رواية "ناير"
الفصل الثاني بعنوان"لعنة !!!"
الأوضة من جوه مليانة كتب مترصصة على الأرفف و فيه منها مرصوص على الأرض , لفيت بعينى فى الأوضه فلقيت صندوق خشب شكله غريب وشدنى فروحت ناحيته , فتحت الصندوق وأتمسمرت مكانى من اللى شوفته جواه !!!
الصندوق جواه سبحة كبيرة، حجر أزرق غامق فى حجم الزلطة وصورتين، هم دول اللى خلاونى أتسمرت مكانى !!
الصورة الأولى لراجل شبهى بالظبط!!! متصور لوحده وهو لابس بدلة سودا والتانيه لنفس الراجل بس جمبه واحدة لابسه فستان أبيض ومتصور جنبهم عم دياب !!
حسيت بهوا سخن فى قفايا , ببص لقيت عم دياب ورايا .
بصتله وانا عارف أعتذرله ولا أساله على الصور، قولتله:
أنا... الصور ... والله ماكانش قصدى.. لقيت الأوضة مفتوحة ...
مردش عليا بس بصلى بصه بعينه خلت قلبى هيتقلع من جذوره من كتر الرعب مع أنى عمرى ماخوفت من حاجة , بس شوفت حاجة فى عينه رعبتنى لدرجه خلتنى أرمى الصور على الأرض وأجرى بره البيت ,بصيت على البيت وأنا بجرى لقيته رجع بقى له باب !!!بس المره دى باب حديد !!
عدى شوية وقت مش كتير ، رجعت تانى للبيت، خبطت على الباب الحديد , محدش فتحلى , لقيت شنطتى محطوطة بره البيت، خدتها وقعدت على الصخرة، استنيت عم دياب لما يطلع يملى السطل علشان أعتذرله وأسأله مين اللى فى الصور ؟!!!
عدى يومين وأنا مستنى عم دياب يفتح الباب الحديد , بس الباب مااتفتحش خالص طول اليومين !!!
قعدت مستنى على الصخرة وأنا بقول لنفسى:
والله لو سنتين، هفضل قاعد لحد ماتطلع ياعم دياب
الليله الثالثة كانت برد شديد أوى , برق ورعد ومطرت سيول , طلعت هدومى من الشنطة ولبست منها على أد ما أقدر بس كنت لسه بردان برده , هدومى كلها غرقت مايه من المطر فلبست شنطتى وهى فاضيه فوق دماغى , الشنطة غرقت برده ,نزلت تحت الصخرة اللى قاعد عليها وحاولت اعمل نار بس كانت بتتطفى من المطر , كنت هموت من البرد
بصيت على بيت دياب لقيت الباب الحديد أختفى وشوفته واقف قدام بيته بيشاورلى أدخل !!!
خدت حاجتى ودخلت البيت وأنا جسمى بيرعش وسنانى بتكتك وبتخبط فى بعضها من البرد، جريت على منقد النار اللى عامله دياب وكان هاين عليا أرمى نفسى فيه علشان أتدفى , دياب دخل أوضته ورجع فى أيده كلسون وجلابية وبطانية، قالى وهو بيرميهم عليا :
غير هدومك المبلولة دى وألبس دول علشان ما تعياش
قولتله :
والله ياعم ديا...
قطع كلامى وقال :
أياك تكسر كلمتى تانى , قعدتك هنا بالأكل والشرب وأياك... أياك تجيب سيرة علمنى السحر دى تانى فاهم ؟!!!
YOU ARE READING
ميراث نور
Acakكل ما يخص روايه ميراث نور بما فيهم قصه ناير التي تمهد احداث ميراث نور للكاتبه لينا بسيوني🤍
