တင်းလွန်းတဲ့ကြိုးတွေက ပြတ်ထွက်တတ်သတဲ့လေ။
ဒါက မှန်ကောင်းမှန်ပါလိမ့်မယ်။
ဂျုံဆောင်းကိုယ်တိုင်ကြုံဖူးခဲ့ရတာမို့ အဲဒါဟာမှန်တယ်လို့ပဲပြောရမှာလား။
တင်းလွန်းတဲ့ကြိုးတွေကပြတ်ထွက်တတ်တယ်။
ဒါဆိုရင်...
ပြတ်ထွက်သွားတဲ့ကြိုးရဲ့အလွန်မှာရော ဘာရှိတတ်ပါသလဲ?
••••
"ထမင်းမှန်မှန် စားနော် ဂျုံဂျုံ ကိုကိုက မင်းဆီနောက်အပတ်လာမှာ "
လေလှိုင်းမှတစ်ဆင့်ကြားရတဲ့ အသံသြသြက ဂျုံဆောင်းရင်ကိုမီးစနဲ့ထိုးနှက်နေသလို။
"ဟယ်လို ကိုကိုပြောတာကြားရဲ့လား။မင်းဆီနောက်အပတ်လာခဲ့မှာလို့ "
မဖြေမချင်း ဆက်တိုက်ပြောနေမှာသိတာမို့ ဂျုံဆောင်းမကျေမနပ်ဖြစ်မိသော်လည်း တတ်နိုင်တာမရှိ။
"ကြားပါတယ် ဒါပဲမလား ချတော့မယ် "
"ဟင် နေဦးလေ မင်း.... "
တစ်ဖက်မှစကားသံကိုဆုံးအောင်နားမထောင်ပဲ ဂျုံဆောင်းဖုန်းချပစ်လိုက်သည်။
ဒီအခြေအနေကိုစိတ်ပျက်လွန်းလို့ ဘာလုပ်လို့ဘာကိုင်ရမှန်းပင်မသိ။
ကိုကို့ကိုအားနာပေမဲ့ ဂျုံဆောင်းကိုယ်တိုင်ကိုကဘာဖြစ်နေမှန်းမသိ။
တကယ်ဆို ကိုကိုက သူနဲ့၄နှစ်တိုင်တိုင်တွဲလာခဲ့တဲ့ လူကောင်းတစ်ယောက်။
ကနေဒါကို ဘွဲ့လွန်အတွက်သွားချင်တယ်ပြောတော့လည်း တစ်ချက်မှအထွန့်မတက်ပဲ လိုက်လျောပေးခဲ့တာ။
အဲဒီလောက်ကောင်းပေးနေတာကို ဂျုံဆောင်းကိုယ်တိုင်ကိုကဘာဖြစ်နေမှန်းမသိ။
အသစ်တွေ့နေလို့လားဆိုရအောင်လည်း မဟုတ်။
သူ့ပတ်ဝန်းကျင်မှာက အဲသလိုကိစ္စတွေအတွက်ပတ်သက်စရာမရှိ။
အကုန် စာမှစာဖြစ်နေကြသူတွေချည်း။
သူကိုယ်တိုင်ကိုက ကိုကို့ဆီမှာမပျော်နိုင်တော့တာ။
အားနာမိပါသော်လည်း ဂျုံဆောင်းကိုကို့ဆီကထွက်ပြေးချင်နေပြီဖြစ်သည်။
ကိုကို့အပေါ်အားနာတဲ့စိတ်ကကြီးထွားလာတာမို့ ဒီဆက်ဆံရေးကိုဂျုံဆောင်းခပ်မြန်မြန်အဆုံးသတ်ချင်ပြီ။
