قررت اكتب قصتي وشلون تغيرت حياتي
ملاحضه :اني مو كاتبه ولا حكتب بأسلوب الكاتبات وبشكل ابداعي مجرد فضفضه وسواليف...
بدت قصتي من نجحت من الخامس وصرت سادس طبعا اني البنيه الصغيرة الاهلي وعندي اخوان اربعه واخت عائلتي كل حياتي احبهم بشكل مو طبيعي مدلليني ويحبوني وخاصه بابا يقدس شي اسمه بنيه وكلامنه محترم ومسموع بالبيت فه تعودت على هذا الشي من الصغر وتعلمنه كرامتنه اهم من حياتنه كلها
على هل اساس جنت مستحيل اخون ثقه اهلي و وحبهم الي واكف بعيني بحيث اي موقف اتعرضله اكعد بنصهم واحجي بزودي وبالمقابل همه يحتووني ويحلون مشاكلي بدون ميأذوني
اني مبتعده عن خوالي نوعا ما بحكم انو همه بعيدين علينه يعني مو بنفس المنطقه واني ما احب اروح لان يريدون يوصلون للمثاليه بأي شكل من الاشكال بس بشكل مقرف يعني بي نوعا من الكذب والهمبله مثل ميكولون واني هذوله الصفات تستفزني جدا جدا
المهم جان عندي خال استشهد من زمان يعني اني مواعيه عليه عنده ولد ثنين وبنيه ابن خالي الجبير منشوفه بس بالمناسبات يعني من نجتمع عند بيبيتي او من نروح لبيت خالو الثاني مرات يجي هو واهله من غير انو اني مبتعده عنهم ولقائنه يصير كل ثلاث سنين او اكثر يعني وصلت عمر ال١٧ سنه واني مشايفته بس ثلاث مرات وهو شخصيته كلش رزنه وسواليفه حلوة وهو هم شكله حلو من النوع الاشكر وابيض وطويل يعني و من يسولف شخصيته تجذب بشكل مو طبيعي
بيوم من الايام جنت تعبانه من محاضرات السادس ونايمه اجتي اختي تركض
.....اكعدي نيران هاي ام عمار دا تخابر امي دا تخطبج لعمار (الكبير )
.. اني بوكتها استغربت شجابه عليه وشعرف مني واجه يخطب وبعدين شنو من خطبه هاي الي بالتلفون
وجنه نشاقه اني واختي الكبيرة انو احلى واحد بالعشيرة اجه خطبني وهيج شي اني بالعاده اضحك واسولف ويه اخوتي بهاي المواضيع انو خلص موافقه واريد ازوج واخلص منكم وشقانه ثكيل يعني بس من اجه خطب هو استحيت حيل بحيث ابتعدت عنهم
ما توقعت اهلي ياخذون الموضوع بشكل جدي ويتناقشون حتى لان اني عائلتي ممنوع منعا باتا انو البنات يزوجون بعمر صغير وخاصه اذا جانت دا تدرس واني جنت شايله الفكرة نهائيا من بالي لان جانت امي مرة كبيرة بالعمر ومريضه حيل فمستحيل اعوفها
المهم اجه اخويه واختي سئلوني شنو رئيج بلي ديصير جانت هاي حجايتي حرفيا
.... اني طالبه سادس الموضوع ما اريد افكر بي ولو ثواني خلص سدو
وجنت مرتاحه بهذا قراري جدددا واهلي هم معارضوا لو حاولوا يغيرون رئيي امي جانت رافضه الموضوع نهائيا وتحس اني بعدني صغيرة حيل وخطيه 😅
بالنسبه لبابا فهو من زمان ميحب احد يجي يخطبنه نحسه يغار علينه فجان ساكت وارتاح لقراري
ضلت ام عمار ٣ ايام تلح وتحاول وانطينه قرار الرفض
نسيت اكوللكم هو مدارس واصل للسادس ومبطل بحكم انو هو الابن الكبير للعائله وهو الي شايل البيت ويصرف عليهم يعني مثل منكول ضحه بنفسه لخاطر اهله
