حد بيحكي..أمي لما كانت تيجي تصحيني للفجر كانت تقعد تفوقني مرة واثنين وتلاتة.. واعد اقولها خلاص هقوم .. وارجع أكمل نوم .. وترجع تلح وتصر وتثابر .. لحد ما تصحيني حتى لو قبل الشروق بدقايق.. ومرة أقوم وعشرة لاء..
رغم أني نومي مش تقيل بس كنت دايما "بستتقل" الصحيان للفجر وأحس انه مجهود زيادة مش هيحصل حاجة يعني لو معملتوش..!
في مرة كان صابح عندي امتحان اخر السنة ومكنتش خلصت مراجعة فسهرت جدا لحد ماتعبت وقولت الحق انام ساعة وكدة كدة ماما صاحية هتصحيني للفجر وابقا اكمل مذاكرة وأروح الامتحان ..
نمت.. شوية كدة ولاقيت ماما بتصحيني بتقولي
= محمد ! الساعة "سبعة ونص وخمسة"...
- سبعة ونص وخمسة ايه ؟ الصبح؟ يانهار اسود!
دا الامتحان الساعة ٨؟!!!!
لبست في خمس دقايق بالظبط وبين صوات وعياط مش فاكر غير اني كنت عمال اقولها حراااااام عليكي ضيعتي مستقبلي ...مصحتنيش ليه!!!!!!!!!
وخرجت من البيت جري!
ولان كانت كل الناس راحت امتحانها.. الطرق كانت فاضية جدا وروحت علي ميعاد الامتحان بالظبط.. ومحصلش اَي حاجة .. بس كل اللي فضلت فاكره احساس الخضة والفزع اللي عيشته في التلت ساعة دي لحد ما دخلت اللجنة..!
....
ماما كانت عارفة ان دة هيحصل بس حبت تعلمني درس مهم جدا ولما رجعتلها بعد الامتحان قالتلي .. لو نعرف ان الامتحان اللي بجد هو الدنيا وان المستقبل اللي المفروض نخاف عليه هو الآخرة.. وان عين الغفلة هي النوم عن الفجر والتهاون فيه .. لو نتفزع الفزعة دي في كل مرة اتأخرنا فيها علي الفجر .. كانت كل احوالنا انصلحت.. كنّا نجحنا في كل الامتحانات..!
...
اهتموا بصلاة الفجر يا جماعة.. وعلموا اولادكم ان الاستيقاظ لصلاة الفجر اهم آلاف المرات من الاستيقاظ للمدرسة.. ان الاستيقاظ لصلاة الفجر هو استيقاظ الأمة من غفلتها.. عَظِّموا الصلاة في قلبوهم وفهموهم ان ضياعها اثقل بكتير من ضياع اَي امتحان..
#علمتني_امي❤️
-
أنت تقرأ
إلى الجنة❤️
Non-Fictionغرقت في حب ربي ... وما كان في غرقي إلا نجاتي ...❤️ . . . وما كان الحب إلا بالأفعال...!..فلا يكفي قولكِ أُحِبُ ربي وانتِ لا تمتثلين لأوامره واجتناب نواهيه ... . اللهم ارزقنا حبك وحب من يحبك ❤️
