- اي ماما هسه
نفضت الأفكار من راسي وبلشت ادرس
بعد يومين گعدت الصبح على صوت المنبه لملمت فراشي ورحت اغسل
طلعت من الحمام صارت ماما بوجهي
- صباح الخير
- صباح النور بنيتي
يلا ما طول بعد وكت فوتي بدلي وتعالي اكليلچ لگمة
- لا ماما ما الحگ والله
بس اريد فلوس ما عندي حتى اكل بالنادي بعد ما اطلع من الأمتحان
صاح ابوية من يمة
- ماكو فلووووس تردين تتزقنبين تزقنبي هنا متردين يطبچ ألف عرج تسمعييييين
باوعت الأمي اشرت براسها تعالي وراية
راحت قبلي للغرفة رحت وراها لگيتها دتطلع فلوس من جنطتها
- لا ماما ما اريد
اخاف بابا يعرف ويسويلچ مشكلة
- الزمي ولچ
هذني مو فلوسة فلوسي اخيط واضرب العالم ابر علمود اعيش واعيشچ بلا منيت احد
رحت حضنتها حيل وبست راسها
- الله ليحرمني منچ ومن طيبة گلبچ يا احن ام بالدنيا
- ولا يحرمني منچ بنيتي
- ماما اريد اطلب منچ طلب
- گولي حبيبتي
- بعد ما ارجع من الدوام اريد امر اشوف جدو
- لا بنيتي
خاف ابوچ يعرف وشيخصلنا منه
- والله ما اتأخر
خمس دقايق بس اشوفة واجي ع السريع حبابة
- ماشي
بس هااا خمس دقايق متزيد دقيقة وحدة
- صار
- يلا روحي بدلي بسرعة ليجي الخط
رجعت بستها وطلعت سريع
اخذت ملابسي من الصالة ورحت بدلت بالحمام بعدني البس بحجابي دگ السياق هورن
اريد الفه عدل ماكو
خبص الدنيا بالهورنات لحد ما خله ابوية يصيح
اخير شي شمرته على راسي شلون مچان وطلعت
- صباح الخير شجو
- صباح النور سقة
شو متأخرة شعجب خو ماكو شي
- عمچ غير
المهم جدو شلون صار ما تحسن شوية
- لا والله
تعبان كلش ويوم عن يوم تسوء حالته اكثر
- اليوم اجي وياچ حتى اشوفة
- هلا بيچ
بس شعجب محد اجه من اهلچ يشوفه
- على اساس متدرين
- لا أدري
بس يظل ابوهم والرجال بين الحياة والموت معقولة هيچ الحقد والغيرة تعمي بني أدم
- اي حبيبتي معقولة
ويا اهلنة لا يوجد شيء مستحيييل
- الله يهديهم
- امين
ديلا راجعي للأمتحان بعدين نسولف
كملت الأمتحان وطلعت قبل شجن
گعدت بالنادي انتظرها ما طلبت أكل حتى لتحچي علية بعدين