من ردينه الهم الخبر جان العذر انو البنيه صغيرة ودا تدرس خلي ينتضر اذا يريد احنه هسه مافتحنه الموضوع وياها علمود ليأثر عليها وشرط ابوها انو يكمل دراسه لان هل شي مهم لحياتهم اذا صار النصيب
جانوا اهلي حيل يحبوا لان هو شخصيته حيل جذابه ومثل منكول يعرف يسولف فما رادوا ينهون كلشي ومارادوا يضغطون عليه بحكم اني سادس جنت
فأمه ما قبلت وكالت
... يعني شلون يعوف شغله علمود دراسته ميكدر يكول
احنه هم كنالهم بكيفكم البنيه صغيرة ونسد الموضوع
لمده سنه كامله
قبل متعدي هل سنه خلي احجيلكم المرات ال٣ الي شفته بيهن
اول مرة شفته جانت ابينت خالو بيبي جانت جايه الهم واحنه بالعاده كلنه نلتم يمها لان المكان ربع ساعه عن بيتنه بالسيارة وهمه هم قريبين عليهم بعد اقرب منه فه بيوم جان عيد واحنه رحنه اجوي اهله بوكتها وهو ماكو كالوا ورة الغده يجي فه البنيه اخته اصير قريبه العمري يعني اكبر مني بسنه او ثنين اسمها دنيا جنت اول مرة اتعرف عليها بعد غيبه طويله يعني من الطفوله مشايفتها فضلينه سوة نسولف ونضحك طبيعي جنت اني بصف ثاني متوسط وتوني صايرة شابه طبعا موتصفاتي اشبه عمار تقريبا هو بيضه وطويله وشكرة بس بيه من ملوحه عمامي واخوتي مثل ميكولولي بيضه بس دمج يلعب واني من النوع الخجووول جدا ويه الناس الي مو قريبين حيل حيل عليه
فه من اجه ساعتين يله طلعت سلمت عليه يعني اضطريت لان خوالي كلهم وبنات خالي اجوي كعدوا سوة فأني طبيعي سلمت وكعدت
هو مثل المستغرب لان هو لو شايفني بالشارع ميعرفني لهيج مرحله واصله علاقتي بيهم كعدت يم امي
وهو كاعد يم بيبي
كل ما امي تحجي ارفع عيني الكي يباوع ومن اصد يسوي نفسه ديباوع على امي لحد مكاموا اغلبهم وهمه ديريدون يروحون فأجه يم امي وكام يشاقه وياها ويسولف وبعدها راحو واني مشفته
ثاني مرة شفته جنت رابع اعدادي بوكتها بيبي ماتت وامي صابتها جلطه وحالتها ادهورت فهو مدري ليش وشعجب اجه لأمي يسأل عليها هي واخته وامه
اني اخوتي شقاهم وياي ثكيل فهمه يحجون ويشاقون واخوتي كل شويه ذابيلي حجايه واني ارد ما سكتنه بذاك اليوم مثل منكول شاف شخصيتي على حقيقتها
شخصيتي الي تحب تشاقه وتضحك دائما الي ما تعرف الناس ليش اضوج وشنو الداعي للواحد يكدر خاطرة
والمرة الثالثه جانت عرس اخته جنت توني خامس واول مرة ادخل بيتهم جنت مثل الخايفه على متوترة لان اعرف نضرات الاعجاب الي بعيونه
اني بطبعي انتبه بس استغبي اسوي نفسي مو مركزة وما اعرف شديصير وخاصه على هيج شغلات مبينه ذيييج وينها
بوكتها رحنه بس اني وامي
جنت لابسه فستان وردي عدل وبي جاكه من كدام وشال ابيض وحذاء ابيض وجنت ضعيفه واني طويله (طولي ١٧٠)
اوك مدحت نفسي هواي بس ترة اني احب نفسي بذيج الفترة 😅😅
احنه منندل بيتهم اني وامي فوصلنه لمحله جان بدايه شارع من وصلنه امي نزلت واني بقيت بالسيارة صاحته واجه ركب بالصدر صد عليه سلم ببتسامه واني هم رديت عليه وصديت وجهي للجامه
