السلام عليكم
اولاً رمضان كريم عليكم الله يعوده بالصحة والعافية ويتقبل صيامكم واعمالكم❤
صراحة منين ابدي مو عارفة, انتم مجانين ابد مو معقولين يعني ما توقعت كل هذا تراني مجرد بنية عادية حتى ما شايفينهة ولا تعرفونهة شلون قدرتو تحبوني وتتمنولي الخير وتنتظروني كل هالوقت, يعني مرت سنة ونص ؟!!!!
يا ريت الرسائل بالصفحة بين فترة وفترة لا الا كل يوم رسالة او رسالتين, والله عجيبين انتم واحسني عاجزة اردلكم هذا الحب
حرفياً اتمنى لو اني عرفتكم وعرفتوني بغير ظروف كان بقينا على تواصل وحتى خليتكم تعرفون زينب الحقيقية بس الطريقة الي تعرفوني بيهة خلت الموضوع يكون مستحيل
اعرف انو اغلبكم تحبوني وتتمنولي الخير وما ممكن تضروني بس ما ننكر اكو نفوس ضعيفة كل همهة تأذي ناس غيرهة بدون اي ضمير فلو عرفتوني بالحقيقة هواي راح انضر من هالاشخاص وحتى ممكن تتدمر حياتي
انا بنية مسلمة ومن منطقة متحفظة وعائلة متحفظة يعني لو انعرف شنو كنت اكتب ما اريد اتخيل حتى شنو راح يصير.
بالنسبة لحياتي الحمدلله الامور تجري نحو الافضل, من كنت اكتب هنا كنت بنت جامعية وهسة انا اشتغل وهوااااي تغيرت اكثر مما تتوقعون.
بالنسبة الي صرت نسخة افضل بملايين المرات من زينب ذاك الوقت وافضلها اني التزمت بعلاقتي مع ربي والحمدلله
بس لا تفرحون بعدني لا حبيت ولا اتزوجت😂😂
بعدة سعيد الحظ ما شرف بحياتي
هسة نجي ليش انا تأخرت كل هالفترة, ما راح اكذب واقول اني طول هالوقت ما فتحت الواتباد, في البداية اول ما حذفتة كانت كل فترة تجي اختي تقولي انو لقت الرواية منشورة بالتيك توك
وكنت حيل معصبة ومقهورة واشعر بحقد كبير للواتباد ولهالاشخاص الي ينشرون بدون اي ظمير فكنت ما اتجرأ افتح الوات واشوف شكثر الرواية منشورة
لهذا بقيت فترة طويلة ما فاتحتة بعدين ضليت افتحة بين كل فترة وصح اشوف رسايلكم واقراهة بس هواي اشوف اشخاص يتكلمون انو الرواية منشورة سواء بالواتباد او بالتغرام او التيك توك وغيرة
وحيل انقهرت وعصبت, ما توقعت يرحون ينشرونهة بغير برامج ما عندي اي سيطرة عليهن يعني احذف الي بالوات انزين والي بغير برامج ؟
غير الي اشوفهم بكل وقاحة بحسابي كلمن تقول للثانية تعاي ادزهة الك !
وكنت كل مرة تنسد نفسي واطلع من الوات بدون ما اقول شي وما ارجع الا ورة فترة طويلة والقى الوضع نفسة
هالمرة دخلت وسيطرت على نفسي ودزيت شي وانا آسفة جداً من كل الي يحبوني وكانو ينتظرون شي مني
اما بالنسبة للنماذج الي نشرت الرواية بأي مكان كان او الي دزتهة لوحدة ثانية فما اقول غير حسبي الله ونعم الوكيل عليكم, ذنوبكم راح تكون اضعاف لأن هم سارقين وهم تنشرون شي يجيب الذنوب لصاحبه الي تاب ورجع لربه
وما راح اسامحكم ولا ابري الذمة لأي واحد او وحدة نشرتهة او حتى الي حولوهة ستريت بدون اذني وانا لازلت ما قابلة
وهواي اعتذر من الي يحبوني وكانوا ينتظروني واتمنالكم من كل قلبي حياة مليئة بالتوفيق والسعادة.
مع انو مرت سنة ونص بس احسني ما عندي سوالف, بس اليوم ما احسني بخير احسني مكتئبة حتى خلصت اليوم بالفراش بدون ما اسوي شي😔
بس باقي ايامي الحمدلله دائماً اكون متفائلة ونشطة بس تجيني ايام احس بكآبة وخمول وكسل بدون ما اعرف السبب ومع الاسف اليوم منهن
بالنسبة لbts بعدني احبهم واتابعهم بس مو بهوس مثل قبل كنت مخلصة حياتي عليهم
وبالنسبة لتايكوك وبعد سنة ونص ولازلت مو قادرة اوقف احبهم الشي خارج عن ارادتي بس اهم شي ابتعدت عن الحرام قدر المستطاع واتمنالكم المثل
كونوا بخير دائماً وتفائلوا واسعدوا نفسكم بنفسكم ولا تنتظرون السعادة تجيكم من احد, حبوا الآخرين
وكونوا علاقات وكونوا لطيفين معاهم بس صدقوني الشي الي تعلمته بهالفترة هو انو محد قادر على اسعادك ولا اكو سند الك اقوى من نفسك
حب النفس والاعتماد عليها هو الاساس الي ما راح نقدر نسعد غيرنة اصلاً بدونة, ما اعرف اذا وصلتلكم الفكرة او لا بس انا بالنسبة الي اكتشفت انو عيش حياة سعيدة ولطيفة يحتاج حب النفس والاكتفاء بيها وتطويرها راح تلقون كل شي يصير افضل بحياتكم وتكون ردودكم للمواقف والاشياء بالحياة افضل
كل شي ينبع من داخلكم فاتمنى تعطون وقت كبير لانفسكم حتى تطورونها وتتراضون وياهة وتوصلون لحالة من السلام
كعادتي ما افوت جريدة بدون ما اتفلسف واتمنى تتقبلونهة من اختكم زينب
شكراً لكل حبكم وانتظاركم ودمتم بأمان الله وحفظه❤
