كابوسي

الجريمه الى مالها محاسبه

آنــــي مروه عمري ١٨ سنه طالبه سادس ادبي عايشه ويه عائلتي الجبيره متكونه من خمس بنات واربع ولد وامي وابوي وجدي وبيبيتي وعمامي ثنين واحد مزوج وعنده اطفال وثاني بعده ممزوج
ام مروه :- مروه يمه اكعدي يلا دوام
مروه :- ماما هسه اكوم بس ربع ساعه
ام مروه:- تاخرتي يعني تغيبين
مروه:- لا ماما كمت
كمت مَــن لفراش وامري الالله غتسلت لبست ملابس المدرسه اجيت لماما لكيته مسويتلي ريوك
مروه:-شكرا يا احلى واجمل ام بدنيا
ام مروه:- ادللي حبيبتي بس اريد ما تخيبين املي وجيبين معدل زين هاي سنه
مروه:- نشاءالله ماما اوعدج يلا آنــــي حسويلي لفه وارح لين تاخرت
سويت لفه واكلت لكمه جنت جوعانه واني امشي لباب
مروه:-ماما رايحه مع سلامه
ام مروه:- الله وياج يمه ربي يحرسج ويوفقج
طلعت مَــن البيت وصعدت تكت ذكرت ليوم يصادف عيد ميلاد ماما شلوَטּ نسيت هيج شي قررت من ارجع من مدرسه اروح اجيب لماما كيكه واسويلها حفله بسيطه
ابو تكت :لعفوا بس وصلنه وين سرحانه
مروه :ها شوكت
ابو تكت :شنو شوكت هاي مدرسه يلا عيني انزلي
نزلت من تكتك واني ميته من خجل هذا شبي ممصدك عنده تكتك مو عيب هيج يحجي امداه
شفت ساره واني داخله للمدرسه
ساره صديقتي وروحي واقرب من اختي اليه هيه الوحيده الي تعرف وحاسه بالي يضايقني
مروه: هلو سرو شلونج ليوم متحان واني مو ڪُلش ركزت بالماده
ساره: هلا اسكتي آنــــي اصلاً مقاريه شي وخوفي ما ادخل وزاري انتحر
مروه : كولي يالله يمعوده بعد للمتحانات الوزاري شهرين اقري زين
ساره: عوفينه من دراسه اكلج دريتي بيقين البارحه متعاركه ويه اهلها ومنتحره
مروه: عزا صدك تحجين وصار بيه ليش منتحره
ساره: متقدملها ابن عمتها واهلها يردون يبطلوها من مدرسه يزوجوها وصايره بينهم مشاكل يكولون هسه هيه بالمستشفى بعد الله اعلم
مروه: شلوَטּ منتحره
ساره: حاركه روحها
مروه: دهر دهر اهلها واللهہٰ خيطه هاي شبيهم هسه شستفادوا
ساره : اكلج انت سوالفج متخلص واول درس جنه طار من وراج يلا خلي ندخل
مروه : هو منو فتح المواضيع غيرج
ساره : وره ميخلص دوام انتضريني نطلع سوه
مروه: أჂ̤ علمود ࢪوح آنــــي وياج نختار كيكه لماما عيد ميلاده
ساره : حبيبتي خاله نشالله العمر المديد
مروه :شكرا حُـبيہ يلا ندخل
دخلنه للمدرسه ومر الوقت ودروس خلصت ومتحنه وبالي بقه يم يقين ليش الانسان يوصل هيج مرحله ومعقوله يوم من الايام آنــــي افكر بالانتحار لا اسم الله اني ايماني قوي برب العالمين وماكو شي يتغلب عليه
طلعنه لساحت المدرسه
ساره :اكلج مروه شكلتي على موضوع الكلتلج بي
مروه: ساره انتِ صديقتي الاكثر من روحي ماريد اخسرج كلتلج اذا ترجعين تفتحين الموضع كلشي ينتهي بينه
ساره : اني علمودج اريدج طلعين من جوكم الكئيب وشوي تطلعين للحياة
مروه: يعني هسه هيج اطلع للحياة لو هاي تخريب وسمعه مو حلوه
ساره: قابل انتِ شراح سوين هيه مجرد تعارف
مروه: كافي ساره كافي عفيه امشي نطلع يلا لا نتأخر
ساره : امشي امشي مو وجه نعمه انتِ
طلعنه من مدرسه وجان اكو محل قريب على مدرسه مال تجهيزات اعياد ميلاد دخلنه وجان محل يجننن من كمية الاوان المبهجه الموجوده بي بقينه نتجول بالمحل واني اختار كيكه وساره تختار غير كيكه لحد ما عبرت نص ساعه يلا تفقنه على كيكه. اخذته ورحت احاسب وتفاجأت بسعر
مروه: مو غاليه بنسبه الحجمه
الكاشير : عزيزتي اكو نفس الحجم وارخص هاي حشوته تختلف
مروه : اوك شكرا  راح اختار  غيره
رجعت الكيكه المكانه وكلش نقهرت لين حبيت شكله بس مو على كد ميزانيتي اني كل الي املكه ١٥ الف وطلعت الكيكه ب٣٥ الف
ساره : مروه صدك جذب تعالي اني اجملج واخذيه
مروه: لا يمعوده شجمليني ومنين ارجلعج اياهم هنه ذني ال١٥ الف وجمعتهن بالدفرات
ساره : سويهن اقصاد
مروه : حضرتج تتكنين
ساره: والله تحيرين الواحد عمي رجعيها واخذي غيرها شسويلج
رحت اشوف الارخص منها وبالاخير حصلت وحده هم عجبتني وفرحت لين راح افرح  ماما
اخذنه الكيكه وطلعنه وصلتني ساره الحد بيتنه وراحت
دخلت للبيت ولكيت ماما واكفه بالباب وتعابير وجهه تخوف
مروه : شكو ماما شبيج صاير
ام مروه : وين جنتي انتِ ليش تتاخرين هلكد
مروه : ماما متاخرت بس شوي ليش متوتره انتِ شكو شبيج.
بعدني احجي ويه امي وسمعت واحد اجه من وراها ويعيط
فاروق اجه بتهجم عليه : وين جنتي الدايحه الساقطه انعل ابوج الي ما اطاج تربيه
اني هنا بلعت لساني هذا الوحش المتروك بالبيت الجريمه الي ماله محاسبه كابوسي الي ماعرف شوكت اكعد منه جنت شايله الكيكه بيدي وارجف
مروه : عمو والله جنت ويه صديقتي ساره رحت للمحل اليم المدرسه جبت كيكه الماما
فاروق : انعل ابوج الابو امج لابو. ساره عفتج بس كم يوم كمتي تلعبين لعب جيبي الكيكه خلي ادوس بيها حتى يصير احتفال حلو الج والامج
اخذ الكيكه من ايدي شمره بالكاع وداس عليه ومرده مرد ومرد كلبي وياها بقيت اجمع مصرف المدرسه الف الف بس حتى افرح امي بلحضه يدمر كلشي كمت ماعرف شسوي بس دموعي تنزل وساكته وباوع على امي نكسر خاطره ودمعتها بطرف عينهه
مروه : ليش عمو مو هاي نعمت الله
فاروق : لا تخليني اسبها همين ومو بس هيج تعالي هاج هاي الكتله حتى بعد توبين
جرني من ياختي واني ارجف ضربني وهاني امي تفاكك بينه وهو يدفع بيها اباوع على مرته تباوع علينه من بعيد وتبتسم فرحانه بالمشهد الي يصير فرحانه بنتصاراتهه فرحانه بهدم حياتي بدون سبب شنو الي سويته حتى يصير بيه هيج بيت اهلي الي همه عزوتي واماني شنو من غلط ارتكبته حتى اتجازه هيج اني شمسويه.
بقه يكتل بيه لحد ما سمع ابوي جاي بطريق  عافني وراح الغرفته ولا كانو صاير شي امي كومتني واخذتني الغرفتنه واني كوه امشي من جوع ورجلي اذاني برجلي داس عليها مثل الحيوان وفريسته جوا ضربني بحقد وسبني بكراهيه وسب امي شنو السبب ماعرف هذا عمي من اني عمري ١٤ سنه بده سلوب الحقد ينجمع عنده ويتخزن بكراهيه باتجاهي وهسه جاي يضهره اكثر واكثر
مروه : ماما اني شمسويه الى متى تبقه هاي المعامله وياي اني حياتي جاي تدمر ليش متخليني اكل الابوي خلي يعرف شنو يصير بغيابه واهله كلهم ساكتين على هذا الوضع وانتِ من ضمنهم مليت اني من حياة الذل والاهانه
ام مروه : كافي ماما لا تبجين اني اخاف عليج من اكلج لا تحجين الابوج ابوج ما راح يسكت وراح صير بينهم مشاكل وبيبتج راح تكلي انتِ سبب وكرهني بعيشتي
مروه: بس افهميني امي انتِ مو صغيره ليش تقبلين شخص يقلل منج واذا بيبيتي بسببج خلتينه نوصل هيج بسببج لين ساكته على ضلم واني جاي ضلميني وياج ليش بس اني هاي المعامله وياي ويه خواني ماكو ويه ولدهم وبناتهم ماكو بس اني اريد اعرف سبب واني بس يوصل بابًا احاجي والي يريد يصير خلي يصير اني تعبت
ام مروه : الخاطري اذا تحبيني اسكتي وربج مراح يقبل على ضلم يجي يوم وكل شخص يتجازه

