" ကလေးတွေ ... ဘုရားပေါ် မပြေး ရဘူးလေ "
"ဘုရား မီးကို မဆော့ရဘူးနော်။
အို့အို့ ဖြစ်တတ်တယ် "
" ဝါး..... ဟို ကိုကို လက်ထဲက မီးရှူးပန်းကြီးက လှလိုက်တာ "
ညချမ်း အချိန်ပင် ဖြစ်သော်လည်း "မြို့သာ" ကျေးရွာလေး၏ ရွာဦးစေတီ ၌ အသံမျိုးစုံဖြင့် ဆူညံကာ သက်ဝင်လှုပ်ရှားလျက်။
''သီတင်းကျွတ် '' ရဲ့ အငွေ့အသက်ကို ဒီလို တောရွာ ကလေးမှာ အပြည့်အဝ ခံစားနိုင်သည် မဟုတ်ပါလား။
တိတိကျကျ ပြောရရင် " သီတင်းကျွတ် မီးထွန်းပွဲ" ပေါ့။
လပြည့်ည ဖြစ်သည်မို့ ပြည့်ပြည့်ဝဝ သာနေသော လမင်း၏ အလင်းရောင်က စေတီတော် ပတ်ပတ်လည် ၌ သွယ်တန်းထားသော အရောင်စုံ လျှပ်စစ်မီးသီး၊ မီးလုံးများ၊ ထွန်းညှိ ပူဇော်ထားသော ဖယောင်းတိုင်အလင်းရောင် ဝါညက်ညက်များ နှင့် အပြိုင် ထွန်းလင်းလျက်။
စေတီ၏ အနောက်ဖက်မှာလည်း တာပိန်မြစ် ကအရှိန်ကောင်းလှစွာ တသွင်သွင် စီးနေသည်မို့ ရေစီးသံ သဲ့သဲ့ ကပင် ည ချမ်း၏ နားဝင်ပီယံ ဖြစ်စရာ။
" ဟိုဖက် ကမ်းက မီးထိန်ထိန်
ဒီဖက်ကမ်းက မီးထိန်ထိန်
ဆီမီး ထိန်ထိန် လင်းပါတဲ့
မနှင်း တို့အိမ်.... "
တာပိန်မြစ်၏ တစ်ဖက်ကမ်း ရွာငယ်လေးများ ဆီက
မီးရောင်မှိတ်တုတ် ကလည်း တစ်မျိုး တစ်ဖုံ အမြင်တင့်စရာ။
ရွာဦးစေတီ နဲ့ မလှမ်းမကမ်းက ရွာဦး ဘုန်းကြီးကျောင်း ထိပ်မှာတော့ မဏ္ဍပ် ထိုးကာ ရွာအခေါ်" State Show" ပွဲ လုပ်ဖို့ အတွက် စိုင်းပြင်နေကြသည် ။
မိုက်အသံ စမ်းသူက စမ်း ၊ ပန်းကုံး ရောင်းမဲ့ အပျို အဖွဲ့တွေ က တစ်စု ၊ ပွဲဈေးရောင်း၍ ရန်ပုံငွေ ရှာကြမည့် ရပ်ကွက် အလိုက် အသင်းအဖွဲ့များကလည်း သူ့ အစုနှင့်သူ။
ကချင်ပြည်နယ် လို နယ်စပ် ဒေသလေး တစ်ခု ထဲကဒီ "မြို့သာ" ရွာကလေး ဟာ စစ်ဘေးဒဏ်ကိုလည်း ခံခဲ့ရဖူးသည်။
ခေတ်အလိုက် ပြောင်းလဲမှု၊ တိုးတက်မှု၊ဆုတ်ယုတ်မှု တွေကို လည်း သူ့ခေတ်နှင့်သူ ခါးစည်း ခံခဲ့ရပြီးပြီ။
