بسم الله ولا حول ولاقوة إلا بالله
اللهم لا تبتلينا فيما لا نستطع عليه صبراً
نوفيلا بسمة أمل
☆الفصل الثالث ☆
نظر الطبيب بعملية إلي ثلاثتهم وأردف بنبرة مطمأنة :
_أنا عاوزكم تهدوا وتطمنوا خالص، المرض لسه في المرحلة الأولى يعني نسبة الشفا منه هتكون كويسة جداً ومٌرضية لينا جميعاً
وأكمل مُشيراً بسبابتة :
_ لكن بشرط إن المريضة تبدأ في العلاج وفوراً قبل المرض ما يتطور ويدخل في مرحلة صعب السيطرة عليه فيها
تمالكت سحر من حالة الذهول التي إنتابتها جراء إستماعها للخبر وساُلتهُ بنبرة متلهفة :
_ المفروض نبدأ العلاج من أمتي يا دكتور ؟
أردف الطبيب قائلاً بنبرة عملية :
_ كل ما نبتدي في العلاج أسرع كل ما كانت النتيجة مُرضية أكتر
بس الأول محتاجين نعمل شوية تحاليل ضرورية، وبعدها هنحدد ميعاد جرعات الكيماوي اللي هتاخدها المريضة
وأكمل مُقترحً :
_ أنا عندي مكان خاص كويس جداً يملكة دكتور ممتاز في التخصُص ده، والجميل فيه إن الدكتور ده هو بنفسة اللي بيشرف علي الجلسات وبيباشر الحالات بنفسه طول الوقت ،ده غير إنه دارس تنمية بشرية وبيشتغل علي المريض من الناحية دي ، والحقيقة إن ده اللي بيميزة عن غيرة ومعلي نسبة الشفا في المركز بتاعه
وأكمل بعملية وهو يُبسط ذراعه إلي أمير مُمسكً بكف يده بإحدي بطاقات التعريف الشخصية :
_ ده العنوان علشان مدام أمل تاخد الجلسات في المركز هناك، وعلي فكرة مش مُكلف مقارنةً بأسعار المُستشفيات الإستثمارية العالية اللي بنسمع عنها اليومين دول
أجابهُ أمير مُفسراً بعدما أخذ منهُ بطاقة التعريف :
_متشكرين جداً لإهتمام حضرتك يا دكتور، بس الحقيقة أنا مادياً مش هقدر أعالج أمل في أي مكان خاص، أنا هحجز لها في معهد الأورام اللي تبع الدوله
نظرت إليه سحر بذهول غير مستوعبة، ثم هتفت بنبرة قوية رافضة :
_ إيه الكلام اللي إنتَ بتقوله ده يا أمير، إنتَ عارف علشان نحجز مكان للجرعة في المعهد ده هناخد وقت قد إيه ؟
أردف الطبيب مُكملاً علي حديثها بنبرة عمليه :
_ مش أقل من شهرين تلاتة علي ما تلاقي مكان فاضي، وزي ما قُلت لك من شوية، إحنا في سباق مع الزمن وفي أمّس الحاجة لليوم الواحد
أردف أمير قائلاً بنبرة حزينة وهو يتطلع علي زوجته الشَاردة :
_ للأسف يا جماعة هي دي قدراتي المادية، ما يقدر علي القُدرة غير ربنا
تحدثت سحر بنبرة هادئة :
_ما تشيلش هم الموضوع ده يا أمير، أنا وإيهاب أخوها هنتكلف بمصاريف العلاج كُلها
وأكملت وهي تمسح فوق ظهر أمل المستسلمة لقدرها بلمسات حنونه :
_مال الدنيا كله تحت رجلين أمل، بس هي تقوم لنا بالسلامة
أنت تقرأ
💎بسمة أمل💎
Mystery / Thrillerتزوجت بمن أحبت، عاشت معهُ حياة هادئة وأنجبت طِفلتها الجميلة منه، عاشَا معاً حياة مليئة بالحُب والرضي،، وبرغم ظروفهما المادية البسيطة إلا أنها كانت تشعر بجوارهُ بأنها تمتلك العالم بأسرة، فهل ستترُكهما الحياة ليُكملاها بهدوء؟ أم ان لقدرِها رأيُ أخر...
