حلو طبع النخل مايوم طخ راس. وحلات الزلمه مابينت عليه خله
اكو واحد يطب ديوان مخلوس. واكو واحد يخلي العنب بسله
انصحك من تعاشر عاشر البي زود. گبل لطيح يركض جرحك ايشله
عشگت السالفه المملوحه وانه ازغير. ابن هور ومضيف وعاشگ الدله
العايفني احترگ ويشوف بيه النار. مايقبل ضميري البيته اتخله
ولا تمشي الشخص مايفرح الملگاك. خاف عليك باجر تنحسب ذله
اليضنك برد لو طگ لهيب الصيف. من يحتر افزعله وصيله الچله
انصح ياگلب لو صرت يوم ابخير. علئ الصحبان بالك يوم تتعله
اخذ طبع التواضع حتئ لو ذموك. المايصعدلك انت روح ونزله
مو كلهم سوه بيهم يحب طاريك. وبيهم بس نميمه ادور الزله
اشلون انقيس واحد بسوالف حيد. ويه انسان ساكت حله ماحله
فرق بين اليرحب باب بيته اقماش. ويلباني قصر بچذب ماهله
اظل ضد المثل بس مثل واحد هاذ. اليكثر الجيه وينه وعلي مامله
اختلفت والبشر كلمن مشاله ابراي. بس الزين يبغه امچانه يندله
ومن تحچي سوالف سولف بمعروف. الزلمه اليحچي بخته الوادم اچله
ماخلصو ولاكن قلو اهل الطيب. وقليل اللي يطيح اليوم عل عله
گبل جانت الوادم كلها ايد ابـ ايد. الملح سيد گبل ويشور ومله
