"إن وراء وحدتي وحدة أبعد وأقصى..
وما انفرادي للمعتزل فيها سوى ساحة تغصُّ بالمزدحمين..وما سكوني للساكنين فيها سوى جلبة"
جبران خليل جبران
🤍🤍🤍
استدارت فرأت أمواج البحر تتلاطم خلفها وكأنها فى شجار كالذي داخلها، قطع شرودها صديقها رحيم قائلا:
_مالك يا أمل، سرحانة كدة ليه.
نظرت له أمل بعيون دامعة:
_تعبت أوي يا رحيم، تعبت من شعور الوحدة، تعبت من كتر ما أنا حواليا ناس وبرده لوحدي، بابا كل همه شغله وماما الندوات اللى بتحضرها وعلى طول شغلاها واسلام طبعا غرقان فى حياته وانا على طول لوحدي.
نظر لها رحيم بغيظ:
_بقا أنتي لوحدك يا ندلة، أمال أنا ايه هوا.
مسحت أمل دموعها وقالت من بين ضحكاتها:
_وهو أنا حد قارفني فى حياتي غيرك يا جميل أنت، والله ما حاجة بتهون عليا الحياة غير الكام ساعة اللى بقضيهم فى الرحلة معاك يا رحيم بس بعد كدة برجع لوحدتي تاني، حتى مليش صحاب بنات عمري ما لقيت واحدة تشبهني أو ارتاح معاها فى الكلام زيك كدة يا رحيم.
جحظت أعين رحيم وقال بتمثيل:
_واحدة برتاح معاها فى الكلام زيك يا رحيم !!!..
أنتى بتعتبريني زى صحبتك يا بت انتي، لا وألف لا كله إلا كدة، أنا رحيم اه بس راجل أوي، كله إلا الشرف.
تركته أمل وهى تضرب كفًا بالأخر وتتمتم:
_طول عمرك أوفر وتمثيلك زفت.
ركض ورائها رحيم قائلًا:
_استني بس.. لسه المشهد مخلصش.
🤍🤍🤍
"تصيب قلوبنا طلقات قد تكون أشد من طلقات الرصاص أي وهي طلقات الحب..
طلقة الحب تصيب صمام القلب، تجعله غير قادر على التفكير بأي شئ غير الأستمتاع بتلك الطلقات التى تجعل القلب يتراقص فرحًا ويظل ينزف عطاءّا وحبًا حتى تصفي تلك الطلقات ما به من طاقة، فإن كانت طلقات الرصاص تصفي القلب من الدماء فطلقات الحب تستنزف طاقته وتحوله مع الوقت لقلب مُستنزف،إما أن تكون طلقة رحيمة ويعوضنا من أطلقها عما فقدناه وإما أن تكون طلقة غادرة فتصفي ما تبقى من مشاعرنا"
كان معكم جاد الشريف وبرنامج لحظة حب.
_كان معكم نادر سيف الدين من قناة الحقيقة للأخبار.. ألحقني يا فخري..
نطق بتلك الكلمات الضلع الثالث لمثلث العاهات كما سماه جلال والد نوح، ليلتفت إليه جاد موبخًا إياه:
_يبني أنت مش هتبطل هيافة.. أعقل بقا.
ضحك أنس مرددًا:
_لأ.. مبحبش الرزانة بتاعتك دي والرومانسية الأوفر اللى أنت بتسّمعها للناس دي، بتقلب بطني.
_خليك أنت تافه كدة وجبلة.. فين نوح قال هعدي عليك بعد الحلقة ومجاش لغاية دلوقتي..
لم يكمل كلامه عندما وجد نوح امامه يقول:
_نوح متكدر وكان بيجيب مقرمشات.
أنس ضاحكًا:
_أكيد الحج جلال الفاضل هو صاحب هذا الطلب، ما تجيب حبة.
