توأم الروح، النصف المكمل وما أدراك ما النصف المكمل، حين يلتقي قلبان ويتحدث روحان حين تتجازب المشاعر والأحاسيس حين يصبح الجسد عبد لابتسامة لنظرة، حتى لهمسة تلك المشاعر والأحاسيس حين يصبح الشريك سلوى وأمان لشريكه...........
بقلم : نرجس أحمد
الفصل الأول:-
- انا اسمي سلوى عبد الرازق انسانة بسيطة وعلى قدر حالي عايشة وسط أسرة بسيطة جدا متكونة من ٧ أفراد أبوي عبد الرازق الموظف الحكومي وأمي سعاد زميلة أبوي برضو موظفة انا الأخت الوسطانية ترتيبي الرابع بعد ولدين اللي هم بشار وبسام وبت أمل وفي ولد أصغر مني بهاء أبوي من نحن صغار غرس فينا الثقة في النفس والشجاعة غرس فينا الطموح وحب التطور لحدي ما أي واحد فينا بنى مستقبلو كون نفسو ماعدا أنا لأنو قدري لسه ما جى عمري ٢٦ سنة بس كل شي حيغير بي إذن الله......
- الليلة حيبدأ مشوار حياتي العملي، بي سبب الركود والبطالة الحاصلة في البلد عانيت جدا إني ألاقي وظيفة بعد بحث سنين ويأس سنين وأخيرا لقيت وظيفة محاسبة، محاسبة في إحدى فروع شركة مارسيلا العالمية، هي شركة متخصة في تجارة برمجيات وكبرت لحدي ما وصلت للعالمية لكن أنا لسه في بداية حياتي وان شاء الله حأقدر أثبت نفسي وأتقدم........
- بعد ما وصلتني مديرة الHR على مكتبي عرفتني على زميلاتي اللي هم صبا وسهيلة ...صبا إنسانة ظريفة شديد يعني دخلت فيني طوالي واستقبلتني استقبال بشوش أما سهيلة فهي محفظة بعد ما إتعرفت عليهم تابعت مديرة الموارد تعريفي على باقي المكاتب وبعد داك رجعنا مكتبي....
- لبنى(مديرة ال HR ) بعد ما عرفتك على كل المكاتب باقي مكتب واحد ما دخلناها واللي هو مدير الفرع لكن بما إنو حاليا غير موجود فحنأجل دا لي فترة تمام،
- قلت ليها تمام
- لبنى: يلا ربنا يوفقك وان شاءالله موفقة......
- بعد ما مشت لبنى وصلت مكتبي وبديت أتعلم شغلي... مكتب المحاسبة متكون من كم قسم لكن القسم الأنا شغالة فيهو خاص بالصفقات مباشرة ودا مسؤول منو مدير الفرع مباشرة ، ومديرتنا سهيلة اللي بدت لي مشوار تدريب تقيل هو كما تقول صبا تعزيب بس انا كل شي يهون لي.... انا إنسانة متجهدة ودؤوبة في شغلي، وبي سبب سرعة بديهتي قدرت في أسبوع بس أفهم طريقة الشغل وكيفية العمل بيهو فهم كامل وفي الاسبوع الثاني طبقت دا على شغلي اللي لاقى أستحسان من سهيلة ومن نائب المدير المسؤول عن فرع الشركة في غياب المدير......
- داخلة الشركة وانا مستعجلة شديد لأني إتأخرت الليلة ودا كلو بي سبب مشكلة في المواصلات بين مواطن وكمساري بي سبب التعريفة الغالية البتزاد كل يوم على كيفهم ومن ما دخلت حسيت في حاجة مختلفة.... نظافة الشركة الشديدة، هي كل يوم نظيفة بس الليلة غير حتي طريقة عمل الموظفين كان كلهم مركزين في شغلهم ومتوترين شديد، يعني حاجة غريبة من ما إشتغلت ما حصل لقيتهم بالجدية دي، انا ماشي وبفكر لحدي ما وصلت مكتبي لقيت صبا وسهيلة سلمت عليهم وسهيلة عملت بي يدها على الساعة لأني متأخرة......
- عارفة والله عارفة وآسفه بالجد لكن مابيدي،وحكيت ليهم على الحصل.....
- سهيلة: ما مشكلة بس بتمنى لو ماتتكلم.
- ان شاءالله يارب.......... وبديت اشتغل....بعد شوية إتذكرت وقبلت على صبا سألتها...هي صحي الليلة الحاصل شنو في الشركة الموظفين متوترين وكل زول مركزة في شغلها الحاصل شنو....
- انتي ما عارفة صحي..... سلوى هزت راسها لالا......
- الليلة المدير جا.....
- سلوى قلعت عيونها ، يعني مدير الفرع جى وأخيرا...
- سهيلة قالت ليها وأحزري شنو مدير الفرع جا ولقى إنو الموظفة الجديدة غير موجودة ومتأخر....
- سلوى يا داب الخلعة ظهرت في وشها..... دا شنو سوء الحظ دا يعني كل يوم انا بجي في زمني وملتزمة وما أتأخر إلا يوم يجي المدير من سفر...... ظهر على وشها معالم الإحباط ياربي حيقول لي شنو، إنسانة متقاعسة حياخد عني فكرة خاطئة.....اثناء ما سلوى بتفكر جى لي سهيلة تلفون من مكتب المدير....
- الو....... امممم.... آه ..... تمام..... وعاينت لي سلوى وقطعت ليها شرودها....
- سلوى...
- نعم....
- انتي مطلوبة في مكتب المدير......
نهاية الفصل الأول
جزء بسيط خفيف
