نسمة هوى

البارت الاول

# نسمة هوى
#قصة قصيرة واقعية
هلهولة هزت القسم...احنة وحدة باوعت للثانية وابتسمنا...
اكيد وحدة انخطبت حجيت مبتسمة
جاوبتني منتهى...شنو واحنة ماندري
_هسة تجي اسماءونعرف كل الاخبار...
انتبهت لام احمد هزت راسه تباوعلي بحزن...
استغربت نظرتها بس مالحكت اسألها عن السبب...
لان بنفس اللحظة دخلت اسماء وعطرها يسبقها وضحكتها تسمع القسم وهية تجاوب البنات الي دخلوا وياهة...
انتبهت لها كاشخة ومكياج صارخ وبيدها سلة جكليت...
منتهى...ها ولج شو اليوم عبالك عروسة طالعة
_هية عروسة ...جاوبت بنية وياهة
_على اساس ماتدرن...حجت بنية ثانية
منتهى باوعت علية ورجعت باوعت لاسماء
_شنو نعرف
مدت اسماء سلة الجكليت والضحكة مافاركت حلكها
_انخطبت
منتهى مدت ايدها تاخذ من الجكليت
_اها الف مبروك واحنة اخر من يعلم
_صارت بعد
رجعت قدمت السلة لام احمد واخر شي اني الي جنت مصدومة
معقولة صديقتي واعز من اختي تنخطب واني مااعرف بس تداركت نفسي وتقدمت ابوسها
_الف مبروك حبيبتي ربي يسعدج
منتهى...منو تعيس الحظ...اقصد سعيد الحظ
منتهى نعرف طريقة شقاها
_احمد
وكفت ايدي الي جنت مادتها حتى اخذ جكليت...
باوعت بوجه اسماء ابلاهة
ومنتهى راسا سالت
_يا احمد
_شبيج منتهى مهندس احمد الي بالقسم الفني..
ايدي بقت معلكة بالهوى ونظرتي مركزة بوجه اسماء...
والاسم يتكرر على اذني بشكل صدى صوت
_شبيج حوراء ماتاخذين جكليت
جانت نظرتها تتحداني اكول  شي
اخذت جكليتة...
ورجعت كعدت بمكاني واني احس رجلية ماتشيلني
صفنت كدام ورغم هوسة البنات حولي وهنة يسألنها شلون تمت الخطبة وشجاب لها نيشان وووو
جنت احس الاصوات حولي طنين يصاعد ويضاعف شوية شوية...
سمعت صوت ام احمد اتكولي
_حوراء روحي لشعبة السجلات جيبلي الامانات
باوعتلها بنظرة امتنان وهية هزت راسها....
طلعت واني مااعرف وين اروح...
بس مشيت واخذتني رجلية للحديقة الي ورة قسمنا..
كعدت على اول دجة لاكتني واني اباوع بالفراغ واخذتني الذكريات

_احبج
كلمة هزت كياني وخلت كلاص الجاي الي بيدي يهتز...
همسها قريب اذني...
حسيت النار كامت تطلع من وجهي ردت ارفع وجهي له ماكدرت ماعرف شكد مر وقت بس اذكر من رفعت وجهي لكيته ماموجود ...
دورت عيوني بالغرفة ماكو...
ورجعت انتبهت خاف اكو وحدة من البنات همزين ماجان اكو احد..
رجعت لمكتبي كعدت واحس جسمي كله يرجف...
هسة اني شبية كلها كلمة كالها...
زين وين راح خاف هذا عقلي صوريلي هالشي...
لا لا ...مليانة الغرفة بعطره...
اخذتني الصفنة ماحسيت من فاتت اسماء للغرفة ...
رمشت عيني من اشرت بيدها كدام وجهي
_شبيج الي واخذ عقلج
_مابية
جرت الكرسي مال مكتبها وقربته مني ...
_شنو مابيج شي...شايفة وجهج شلون صاير طماطاية...
وبعدين حجيت وياج ماجاوبتيني..
بقيت باوع لكدام...
_احمد
_شبيه
_مااعرف
_اهوووو....شنو السالفة اجر الحجي منج جر
كامت متذمرة مني
جريت ايدها...
_ولج اعترفلي اخيرا
_لا بربج صدك تحجين
رجعت جرت الكرسي وكعدت ...
بس بنفس اللحظة دخلت ام احمد
مرة جبيرة بالخمسينات مسؤولة شعبتنا وكلش شديدة ويانة بالشغل...
بس بنفس الوقت حنونة وعدها وجهة نظر بالبشر..
وجان وياهة منتهى الموظفة الرابعة...
باعت علينا ام احمد
_يلا  تريكن وراجن شغل
كم كلمة خلتنا نكمز من مكانة ...
احنة شعبة بقسم الحسابات ...
اربعة وية ام احمد...
اني واسماء صديقتي ومنتهى وام احمد
اسماء تعرفت عليها قبل سنتين من تعينت هنا هية اكبر مني بسنة..
والي جذبني لها عكسي تماما
شكد ما اني هادئة ومااحب احجي هواي ولا اعرف اشاقة..
هي حركة وتتشاقة وتحب تحجي ومصادقة اكثر من نص موظفات الدائرة...
وقوت صداقتنا من جانت ادافع عني...مرات يصير التباسات بالشغل واكو لسانهن طويل راسا ينهدن بالواحد
اني جنت اظل صافنة بوجهم ماعرف شنو اجاوب...
فجانت هية توكف وتردهم...
وبمرور الوقت صارت تحجيلي عن حياتها واني هم دخلتها حياتي وبدت حتى زيارات للبيت تجي ونطلع سوة من نريد نشتري ملابس...