فزع نوح وقال وهو يقبض على الكيس الذى بيده:
_لأ كله إلا كيس جلال، دي فيها تكديرة اسبوع بمسك، لأ بالله عليك.
جاد ضاحكًا:
_لا حول ولا قوة إلا بالله، يبني لما أنت مش حاببها خطبتها ليه.
نظر له نوح وهو يمثل الحزن:
_اتورطت والله يا جاد، قالى دى بنت رقيقة يا نوح وهتعجبك وأنت عارف صاحبك ملوش فى البنات اصلًا، فقلت ما دام مليش فى جو الحب والصحوبية يبقى أتجوز واحدة بنت ناس وخلاص، بس ايه يا كبير هو اسبوع واحد واكتشفت انه اكبر قرار غلط اخدته فى حياتى، ملاقيش عندك حل اخلص من البت المستفزة دي.
ظل يفكر بفكرة تنقذ صديقه من شباك تلك المدعوة مسك، وقفزت لذهنه فكرة، فقال موضحًا:
_بص يا نوح انت ابن حلال، انا عندي فكرة هتنقذك من مسك، أنت تقولها أنك هتموت بعد بكرة.
نظر له نوح وقال موبخًا:
وأنا سألتك انت يا رخم أنا بسأل جاد، نقطنا بسكاتك بالله عليك.
ظل جاد يسير بالغرفة ذهابًا وإيابًا حتى تداعت له فكرة ستخلص صديقه من هذا المأزق..
_بص يا نوح انت تزهقها منك لغاية ما تبعد هى
نوح بغيظ من أصدقائه:
_أنتو أفكاركو كرييتيف لدرجة مبهرة.
ثم أردف بقلة حيلة:
_هي دي بتحس دى لزقة ما صدقت حد يرضى بتقل دمها، مش عارف طالعة لمين باباها استاذ بدر قمة فى الرقى واللطافة، انما هى اعوذ بالله ربنا خلقها عشان تعكنن على أمى أنا.
_بغض النظر انك عيل فيلسوف وبتزهقنى بس فعلا عندك حق الاستاذ بدر محترم جدا وشركته من اكتر الشركات اللى سمعتها حلوة فى السوق، والعلاقات العامة عنده يا واد يا نوح فيها حلويات.
قال أنس تلك الكلمات التى جعلت كلا من نوح وجاد يصابون بالتشنج وبادر جاد قائلا له:
_ولا أنت عيل تافه يلا، وبعدين انت مش هتتلم وتخطب غرام بقا وتتهد البت هيجيلها بوادر جلطة منك يا شيخ، ايه البعيد مبيحسش كل اللى همك البنات الحلويات والأكل اللى مبتفصلش منه كل ما اشوفك الاقى بقك شغال، بالمناسبة يا نوح احب اعطلك شوية واقولك سيب تلفونك لحظة وبص على كيس الحج جلال.
جحظت أعين نوح عندما رأى أنس قد ألتهم ما يحتوية الكيس من مسليات قد أتى بها لوالده فكاد أن يبكى وقال لأنس:
_روح يا أخى منك لله هروح أنا أزاى دلوقتى.
💜💜💜
أنا حبيت أنزلكو النهاردة بارت صغنن كدة وخفيف وبعد كدة باذن الله هنثبت مواعيد النشر يومين فى الاسبوع بس بالله عليكو تفاعل عشان محسش ان مجهودى والوقت اللى بضيعه مبيرحش هدر كدة وكل ما تشجعونى وتعرفونى رأيكو هكبر الفصول وهزود في المشاهد،
وعاوزة أشوف الناس بتوع الميمز بقا ورأيكم فى الفصول اللى نزلت.
دمتم فى رعاية الله وفضله
💜💜💜💜💜💜💜💜💜💜💜💜💜💜💜💜💜💜💜💜💜💜💜💜💜💜💜💜💜💜💜💜💜💜💜💜
🍂سحر جمال🍂
