Planet VisiMisi

“Planet Pisimisi”

Oleh: Norhilaliyah

Ada sabuah kisah nah… Diabad ke-21 hiduplah saurang anak nang bangaran Amat, nah si amat nangini bagana baduaan haja lawan nininya, sualnya abah lawan mamanya sudah lawas maninggal pas lagi amat ni halus. Nah amat ngiini ada jua baisi kawan nang akrab banar lawan inya ni matan inya lagi halus sudah bakawan sampai ka ganal, ngaran kawannya ngini ngarannya Udin. Rumah udin ngini palaran jauh pang lawan rumahnya si Amat, tapi ngarannya kawan leh rakat, patuh, biar jauh pasti diganang jua…

Waktu magin balalu, hari baganti minggu, minggu baganti bulan, bulan baganti ka tahun. Kada karasaan ganalan sudah si Amat lawan Udin ni. Bakawan rakat banar, matan SD, SMP, SMA. Sama pulang sakulahnya badua ngintu. Imbah ganalan buahannya nang badua ngini, tapikir ae handak mancari gawian gasan mambiayai kuitan jua, sualnya lalakian ni wajib pang mancari nafkah, lain lawan babinian hukumnya mubah atau boleh haja mancari nafkah.

Nah amat lawan udin ni, kasitu kamari lawan tajungkang tajarungkup dah mancari gawian kada sing dapat-dapatnya haja lagi, napang kangangalihan mancari gawian hibak tarus lowongannya. Han karena cangkal mancari ni akhirnya dapat jua gawian, pas banar jua nang dicari badua, imbah tes sagala macam sakalinya bagawi jua akhirnya. Imbah tahu kaluarga amat lawan udin ni pada dapat gawian, himung banar kaluarga buhannya nang badua ni.

Si Amat lawan si udin ni bagawi di parbintangan, gajihnya ganal ha pulang, karena gawian buhannya nang badua ni bagus, lawan jua sungguh-sungguh. Akhirnya magin katuju bosnya ni pas buhannya ni dibarii tugas tulak ka sabuah palanit, nang bangaran palanit Pisimisi lawan jua bila hakun tulak lawan bagus jua gawiannya ni kaina dibarii gajih nang liwar ganalnya, lawan jua ada bonusnya, nah lalu bulik ae Amat lawan Udin ni karumahnya masing-masing gasan marundingakan kayapa jua gasan tulak ni.

Jadi amat ni karumah bapadah lawan nininya pada handak tulak ka palanit VisiMisi, lalu baucap ae amat ngini lawan nininya, “uu ni, ulun ni ae handak maminta izin lawan pian, handak tulak ka palanit Pisimisi disuruh bos ulun” ujar Amat. Lalu nininya manjawab “umaa ae cu, jauhnya pang ikam maninggalakan nini surangan, kaina kadada lagi nang mancuntani iwak nini (oho.oho..)” ujar nini sambil batuk kuhul-kuhul. Imabah tu pulang jar amat “Ayuha ni ae pian jangan takutan ulun ni pasti baik-baik haja disana, nang panting pian ni maizinakan dulu ulun tulak” Imbah tu pulang nininya manyahut “Hi’ihai dah amun kaya itu, hati-hati tulaknya cuu lah!?”…

Amat sudah dapat izin dari nininya, si Udin gen dapat izin jua dari mama abahnya, lalu akhirnya tulakan ae nang badua ni ka palanit Misipisi. Kaluarga amat lawan udin manangisan karena mangganang buhannya nang badua ni. Lalu tulak ae si Amat lawan udin ni pakai pasawat luar angkasa.

“Umaa leh mat, jauhnya ae lah kita tulakan maninggalakan kampung, rasa nangkaya apakah aku jadinya” ujar udin. “Jangan takutan din ae, kita harus yakin, misi kita ni gen jalas gasan mambantu manusia dipalanit Pisimisi tu” jar Amat. Pas kada lawas sampai ae dah di palanit Pisimisi tu. Uma pas sampai takajut banar amat lawan udin ni, maka bagus banar pamandangan di palanit ngintu. “Heh, dasar baik banarlah bos kita tu maandak kita di palanit nang bagus ngini” ujar udin. Lalu bajalan ae buhannya ni mancari tanpat gasan bagana salama si palanit Pisimisi ngini. Lalu dapat ae dah tampat bagana buahannya ni di ruma urang.

Imbah lawas hanyar tahu Amat lawan Udin ni pada di palanit ngini manusianya katuju banar babuat karusakan, babuat sakahandak inya tu pang mudil parinsip urang disitu tu Aku-aku, ikam-ikam jadi kada tapi ada lagi urang nang paduli lawan nang lain, maka jua ada panjahat nang handak manguasai palanit ngintu. Lalu ae baaksi Amat lawan Udin ni handak maubah pamahaman urang supaya jangan lagi nangkaya itu. Hari baganti hari, macam-macam cubaan lawan rintangan nang dihadapi buhannya ni, disasambati uranglah, bahkan dijahati urang-urang disitu.

