عالم ترابيزة
الي بيتقدم شوربة
وزعوا معالق وادوك شوكة
(١)
الكل اخد زيي اكيد! مش التوزيع غلط يعني
بس ازاي بيستعملوه كدا وعارفين
الموضوع سهل يعني! اكيد انا الي مش عارف
اكيد شويه وهعرف الطريقه
(٢)
ابتديت اعرف اني مختلف
ايه دا!
انا شوكة! طب هحاول اشكلها معلقه من غير ما حد يلاحظ
اهلا يا جماعه انا زيكوا اهو
محدش سال ،طيب ماشي
مش عارف ،مش نافع
لا انا منكوا ولا شبهكوا
لا عارف اكون زيكوا أو افهمني وافهم اختلافي
اكيد انا بهلوس وكلنا واحد ،انا بس فاشل ومش عايز اعترف بفشلي
اعذار
طب يمكن الي قدامهم دا مش شوربه!
اصلا مش جعان عادي يعني
انا جعان اوي ،اسكت شويه انت مش المحور
ما تاكل عادي زينا وخلاص فيها ايه
كلنا اول مره بردو ناكل بمعلقه والشوربة سخنه والموضوع مش سهل هتتعود بالوقت بس مفيش حاجه هتبقي سهله
(٣)
لكن ابص حوليا الاقي الي جنبي معاه معلقه والناحيه التانيه والي هناك
حلوه الشوربة؟
اقولهم اني شوكة ولا اني مش عارف اكون معلقه
اه حلوه الشوربة
انا ..انا مَدُقتهاش مش عارف
(٤)
الكل ملاحظ الاختلاف لكن بيعيبوا فيك
بس عين تيجي علي الشوكة لمره ،مش الطبق الي شبه طبقه أو وشك وانت محتار
لكن الشوكة
انت معاك شوكة!!
صعب عليك تاكل اكيد
انت مش زينا
انا مش زيكوا ،ايوه ايوه
انا ايه؟ انا الوحيد؟ هو عشان كدا؟!
(٥)
التقبل
صعب ان تتأكد
صدمه عصبيه تدخلك في اكتأب
لكن بتفسر كل حاجه
بتفسر ليه صعب عليك تشرب الشوربة
(٦)
عرفنا ،بس مفهمناش
طب لو انا مش معلقه وطلعت شوكة دي تطلع ايه بقي
وينفع اكل بيها شوربة والا انا علي الترابيزة الغلط
استسلام
مش عارف اكون هنا ،عايز اروح علي الترابيزة بتاعتي
ولسه الكل شايفينك زيهم
والي عارف اني معايا شوكة مصمم اني ابقي زيه
بيساعدني ،عايزني اكل
(٧)
هعرفني واحده بواحده
بس محرج اني اقول اني لسه بعرفني لاول مره
واني اعرف الي حواليا ان لازم يفهموا اني مش زيهم وهما كمان يعرفوني ويساعدوني اعرفني
خلاص دا انت متخلف جدا! ،بس بقي
(٨)
انا مين، كان نفسي نصيبي يبقي معلقه
مقولتش مش هعاني ،بس يمكن أتفهم
عارف اني مش هتفهم بردو وهيتقالي كلنا كدا
وهيتقالي بردو اتغير
بس انا بحبني كدا ،حبتني كدا!
(٩)
هوصلي وبكل خطوه هقربلي
وهثبتلي اني مش هتخلي عني لاختلافي وهتفهمني
هجيلكوا جاهز عرفت اكون زيكوا وعرفت فين أختلاقي
ولاختلافي وصلت لحقيقتي غير كتير منكوا ،النمطي مش بيسأل انا مين وكمان يدور
زي الي داخل دين جديد ،دينك ،يعرف عنه اكتر منك
عشان هو الدخيل وانت النمطي
(١٠)
اهتم هتعرف ،افضل حاول هتوصل
طلع في حجات تانيه بتتقدم غير الشوربة
طلع في حجات للشوكة وبس وحجات الشوكة فيها غير المعلقه
وطلع ليك مكان وفي حواليك زيك معاهم شوك وغيركم سكاكين وغيركم ادوات متعرفش عنها ولكل واحد مكانه وأكلته والي شبهه ،بس ياتري كام منهم يعرف أنه مختلف!
اكيد يعرفوا ،بس وصلوا لبدايه الطريق ولا لسه ماشيين في سكه مش سكتهم!
المعالق اتوزعت علي الاغلبيه ورغم اختلاف أشكالها هي كمان إلا أن في غيرها مش متعرف عليه!
.
انت اخدت ايه؟
