🍷🥂خــادمـة الـقاسـي🥂🍷

🍷🥂خــادمـة الـقاسـي🥂🍷 ✦وكأن عيناك في الحسن آية تتلى على قوم كفروا فاهت

الصهد والشمس الحارقة جاية نيشان عليها وهي معدبة ماحيلتها للحمار لي كل ساعة يعكس ليها ويوقف يتساراح من التقل لي هاز على ظهرو ولا لتقل لي هازة هي نيت على ضهرهااا .... حاطة ترازة على راسها ساتراه من الشمس لي شواتها ..حناكها غايطرطقو بالسخونية... تقهر فيهم الدم حتى ولاو بحال حبات ماطيشة .... سادة عويناتها الزرقين فزروقيتهم فتنة ماكايناش فشي بنت من الدوار .... من اشعة الشمس باش تقدر تحقق الشوفة قدامها وتعرف فين كتزطم برجلها....كتافها تهدو عليها وضهرها تحنى اما شعرها الطويييل البني تفكات ليه البونضة لي كانت رابطاه بيهااا وبرزطها  مسندل على كتيفاتها.

قررت تتساراح ولو لبضع دقائق واخا عارفة عواقب التعطيلة الى تعطلات .... سرحات رجيلاتها الصغار كتمسد فيهم وتنقيهم من التراب والحجر لي دخل ليها من سباطها البالي لي كولو مقطع يدخل الماء ويدخل التراب...ناضت تجمع شعرها الطويل باش ميبرزطهاش وهي مكملة مسيرتها موصلة الامانة لماليها... دقائق اخرى لقاتها واقفة امام منزل من التراب مبني على البني القديم....رفعات يديها الصغيرة كتدق وتنادي بصوتها الرقيق الدال على صغر سنها على مولات الامانة.

_خالتي زهور واااخالتي زهور.

هاهو الباب الخشبي تحل من طرف امرأة  محزمة نصها بفواتطها شافت اريناس وعرفاتها جابت ليها سخرتها..تبسمات ليها ونطقات .

زهور: هانا ا اريناس سمحيليا تعطلت عليك ...مدي ليا ابنيتي دوك البرامل ديال الماء...الله يرضي عليك محنتك معايا ..سيري الله يحجبك وشكرة على السخرة.

أريناس[كاتلهت بتقل البرامل]:هاكي اخالتي راه تعطلت على ماما خاصني نمشي دغيا باش نوجد الغدا

_ايوا الله معاك ابنتي ...ديك مك باقي ما بغى يهديها الله عليك.؟

حاولات اريناس  تتجاهل كلامها تفاديا للمشاكل مع مها.

_عطيني اخالتي ديك الامانة نديها ليها معايا عافاك...راه جوج دالمرات كانتسخر ليك وماكاتخلصينيش...ونتي عارفة السكْية ديال المااا من الواد وهو بعيد صعيبة والبّادا والبرامل تقااال ...كانهز البرامل فوق الحمار ونص البّادا على ضهري حتى نوصلهم.

"ايه فكرتييني الله يفرك في الشهادة قولي ليها تصبر عليا غير اليوم امانتها توصلها توصلها ان شاء الله "

سالات كلامها وسدات الباب في وجهها خلاتها واقفة مخرجة عينيها لي عمرو دموع زربات عليها ماخلاتها حتى تهضر ....اش تقول لمها ملي تسولها على الفلوس؟! .... دورات الحمار راجعة لدارهم وعقلها كيخمم اش من عقاب هذ المرة عندها ... النعاس مع البهايم ونعسات الماكلة ومنها تحرمات السوط وبيه تسلخات العافية وبيها تحرقات ... اش باقي ليها تجرب هاذ المرة...بقوة التفكير والتخمام فالعقاب لي تيتسناها محسات براسها حتى وقفات قدامها حاطة يديها على نصها تتسنى فيها عاقدة حجبانها ....من الشوفة تعرفها حرابية وشررانية  سماهم على وجوههم هي ديال فتيحة مرات باهااا   لي حضياها تشوف فيها وهي مدابزة مع داك الحمار باش يطلع ليها..... تتسناها حتى وصلات لعندها ومدات ليها يديها بلا هضرة بلا كلام .

اريناس شافت يديها لي ممدودة ليها فهمات بلي بغات الفلوس  الكلام هرب ليها... گاع ديك البيوضية لي فوجهها وحمورية حناكها ولات صفرة مسقطرة من الدم فمها يبس و يديها بالخوف رجفو .

أريناس: ممي مي .. هانت  هانتي شوفي راه والله ...والله حت حتى قلت ليها...قلت ليها عطيني فلوس السخرة لي تسخرت لك ولكن معطاتنيش قالت ليا معنديش اليوم حتى نوصللها آمانتها.

يتبع🍂