أهلاً انا ثعلب! بسوي فيها غامض عليكم مابقول لكم أسمي عشان ارتاح بالكلام، طفيليات اسولف لكم اشياء لطيفة مابي انساها
-
قبل سنوات ما أذكرها بيوم رمضان ما أذكره اولالصبح الهواء بارد و شمس خفيفة كنا نايمين بالحوش كلنا جنب بعض رويت شجرة الخوخ الي زرعتها مع ابوي و رحت مشرق لحالي مسوي فيها كشافة وكذا كنت احب اقلد الكرتون
حمرت الشمس و كان معاي عشير الطفولة واحنى راجعين لقينا كلب أشهب معه شي سنتين واحنى ندفدف بعض منو يروح يشوف ايش مع الكلب و انا الي تشجعت وقربت قلت اذا اذكرها "معاه عصاة، نرجع قبل العصر" قرب العشير و قال معاه اصبع
مسكت كتوفه و صرخت اخوفه و كلنا رحنا نركض خايفين من بعض
على العصر دخلنا مع كم واحد ما اذكرهم نلعب ببيت باقي سمنت للأن بس كان بارد فيه كومة علف بأحد الغرف مدري ايش ابليسنا الي قال اقفزوا من فوق العلف!؟ ملابسنا صارت تقرص من العلف و أمي ما قصرت يطول بعمرها بعد ما شافتني
تروشت وعطتني صحن محشي أعطيه لجدتي و نبهتني ما اكل منه بنص الطريق أكلت حبة كاملة و مسحت فمي بسرعة ولا اشوف العشير قدامي و معه صحن
على المغرب ياكثر صحون تحدر لبيت جداني
ما اذكر متى سألت جدتي بس كلمناها عن الأصبع و قالت ان بالديرة الي جنبنا متذابحين اخوان وبدت تخوفنا
ما اذكر كثير منها بس يمكن اكثر كذا هرج لكم
