قلاع الضر

قريبآ

((زينب ماجد_بنين احمد))

الله حيهم
يا هلا ويا مرحبا
اسلم عليكم انا فرد من خشان آل عگاب
احد اولاده ، والشاهد على مصايب الگلعة ( القلعة)  ، وبعد السلام نبدي وياكم كصص أهلنا على بخت الله .

تبدي سالفتنا من جدنا عكاب
ازلمة ابدوي .. عنده حلال جثير ، ويرعى ما بين الاوطان .. سوريا ومملكة الحجاز والعراق ... ووين ما اكو عشب وخضار يحط الاهل وينصب الخيم ويهجد بهالبكان فترة وياخذ الحلال ويروح لقير بكان ، وهاذ حال البدو الرحالة.

مرة واهو جاي ع العراق
خيم جريب من كلعة صاحبها يشتغل بالجيش العثماني اسمه ( زيدان ) وجدي بحلالا يرعى، تعرف على صاحب الكلعة (القلعة )  وصارم صدكان ، بعد فترة جدي خطب بت صاحب هاي الكلعة ، وابوه وافك بخير.

عد ما عرس ، طابتله عيشة الريف
وترك ضيم البدو والرعيان خلف الحلال بين البلدان ..
وويا ما استقر اخوان وعمام جدي اجم سكنم جريب من كلعة جدي .. وصارت هاي الديرة جثير ما تضم اهلنا وكرابتنا وعمامنا .

عاشم (عاشوا) بهاي الديرة وسكنم بيها
ومشوا بعاداتهم وتقاليدهم
ابن العم ياخذ بت العم بلا مهر
لجن لو راد ياخذ من قير عشيرة لزوم يطي مهر ومهر قالي ، واهل كبل اكثرهم فقرة .. فاعلى السهولة ياخذون من بنات عشيرتهم وعمومتهم .

عكاب ماخذ ثلث نسوان وعده ولد وبنوات جثيرة ، لجن ما خلف من مرته بت الكلعة قير خشان ، فعد ما ماتت جدتي ، خشان ورث الكلعة من امه وصارت له ... لجن اخوته وعمامة وكرابته اللي بناله بيت طين والما عده ظل اعلى خيمة الشعر .

كبر خشان
ومات ابوه عكاب ، وصار هو راعي الكلعة
اخذ ثلث نسوان لجن جانت خلفته شحيحة (قليلة)
خلف من الاولى ولد واحد
ومن الثانية اثنين بنوات
والثالثة ما خلفت .. ومرت سنوات ونسوانه ثلاثتهن شحت خلفتهن وما عاد يبزر .

اللي يكله مسحور
واللي يكله عليك عين
واللي يحجيله ما يحجيلة من خرافات اهلنا ..
بس اهو يريدله خلفة، وما يريد يظل بطرك هالولد ، وجاي يشوف الخلل مو بنسوان ، زعم ثلاثتهن يبزرن ووكفت بزريتهن !

ذيج الليل خشان طر الصحر بحصانه ..
نزل الليل وهو بالصحرا .. عرضتله وحدة عمرها يخش ب٩٠ بنص الصحرا مخيمة .. جيم نار وكعد يسامر وياها .. وشكالة شحة خلفته .

كالتله : ترد الديرة وتدورلك بت عينها صفرا وشعرة راسها حمرة وكونن عمرها ما يتعدى العشر ... تحطها ابيتك وجدام عينك وتنطرها لحين ما تلحك ، وعد ما تنظف من الحاكها ( دورتها) بنفس الليلة تواكعها ( تتقربلها ) وبهالليلة تنفك جبستك وتذر بزريتك .

رجع خشان للديرة وهو يدورله بت عينها صفرة وشعرة راسها حمرة وعمرها ما يتعدى العشر خاطر ياخذها .. دور اهله وكرابته والداير ما دايرة من الدير لجن ما وجد هالمواصفات ..

مرت السنة
والسنتين ... والثلاث وخشان لا لاكي مواصفات هالبت ، ولا وحدة من نسوان بزرت .

وعكب ثلث سنوات
جان مار بسوك المدينة اهو وابنه
طرت  جدامة لمة .. زلمة مبسط بثلث بنات من بناته يبيع بيهن ، والناس تحج وياه وتحاول ترده عن بيعتهن ومساجين بعدهن صغار .

اغتاض عد ما شاف ابو يبيع بناته بالسوك
وكف يحجي وياه خاطر يمنعه .. واهو يحجي دحك وحدة من البنوات .. عينها صفرة وشعرورتها تميل للحمار وعمرها يطلع ب٨ سنوات .. اقل اكثر .. بهيج حدود .

وكف عن الكلام وكلالة : هذه البت ابيش تبيعها ؟

عد ما حجه ، البنية رفعت راسها تدحكله وعيونها مدمعة .. الناس استغربت اشلون ازلمة مثل خشان يشتري بت بدل ما يصحي ابوها ويرده عن فعله .

حجه ابوها وانطاه سعرها
رجع سعله عن سعر البنوات الثانيات .. انطاه سعرهن
دفع سعر الثلث بنوات .. واخذ بس الجاهلة ام عين صفرة وكالة ( اصحى اعلى زمانك ورد بالبنوات لامهن وهالبت من اليوم ملك يميني )

اخذ بيد البنية ... وطلع بيها للكلعة
وعد هالخذوة تبدي سالفتنا ويا مصايب أهلنا .

قلاع الضر
قريباً

زينب ماجد
☆☆☆☆☆
بنين احمد