“Mat, rasa kada sanggup aku lawas-lawas disini, galau aku disambati urang-urang disini bilang liwarlah padahal kita tu manyuruh gasan kabaikan samunyaan  jua” ujar  udin. “Din jangankan ikam, aku gen marasa kaya itu jua, tapi kayapa am lagi, sudah talanjur kita disini” jar amat manyahuti. “Mun kaya itu, kita bulikan haja dah kabumi, bilang talalu urang disini, manjahati kita, padahal kita tu handak manulungi supaya palanit ni jangan sampai diambil oleh panjahat-panjahat nangitu. Jar udin marista. “Jangan mat ae parcuma kita bulik kita sudah satangah jalan nah kita tu harus bangkit dan bajuang (Move On)”jar amat manasiahati. “Kada, aku kada handak,pokonya isuk aku harus bulik kabumi” jar udin mangaras

Imbah itu udin pun basiap-siap handak bulik kabumi, maninggalakan si Amat, amat ni macam-macam dah marayu udin supaya jangan tulak tapi tatap haja amat ni mangaras. “Mat, maaf banarlah, aku bujuran kada sanggup lagi nah, aku harus bulik” jar udin “Umaae din, kada maraslah ikam lawan aku disini surangan, maka lawas kita basama-sama tarus” ujar amat sambil habang babanyuan matanya. Lalu bapagutan ae buhannya nang badua ni sambil manangisan.

Lalu tatinggal surangan amat ni di palanit ngini kadada lagi bakawan, rasa sadih ae inya, tapi maginnya amat ni basamangat, handak lakas-lakas inya manuntungakan gawian inya tu disitu. Magin hari, magin babagus parkambangan di palanit ngintu, manusianya kada lagi baparinsip Aku-aku, Ikam-ikam. Samunyaan paduli lawan sasama, dan bausaha sakuat tanaga malawan panjahat nang handak manguasai palanit ngintu..

Si Amat ngini ibarat batis dikapala, kapala dibatis kaya lagu peterpan, bilang liwar tu pang usaha si amat ngini. Namun tarnyata berkat usaha dari  amat nang sungguh-sugguh ngini akhirnya amat barhasil mengemban misinya untuk membantu planet Pisimisi dari pemahaman nang kada paduli lawan  urang lain, dan melawan para panjahat nang handak manguasai planet itu.

Amat himung banar bisa salamat dan barhasil malaksanakan misi, inya handak banar dah bulik ka Bumi. Imbah itu sampai dah waktunya Amat ni bulik. Inya bapamitan lawan warga Planet Pisimisi. Warga palanit Pisimisi batarimakasih banar lawan Amat, dan banyak mambarii amat ni hadiah macam-macam. Manangisan samunyaan malapas Amat ni bulik.

Lalu imbah sampai Amat ni ke Bumi, dilihatnya banyak banar nang manyambutnya, tarutama bosnya lawan nininya nang himung kada sakira. “cu, Nini mangganang banar lawan ikam, ikam baik-baik haja kalo?” jar nini.

Tarnyata bosnya Amat ni bujuran manapati janjinya handak handak mambarii gajih nang banyak lawan hadiah nang sapasial gasan Amat bila bahasil, sakalinya hadiahnya amat ni dibiniakan lawan anak bosnya nang bungas, langkar, wan baik pulang. Himung banar amat, ancap ha pulang amat ni hakun, kada manyangka lalu inya. Lalu kawin amat ni dan hidup bahagia… J

Habiiis dah kisahnya, nah kakawanan ading-ading, hikmah nang bisa kita ambil dari kisah nangitu adalah bahwa bila kita bujur-bujur handak manggapai sasuatu, pasti kita tu bsa manggapainya bila bila kita tu konsisten lawan tujuan kita. Nah hikmah gasan kita kakawanan ae, bahwa sabujurannya kita hidup ni baisi Visi dan Misi, makanya ulun mambari ngaran planet Pisimisi, visi kita tu Al-Qur’an dan Hadits, sedangkan Misi kita sesuai lawan firman Allah “Tidak ku ciptakan jin dan manusia kecuali untuk beribadah kepadaku” lawan jua kita tu sudah diberikan titel dah oleh Allah yaitu umat yang terbaik “Kalian adalah umat yang terbaik yang dikeluarkan untuk manusia yang menyeru kepada kema’rufan dan mencegah dari kemungkaran, dan beriman kepada Allah” (QS. Ali Imran: 110) nah tapi syaratnya ya harus menyeru kepada yang ma’ruf dan mencegah dari yang mungkar.

Nah bubuhannya sabujurannya kita tu ada didalam kisah ngini, kita tu wahini bagana di planet bumi, nah kita tu mengemban visi lawan Misi tu. Sakian tarimakasih.