مش فاهمه انت اوفر اوى ما كل اللى فى سنك بياخدوا مصروف من اهلهم انت بقي اللى عامل اندبندنت و نازل شغل و بتصرف على نفسك و ياريتك بتحوش اللى بيتبقي لكن ازاى بتوزعه على بنت خالك مع انها مش محتاجه على فكره انا بجد بقيت بتقفل منها
مروان / هو فى واحده عاقله تكلم صاحبها عن اخته بالطريقه دى الا لو كانت بتطفشه
مى / ما انا مش بوشين يا مروان و انت عارف انى ما بعرفش ادارى اللى جوايا انت اتغيرت من يوم ما البنت دى جت عاشت معاكوا و كل يوم بتتغير اكتر عن اللى قبله دى تقريبا احتلت حياتك كلها
مروان / انتى هبله يا بنتى دى اختى
مى / ماشي ... فكر تانى فى موضوع الرحله انا خلاص دفعت الاشتراك
مروان / هشوف
مى / سلام يا بيبي
مروان يبتسم مى تنزل مروان يتابعها لحد ما تدخل البيت و يمشي
....................
فى شقه مروان
نهى بتطفى على الاكل و تدخل الاوضه تسمع صوت الباب بيتفتح
مروان/ العو جه العو حضر انا جيت اكلكم نفر نفر
نهى تبتسم و تطلع من الاوضه تقابله فى الصاله
مروان / يا روايح الزمن الجميل هفهفى و خودينا للماضى و سحره الخفى قوليلى ان ريحه صينيه البطاطس بالفراخ دى من عندنا و قوليلى قبلها انها استوت عشان انا جعان و ممكن اكلك انتى شخصيا
نهى / ثوانى و اغرفلك
نهى تروح المطبخ و مروان يروح وراها
مروان / سمعتى عن رحله لاقصر و اسوان اللى الجامعه عملاها
نهى / اه سمعت مالها
مروان / طب ايه انتى بتسمعى بس و لا ايه
نهى / المفروض اعمل حاجه تانيه
مروان / تشتركى مثلا
نهى / انت طالع
مروان/ لسه ما قررتش بس الجروب كلو طالع و بيزنوا
نهى / طب ما تطلع
اكبر حته فى الفرخه اهو
مروان / الله تسلم ايدك مفيش شويه رز بقي و لا رغيفين عيش
نهى / ازاى دا انا عامله رز معمر
نهى تطلع صينيه من الفرن و تغرف
مروان / ما تطلعى معايا
نهى / اطلع مع صحابك اللى انت مش بتحبنى اقعد وسطهم
مروان / مش حوار مش بحب بس هم مش جوك هزارهم مش هيعجبك و بعدين هو انتى هتطلعى معاهم انتى هتطلعى معايا انا
نهى / خد حط الطبقين دول على السفره و انا هجيب الباقي و اجى اكل معاك
مروان / تمام
مروان ياخد الرز و يطلع و نهى وراه بالبطاطس و المعالق
مروان / بصي انا محوش مبلغ كدا يعني مش هنكلف ماما اى حاجه تمام
نهى / انا لو هطلع هطلع من معايا معلش يعني انت مش الوحيد اللى بتحوش
مروان / طب نقسم البلد نصين انا هدفع الاشتراك و انتى كفى نفسك هناك ايه رايك بقي
نهى / ماشي
مروان/ يعني هتطلعى
نهى / هسال عمتى لما تيجي و لو وافقت تمام قشطه
مروان / هتوافق هتوافق ما دام سوا هتوافق
مروان يخبط على الترابيزه
مروان / و بعدين مين راجل البيت هنا انا كلمتى هى اللى تمشي
نهى / طب كل كل لو هتنام شويه قبل ما تنزل الدكان ... صحيح ... هو انت مش ناوى تحن على البت شيماء جارتنا و لا هى مى واخده مل وقتك
مروان / و الله نبركوا ده اللى مبوظ الدنيا بينى و بين مى بصراحه كدا الحكايه دى طولت و شكلها هتجيب ناهيه قريب
نهى / بالبساطه دى هتنهى حب سنتين
مروان / ما كانش حب بصي انتى صغيره على الكلام ده مش هتفهميه
نهى / ليه و انت لما عرفتها كنتوا اكبر منى بقد ايه سنه؟ اتنين ؟
