سلسلة اسكريبتات

كوميدي

بقولك يا كبير عملت إيه في الإمتحان؟

أحمد: حليت عشرة أسئلة من خمسين سؤال

عمر: طمنتيني أصل فعلا كان صعب والحمد لله كان صعب معك بردوا

أحمد: لأ يا عم مش حكاية صعب وكدا، دا أنا اللي زهقت وكدا والجو حر فمقدرتش أستحمل وسلمت

عمر بصدمة: إيه ياض البرود دا!!! يكونش ماضينلك على تعاهد إنهم يخلوك من أوائل الجمهورية

أحمد: يا عم فكك أهم حاجة امتحان الآخرة

عمر: اها صح بجد أقنعتني

عند منار قاعده منهارة عشان طلع عندها سؤال غلط

ميادة: يابت أنتِ بتعيطي عشان هتنقصي درجة، دا أنا هبدت في الإمتحان خدت سؤال من البت فرح وسؤال من أميرة وحليت سؤالين بمجهودي، وبعدين نزلت أشوف سؤالين في الحمام بس كنت هتقفش بس جبت باقي الإمتحان، وحليت وراجعت وغششت البت منى اللي كانت نايمة مستنية حد يرميلها سؤال

منار بصدمة: أنتِ فضحتي العيال، بس بجد إيه يابت الجدعنة دي دا كان ناقص تروحي تغششي باقي اللجن

ميادة: للأسف ملحقتش الوقت ماكفاش يلا نبقى نقول لهم المرة الجاية

منار بعصبية: يا فرحة أمك بيكي يا ختي امشي يابت من وشي بدل ما أقوم أساوي وشك بالأسفلت يا غشاشة، محسساني عملتي إنجاز عظيم، كفاية الذنوب اللي خديتها

ميادة: مالك اتحولتي كدا ليه؟ استني بس الطوبة هتصفي عيني ومحدش هيرضى بيا ماتعصبيش نفسك عشان واحده زيي با باشا وجريت من قدامها

روحت منار بعصبية وقالت: السلام عليكم

رد والدها: وعليكم السلام ورحمة وبركاته عملتي إيه

منار بحزن: عندي غلطة

والدها: بس طب كويس يلا بقى صلي واكوي لي الجلابية البيضا

منار بصدمة من ردة فعل باباها: أنتم ناوين تجيبولي الضغط ولا إيه؟

دخلت لوالدتها تحكيلها

في المساء والدها: بت يا منور متنسيش تكويلي الجلابية يابت أنا داخل أنام

منار كانت بتكلم صحابها وقالت: ماشي

تاني يوم الصبح صحي والدها وقال: يا مناااار

قامت منار بفزع وقالت: في إيه؟
بقلم إيسو إبراهيم

والدها: فين الجلابية اللي كويتيها؟

منار: بصراحة يا بابا ملقيتش أي جلابية محددة يعني أنت عندك جلابية بيضا بدل الواحدة اتنين وتلاتة وأربعة وخمسة

والدها: الله أكبر صلي عالنبي يابت

منار: عليه أفضل الصلاة والسلام، فقولي بقى معرفتش هتلبس أي واحدة فقولت أروح أنام

والدها: كنتِ اكويهم كلهم

منار بصدمة: نعم!!!! أنت بتهزر صح، أنت عارف بس أنا لما بكوي جلابية واحدة ليك بحس بإيه؟

والدها: بإيه؟

منار: بزغللة في العين، ووجع في الضهر وقطمة وسط، ووجع في الرأس وتنميل في الرجل ووجع في اليد.

والدها: امشي يابت من وشي دلع بنات الواحد زي مايكون ماتجوزش ولا خلف ياريتني كنت فضلت عازب

والدتها من وراه: بتقول إيه يا أبو منار؟

أبو منار: ولا حاجة يا أم منار، بس بقول لبنتك قد إيه الجواز حلو ومحظوظ بيكي وبأمك

أم منار: اها بحسب انزل يلا الحق صلاة العيد

أبو منار: نازل نازل، ومشي هو بيبرطم

منار: ست الكل أنا رايحة أنام سلام، وبلاش تصحيني كل لما حد يجي ويقول اومال فين منار

والدتها: روحي ياختي ما أنتِ طالعة لأبوكي بنات آخر زمن

منار: لا إله إلا الله، يعني الراجل بيحبك ومابيزعلكيش تقومي تقولي كدا ومالوا يا حبيبتى طالعة لأبويا فعلا حبيب قلبي

والدتها: طب إيه رأيك مفيش عدية

منار: خلاص يا أم منار دا كفاية إني بنتك مش لازم يعني أكون شبهك كمان، وجريت على أوضتها لما شافت بصة مامتها

#حاجة_سريعة

#إيسو_إبراهيم