ميراث نور

ناير (بارت 1)

الفصل الأول  بعنوان " قُرعه "
"
قصتى بدأت من 17 سنة، لما قامت النار فى بيتنا  فجأه وكلت البيت كله باللى فيه , كلت أبويا وأمى وأخواتى الأتنين ومسابتش حد عايش فى البيت غيرى.

ساعتها كنت لسه رضيع مكملتش سنة ولقونى تحت أنقاض البيت المحروق وأنا  بصرخ , كانت معجزة أتحاكى بيها  نجع" الشرفاء" كله.

وعلشان أبويا الحاج "طلب" أمام الجامع، كان  أكتر  حد محبوب فى النجع ، كل الناس اللى فى النجع  كانوا عايزين يتبنونى  و يربونى فى بيتهم وسط عيالهم.

كانت هتقوم خناقة كبيرة بين الناس ووصل الأمر أنهم رفعوا السكاكين والسنج على بعض.

لحد ما الحاج  "فكرى  العياطى " واحد من كبار أشراف النجع  وكلمته مسموعه، قالهم على فكرة ممكن توقف النزاع بين أهالى النجع وتحل المشكله.

طلب منهم  يعملوا قرعة بالورق  ويكتبوا أسامى كل الناس اللى فى النجع  ويجيبوا أصغر عيل فى النجع وهوه اللى يختار  واللى يطلع أسمه فى القرعة يبقى حلال عليه يأخدنى وسط عياله.

وبالفعل عملوا القرعة , بس حصلت مشكلة تانية , كل ما أسم حد يطلع فى القرعة الناس تعترض عليه ويطلعوا فيه القطط الفطسانة ويقولوا كل عيوبه  فيضطروا يعيدوا  القرعه من تانى  فيطلع أسم تانى يطلعوا فيه برضه  القطط الفطسانة ويعترضوا ....وهكذا

فطلع الحاج فكرى العياطى أبو الأفكار بفكرة جديدة  وهى انى أقعد سنة فى كل بيت  فى النجع  لحد ماسنى يبلغ ال18 سنة وأقدر أستقل بنفسى وأعيش فى بيت لوحدى وبكده يبقى كل أهالى النجع ربونى وسط عيالهم.

وافقوا على الفكره مبدأيا بس ظهرت مشكلة تانية !!!

وهى مين اول واحد هياخدنى عنده اول سنة؟!!

فأقترح عليهم الحاج فكرى يعملوا قرعة !! وكل آخر سنة يتجمعوا فى المسجد بعد صلاة الجمعة ويعملوا قرعة على مين اللى ياخدنى السنة اللى بعدها وهكذا ...

وبالفعل بقيت كل سنة فى بيت شكل, مرز فى بيت ناس غنية أوى فى النجع ومرات تانية كتيرة فى بيوت ناس مش لاقيين حتى كسرة العيش، على حسب ماتحدد القرعة فى آخر السنة.

فيه اللى كان بيعاملنى كويس ويعاملنى كويس دى يعنى يأكلنى ويشربنى ويدينى مكان أنام فيه ودول كانوا قليلين أوى فى سنين حياتى وفيه اللى بيعاملنى بالسخرز ويشغلنى عنده ببلاش من غير حتى مايأكلنى أكلة عدلة ودول ما أكترهم فى سنين حياتى !!!

عشت فى بيت " على " النجار وأتعلمت النجارة غصب عنى  و شغلنى معاه بالسخرة مش هو بس  ...
"عظمه" الحداد  علمنى الحدادهة وشغلنى عنده هو كمان بالسخرة  و"مدبولى" المكوجى و"صابر" اللى بيسلك المجارى فى الكفر و"سطوحى " البنا  وغيرهم وغيرهم طوال ال17 سنة , ده فيه ناس كانت بتتمنى القرعة ترسى عليهم , بس مش علشان يكسبوا ثواب ... لأ.... علشان يكسبوا  عبد يشغلوه بالسخرة ببلاش لمدة سنة !!!