مروان / لا هى كانت كدا و لا انا كنت كدا صدقيني انا بقالى فتره طويله اوى بعافر ان العلاقه دى تستمر
نهى / انت من الاول واخدها تسليه بدليل انك لحد دلوقت ما كلمتش عمتى عنها
مروان / عمتك دقه قديمه مش هتفهم و هتقعد بقي تصدعنى فى الرايحه و الجايه انا وقت الجد هقولها اكيد بس لما اكون رتبت امورى و جاهز
نهى / بصراحه انا لو مكانك ما كنتش بدات حاجه لو انا مش جاهزلها
مروان / اولا كنا صغيرين مش هنكر بس صدقيني احنا الاتنين اتغيرنا
نهى / اللى تشوفه بس انا بحاول اتخيل اتعلق بواحد سنتين و فجاه يزهق بحجه اننا اتغيرنا بجد حاجه مش حلوه
مروان / انتى عمرك ما هتكونى مكانها ما تقارنيش نفسك بيها انتى اساسا ما حدش هيعبرك
نهى تاكل و هى ساكته
مروان / و ان حصلت معجزه و فى حد استعوض شبابه و جالك اوعدك اننا هنكروت الحكايه فى يومين تلاته قبل ما يفوق و يغير رايه و يخلع
نهى / اهو اللى بيقعد يتنمر ده بيلبس فى حمار حصاوى فى الاخر
مروان / طب بصي هاتى معلقتين رز كمان و انا مش هتنمر عليكي ابدا
نهى / وعد
مروان / خليهم تلت معالق
نهى تشد الطبق من ايده و تقوم
مروان / و لا شده الشحات مبروك
نهى تتنهد و تدخل المطبخ مروان يمد معلقته و ياخد معلقه من طبقها
...........................
قدام باص الرحله
مى / يعني سبحان الله ما كانش معاك فلوس تطلع لوحدك و فجاه بقي معاك فلوس لنفرين لا و مش بس كدا دا انت كمان ما قولتليش يوم مت دفعت الفلوس انك دفعتلها معاك
مروان / هى هتقعد على حجرك ما تكبرى مخك كدا احنا فى رحله
مى / تمام انا هدخل اركب خليك انت بقي واقف كدا
مروان / احجزيلى
مى / تمام
مى تدخل و يدخل وراها شاب يلاقى جنب نهى فاضي يقعد
مى / اسفه بس دا محجوز
الشاب / اسف افتكرته فاضي عن اذنك
الشاب يقوم و يروح يقعد ورا مى ترجع لنهى
مى / انتى حاجزه الكرسي لمروان
نهى / ايوه
مى / ما تحجزيهوش مروان هيقعد ورا جنبنا لو تحبى تيجي جنبنا قبل ما المكان يتاخد تعالى
نهى / لا انا تمام هنا
مى / براحتك عن اذنك ... مش كنا اتجمعنا على المحطه بدل الهبل ده
مى ترجع و هى بتبرطم و نهى متبعاها تقوم و تسيب شنطتها و تنزل من الباص
مروان / ايه اللى قومك
نهى / هو انت مش قولتلى احجزلك جنبى
مروان / اصل الجروب كله هيقعد ورا و بعدين دا مشوار نص ساعه يعني و الله كنا اتجمعنا فى المحطه مش فاهم مين اللى منظم المخروبه دى
نهى / تمام انا هركب و يا تيجي تقعد يا مش هحجزلك الكرسي ما افضلش اقوم الناس من الكرسي و فى الاخر تسيبني و تقعد ورا
مروان / لا اله الا الله اتفضلى جاى اتفضلى
نهى تركب و مروان جنبها مى تشوفه تعوج بقها و تضايق
بنت / مسيطره مسيطره يعني
مى تقوم و تروحله
مى / ايه يا عم انت هتقعد من اولها قوم اما نلعب خلينا نهاف فن
مروان / قشطه يلا
مروان يقوم مع مى ورا ثوانى و الشاب يرجع يقف جنب نهى
الشاب / انا اسف بس هم زحموا المكان ورا و مفيش كرسي تانى غير ده
نهى / اتفضل
الشاب يقعد
الشاب / على منصور رابعه هندسه مكانيكا انتاج
نهى / اهلا
على / تمام انا اسف
نهى تبص قدامها و على يبص قدامه ثوانى و الباص يتحرك نهى تبص على مروان مديها ضهره و واقف بيلعب مع صحابه تبص من الشباك
........................
