العهد

الفصل الاول

..انا ملك بنت وحيده وفي سنه رابعه طب بشري والأولى ع الدفعه 3 سنين ونفسي جدا أحقق حلمي واكون اشهر دكتوره في العالم  كنت عايشه مع جدي وجدتي بس توفهم الله من 5 شهور في حادثه غريبه ودلوقتي البيت بقا فاضي عليا بنزل الجامعه واطلع منها ع الشغل وبرجع انام من كتر التعب بس في يوم خلصت الجامعه متأخر واستأذنت من مدير الشغل إني مش هاجي انهارده وروحت البيت وفي طريقي اشتريت علاج لاني كنت حاسه بتعب ودوخه شويه

المهم عملت ليا اكل وخدت العلاج وقولت ادخل ارتاح شويه لحد هنا والأمور كلها كانت تمام .

اول ما دخلت الاوضه النور قطع قولت عادي بس الغريب أنه قطع في البيت بتاعنا بس مركزتش كتير وخدت  الكشاف بتاع الموبايل و حاولت اشوف المشكله فين وقتها لقيت كل حاجه تمام بلف بضهري شوفت حد في وشي وبيعمل أصوات غريبه  تلقائي عملت الكشاف ناحيته ومن كتر الرعب حصلي اغماء لما فوقت كنت  علي السرير وبقيت مستغربه ازاي وصلت هنا ممكن اكون من كتر  التعب كنت بخرف حاولت اخرج اي افكار سلبيه من دماغي وكمان بصراحه كنت عايزه انسي المنظر اللي شوفته ببص ع الساعه لقيتها 3 و كان خلاص ع الفجر  قولت هقوم اصلي وأبعد الأفكار ديه  عن دماغي .

وانا قايمه رجلي لمست حاجه غريبه ع الارض ايه دا
دا دا دم دم مين دا الاوضه كلها غرقانه دم وكأنه في جرائم قتل حصلت في الاوضه فضلت فتره  أصرخ ومش مستوعبه اللي بيحصل  وحاولت أخرج من الاوضه بس وقعت ع وشي وكله بقا دم.

في اللحظه ديه كنت زي المجانين و عندي حاله هستريه حاولت أوصل لباب الاوضه بأي طريقه مش قادره جسمي بقا مشلول  مش عارفه اتحرك ولقيت  حد ماسكه رجلي وبيسحب  فيا وعايز ياخدني لتحت السرير صوتي مش بيطلع عايزه أصرخ مش عارفه ببص ورايا  تاني عشان اشوف مين اللي بيسحب فيا لقيت تحت السرير مكان عامل زي الكهف ولونه احمر وكان في نار شغاله تحت والايد ديه طلعت ايد واحده ست مش شايفه شكلها شعرها مغطي ع وشها اللي نجدني في الوقت دا أذان الفجر مع الأذان كل حاجه رجعت لطبيعتها الاوضه صوتي جسمي اتفك المكان اللي كان تحت السرير اختفي اول ما دا حصل.

انا طلعت اجري من الاوضه وفتحت باب الشقه ونزلت جري ع جاره لينا بتعتبرني زي بنتها حكيت ليها ع اللي حصل قالتلي أن دا بس عشان تعبانه وجسمي سخن وممكن التخاريف ديه تحصل وحالتي النفسيه من ساعه وفاه جدي وجدتي مش كويسه والاقعده لوحدي ممكن توصلني للتفكير والتخيالات ديه اقتنعت بكلامها وقولتلها هنام عندك انهارده عشان خايفه اطلع فوق دلوقتي

تاني يوم طلعت الشقه بصراحه اول ما دخلت كنت خايفه حاسه إني اللي حصل دا مش خيال ابدا فضلت اقرأ قرآن واشجع نفسي لحد ما لبست ونزلت الجامعه .

وهناك شوفت واحده صحبتي اسمها شهد هي الوحيدة اللي وقفت جمبي في محنتي وكانت داعم ليا  في حياتي  
::- شهد : مالك يا ملك طول اليوم قلقانه ووشك مشحوب وكانك تعبانه
::-ملك: لا ابدا انا كويسه مفيش حاجه دور برد كان عندي امبارح ممكن هو اللي  عامل فيا كدا
::-شهد: طب تعالي نروح الكافتيريا ناكل ونشرب حاجه اكيد في علاج هتاخديه
::-ملك : تمام يلا بينا.

بدأت انا وشهد نطلب الاكل والغريبه أنه لاول مره مش عايزه اكل وشايفه الاكل كله دم ببص ناحيه باب الحمام بتاع الكافتيريا لقيتوا اتحول لمكان شبه مهجور وشوفت الست اللي كانت ماسكه رجلي امبارح واقفه هناك و فجاءه الست ديه بقيت في وشي والمكان اتغير وكاني أقعده في اوضه حمراء وحواليا ناس بتخبط في حاجه لقيتها بتقولي.

هما اللي خلفوا العهد وانتي اللي هتتحملي النتيجه روحك هتكون لينا الليله صوتها كان مرعب شكل عينيها كانت بيضاء وكأنها بتنزل دم منهم   أيدها بقيت حوالين رقبتي وضوافرها كانت عبارة عن سكاكين بتدخل فيها وفجاءه لقيت أيد بتزق فيا طلعت شهد .

::-شهد: ملك في ايه بتخنقي نفسك كدا ليه وبتصوتي ايه بيحصلك مالك
::-ملك : مش انا دا هي كانت هتموتني وبتقولي خلفوا العهد وروحي هي التمن
::-شهد: هي مين ديه مفيش حد قرب منك يا ملك وانتي اللي كنتي بتخنقي نفسك دا حتي الشباب جات تشوف في ايه شكلك تعبانه لسه
::-ملك : اه باين كدا
::-شهد : معلش يا جماعه هي تعبانه وحرارتها عاليه ودا عامل شويه  تخاريف عندها
::-ملك : شهد ممكن انام عندك انهارده
::-شهد : طبعا يا بنتي تنوري في اي وقت .

مشيت مع شهد ع بيتها وطول الطريق وهي بتحاول تخرجني من المود وتضحكني  بس بالي كله وتفكيري كان مشغول في  اللي حصلي وهل دا تخاريف نتيجه التعب فعلا زي ما بيقولوا ولا لا  المهم وصلنا مع بعض بيتها  وهناك  حصلت حاجه غريبه جدا هتكون سبب في تغيير حياتنا احنا الاتنين بعد كدا.