احجي واني ماكدر اسيطر على دموعي وحزني وجعي
: امي تدرين اني شلون جمعت فلوس كيكه المصرف الي يخلي اليه ابوي ما اصرفه واموت جوع بس علمود اجيب كيكه بعيد ميلادج وهو بكل برود اخذه ومرده وداس عليه. جريمه هاي ليش فهميني ليش
ام مروه : ماما فدوه اروحلج كافي الخاطر عيوني كافي اني كلش. فرحت من ذكرتيني وهو الله يجازي على افعاله راح تموتين نفسج من بجي كافي
مروه : تعبت يمه والله تعبت
ام مروه : كافي يروحي يجي يوم وتفرج كومي غيري ملابسج لحد ما اصبلج غده تاكلين وتنامين ترتاحين
مروه: ماريد ما اشتهي. وما بيه حيل اكوم راح انام شوي وكعديني علمود اقره باجر عدنه متحان

عافتني امي وراحت شوف طلباتهم الي متخلص وبكل وقت ما عاجبهم العجب اني اكول ليش الآنسان يوصل مرحله يفكر ينهي حياته قبل موعدها صعبه بيت اهلي نولد بي وكبرت ولمن كبرت اتحارب بي وبدون سبب بقيت افكر بمستقبلي المجهول ويه هاي العائله لحد ما غفيت من تعب
.
: مروه مروه حبيبتي .
.
.........................................................

سلام هسه دتحجي الكاتبه شخصين القصه حقيقيه لكن اني ضفت اضافات بسطيه هذا اول بارت والبارتات الجيات حتكون اقوى اتمنه تعجبكم القصه وتفهمون انو اغلب البنات ديمرن بضروف اصعب من كل انسان انو يتحمل هيج قساوة ماعرف شلون اعبرلكم الموقف لكن حتعرفون شقصد بقية البارتات 😇