فى القطر
الكبينه كنبتين قدام بعض كل كنبه قاعد عليها تلاته و حاطين شنطه فى النص بيلعبوا عليها الشايب شاب يشد من نهى ورقه و يرمى الورقتين و يتبقي مع نهى الشايب
نهى / خسرت
شاب / تروث اور دير
نهى / تروث اسال
الشاب / احكيلنا اول قصه حب فى حياتك
نهى / لما تحصل هبقي احكيلك يلا مين هيفنط
الشاب / ايه الكروته دى انتى خايفه تقولى عشان مروان يعني و لا ايه لا ما ينفعش كدا تاخدى التحدى بقي
مروان / هو عشان قالت لا يبقي اكيد بتكدب
الشاب / ايه يا مارو يعني واحده حلوه زيها و ما فيش حد اعجب بيها خالص و لا عمرها أعجبت بحد دا على اساس ايه
مروان / على اساس تخليك فى حالك يا عم و يلا انا هفنط
مى / صحيح يا بخت اللى يبقي معاها مارو تكسب تخسر ما تتعاقبش
مروان/ خلاص الفيلهم يا بنتى اى حوار ما دام ما حدش مصدقك خلينا نخلص خدوا بالكوا الرحله طويله و احنا لسه فى اولها فاهدوا كدا و خلوا اليوم يعدي خفيف خفيف تمام
نهى تقوم تقف
نهى / انا هقوم امشي رجلى شويه
الشاب / انتى اضايقتي و لا ايه احنا بنهزر
نهى / اكيد انا بس هتمشي شويه بره و هاجى علاطول
مروان / اجى معاكى ؟
نهى / ما لوش داعى خليك انا مش هبعد ... موبايلى فى ايدى تمام
مى /تمام ... فنط يا مروان يلا
مروان يفنط و نهى تخرج بره الكابينه و تتمشي تروح العربيه اللى بعدها تلاقي الطريق مسدود و على واقف بيصلى تقف فى جنب لحد ما يخلص
على / السلام عليكم ورحمة السلام عليكم و رحمة الله ... انا اسف عطلتك اتفضلى
نهى / هو انت متاكد من اتجاه القبله كدا
على / على حسب الابليكايشن ما قالى صليت
نهى / تمام شكرا عن اذنك
نهى تعدى على و تتمشي و هو متابعها و مبتسم مروان يطلع من الكابينه يعديه و يروح وراها
...................
فى البوفيه فى القطر
نهى / ميرندا تفاح اخضر لو متاح لو مفيش يبقي
الوايتر / موجود حضرتك
نهى / ميرسي اوى
مروان يدخل
مروان/ انتى هنا يا بنتى انا قلبت عليكي القطر
نهى / هو انا لحقت
مروان / واحد قهوه تركى مظبوط اللهى تنستر
نهى / قهوه ايه انت ضامن الميه دى جايه منين
مروان / احنا مصريين يا نونو معدتنا تهضم الزلط
على يدخل
على / قهوه تركى مظبوط لو سمحت
مروان/ يا ابنى خاف على صحتك انت عارف الميه دى جايه منين
نهى / بس عيب
على / على منصور ... شوفتك فى الباص
مروان / ايه ده بجد يعني معانا فى الرحله طب هات رقمك انا مروان شاكر اوعى تكون قفشت من هزارى انا كنت بقلش على بنت خالى مش اكتر اصل الحريم دول وسواس نضافه
على / عشان كدا بيعيشوا اطول خد رقمى اهو
كل واحد يدى للتانى موبايله يسجل رقمه الوايتر يدى لمروان قهوته مروان يحاسبه
مروان / حبيبي تسلم ... نستاذن احنا يا علوه لو عوزت اى حاجه اديني رنه بس احنا كدا كدا جايبين لعب و هنسهر الطريق كله
على / تمام هى اصلا مش باينلها نوم
مروان/ نوم ايه فى علبه السردين اللى محشرنا فيها دى هم فكرينا خيل هنام واقفين
على / على قد فلوسنا بقي يا عم
