نسمة هوى

البارت الاخير

#نسمة هوى
بيوم الخطبة جاب وياه سيد حتى نعقد وجان جايب مشية سدت الشارع....
واي شي طلب منه ابوية وافق عليه...
بس جان عنده طلب الزواج يتم خلال اسبوعين
لان كلشي محضر هو...
بيومها لبست فستان طويل مفصل على الجسم جويتي وفتحت شعري ومكياج خفيف...
اني اصلا سمرة فاتح بس عندي عيون كبار وجاحظة
وشعري لحد كتفي مااحب اطوله وماغيرت لونه بقيته اسود...
هو من اهله اجن اخواته وامه وخالاته...
وطبعا رغم هية خطبة بس عزمت ام احمد ومنتهى.
واتفقنا مانسوي اي حفلة لان  العرس قريب...
تمت الخطبة واني بغير عالم جان سؤال يدور ابالي
الي سويته صح لو غلط...
ام احمد كالت باجر لا جيبين شي...
لبست كوستم بنطرون وسترة اسود وتحته قميص وردي ورتبت وياه شال...
طبعا بيوم الخطبة فات عماد لبسني حلقات همة جابوهن
وكال الذهب انطيج فلوس اطلعي اشتري الي يعجبج
جان حجته اخواته صعبة جيتهن...
رحت لابسة الحلقة وتلكتني منتهى تهلل
وبنات القسم اجو يباركون وبعيونهم تسأل ومن عرفن عماد...تفاجان...
وبيهن حجنها بوجهي شلون كدرتي اتجيبينه للدرب
خوب اسماء اباوع عليها من بعيد تريد اطك
ولحد الان ماعرف ليش هيج اتسوي
احمد واخذته وراح يزوجون ...رغم صار اربع اشهر
وهو جاهز بس سمعت هو هواي يأجل بالزواج

خلص اليوم بالتبريك والتهنئة...وقبل نهاية الدوام
تفاجأت باحمد اجى ...جان عيونه بكصته...
ومالازم نفسه كدام ام احمد حجى
_مو اتكولين مالي علاقة بيه
يعني ماجذبوا من كالوا عنده شي وياج
اني ظليت صافنة بوجه...ماعرف اجاوب
نقذتني ام احمد من جاوبت...
_احمد عيب هالحجي...
انتة اختاريت طريقك عوفها تختار طريقها
_مو لمتيني من خطبت وكلتي ماعدها شي
_واني على حجايتي...والمسالة تمت قبل اسبوع
شتريد هسة
راد يحجي بس دخلت اسماء واول مرة تسويها بعد المشكلة...
_احمد رايدتك بشغلة
باوع عليها صفح وعافها وطلع...
بيومها حسيتها كلش انحرجت...
جان موقف ورة موقف اعرف احمد شخصيته مهزوزة ومايعرف شيريد...
وثبتلي هو ياخذ قراراته بلحظة عصبية...
اجى عماد ثاني يوم للدائرة...
هالمرة اجى مباشرة كعد بصفي...
اني انحرجت ماصايرة وجنت قريبة من شخص لهدرجة
_شلونج
_الحمد لله
_اليوم ارجعج للبيت لا ترجعين بالخط...
حتى انطيج فلوس الذهب والملابس
_على راحتك
_حوراء تدرين فرحتي مابيعها لاحد مقابل كنوز العالم
تبسمت بوجه...
_احلم باليوم ننجمع ابيت واحد حتى اعرف شنو ورة  هالبرود الي تتصرفين بيه
ماعرفت اجاوبه...
ثاني يوم الخطوبة اخذت اجازة زواج وعماد كال راح اقدملج نقل...
بيومها رحت ودعت بنات القسم...
اسماء جانت كاعدة وتباوع علية نظرة ماعرفت افسرها
من ردت اطلع لحكتني
_حوراء...سامحيني لا تشيلين علية
التفت عليها...ماكدرت اكولها سامحتج..لان طعنتها جانت اكبر من طاقة تحملي...وخلتني اشك بكل نيات العالم حولي
_الله المسامح
والغريب قبل نهاية الدوام شفت احمد اجى وكف كبال ميزي...
جنت وحدي بالغرفة...
_هيج جنت مااسوى عندج لا سألتي ولا كلتي ليش هيج سويت...ولا عاتبتي
وكفت وشلت جنطتي...
_مو كلشي يسوة العتب
عفته وطلعت...قبل جنت احترك مية مرة واني اكول ليش ...هسة رغم ماانكر واكول كدرت انساه...
بس اقتنعت احمد مو الرجال المناسب الي أمن على نفسي وياه