مروان / لاحظ ان كلامك جارح هههههههه
على / والله ما اقصد
مروان/ حبيبي هنخلع احنا بقي و اديك عرفت العنوان سلام
مروان يمشي مع نهى
نهى / هو انت اى حد تشوفه كدا تتصاحبوا
مروان / شكله ابن ناس
نهى / بالشكل يعني
مروان يقف
مروان/ هو ضايقك
نهى / ابدا ابدا والله دا شكله ابن ناس فعلا انا بس مستغربه اسلوبك
مروان / على فكره دى اسمها اجتماعيه سمعتى عنها
نهى / انا مالى اصلا بقولك ايه ما تقفلى ادخل اتوضى و اصلى هنا
مروان/ هنا فين فى الممر
نهى / اه و انا رايحه شوفت على فارش اسكارف و صلى عليه عادى بدل ما استنى اروح و كل دول يتكاوموا عليا
مروان / ايوه بس انتى كدا هتسدى الطريق طب بصي
على يعدى يبتسموا لبعض و نهى و مروان لسه واقفين
مروان / هكلم الرجاله يطلعوا بره الكبينه و انتى صلى بسرعه تمام
نهى / ما تحرجنيش قدامهم يقعدوا يالسوا عليا و الشيخه و البتاع
مروان / يعنى لما تصلى فى الممر هنا القطر كله مش هيالس عليكي
نهى / انا الغلطانه انى طلبت منك حاجه
مروان / خشي يا ستى اتوضي ما تشيلينيش وزرك و صلى مكان ما تحبى و انا هقفلك انجزى
نهى / تمام امسك
نهى تديله الكنزايه و تدخل الحمام و هو واقف على الباب على يطلع هو و تلاته زمايله رايحين البوفيه
مروان / اداقت و لا ايه
على / انضربت واضح ان المايه الملوثه عامله شغل
مروان / والله عظمه و جايه فى وقتها
على / الف هنا عن اذنك
على و صحابه يعدوا نهى تطلع من الحمام تمشي ناحيه الكابينه بتاعتها و مروان وراها
.......................
فى الفندق
مى / انا مبسوطه اوى انهم حطونا فى نفس الاوضه فرصه نقرب من بعض اكتر
نهى / اكيد
مى / صحيح انتى ليه اخترتى عمتك ابتسام و ما روحتيش عند عمتك ايات
نهى / النصيب
مى / ايوه بس عمتك ايات عندها بنت مش كنتى هترتاحى اكتر عن وجودك مع مروان فى بيت واحد
نهى / لما قولتلك النصيب كان قصدى ان بابا الله يرحمه كان ساكن و فاتح محله جنب عمتى ابتسام لكن عمتى أيات عايشه بعيد فكنت هضطر انقل من المدرسه و اتشحطت فى اخر بلاد المسلمين لكن عند عمتو ابتسام حياتى ما اتلخبطتش
مى / طب و مروان
نهى / ماله مروان هو اشتكالك من حاجه
مى / لا بس وجودك معاه فى بيت واحد و أوقات عمتك بتكون فى المحل ما اعتقدش انه وضع مريح ما اعرفش اى حد كان هيتكلم
نهى / انا ما اعرفش غير ان مروان اخويا و طول عمرنا رايحين جايين سوا و متربيين سوا عقد الناس دى ما تخصنيش بقولك ايه انا هدخل اغير فى الحمام خدى راحتك
مى / لا لا لا انا اللى هغير فى الحمام اصلى عاوزه اخد دوش بالمره عشان عرق السفر و كدا تمام
نهى / تمام
مى تروح تاخد غيار و تفتح الكاميره بتاعه موبايلها و تبص على نهى بتفضى شنطتها و مش واخده بالها تعدل الموبايل و تاخد غيارها و تدخل الحمام
........................
أنت تقرأ
على الرف بقلم /لولو_محمد (كامله)
Roman d'amourعلينا ان ندرك قيمه ما نملك قبل ان نفقده فهناك آخرون يتمنون ما نتركه نحن على الرف
