# رواية_ لمة العيله💙
# الحلقة _ 1
الكاتبه "اميرة اغسطس ✍🏻
__________________________
العشية
كنت امكسده وقررت انوض اندير كيكة نسمع في ماما تنادي عليا
جمانة: يا بنتي وينك
اني: ايوه جيتك قاعده في الدار
جمانة: سمعتي عمتك ضحى جايه بكره
اني : حقا معناها الليله ماشيه بايته مع ساجده
جمانة: وليش ماشيه من الليله بكره نمشو جميع اصلا عمتك توصل مع الظهر وتو تمشي وتشوفيها
اني : لا ما بنمشي نبات من الليله نعاونهم اكيد بديرو الغداء واجبة ثقيله بازين ولا كسكسي
جمانة : خلاص تو كملي حوستك واتي دبشك ونمشو في الليل جميع
اني : فرحانه حاضر من عيوني يا عيوني
______________________
ساعه 10 في ليل
حنتي قمريه: شنو بطيبو مع الكسكسي غدوه
منى : بنديرو ثلاث انواع موالح
سجاده : حتى زوز ساد معاهم عصبان راه
جمانة: حقا حتى زوز ساد واني بندير سلايط
سماح : واني بندير بوريك الجبده
اني : بندير بيتزه في خاطري عشان ايوب يحبها
منى: خلي نكلمهم يجيبولنا الخضراء من الليله
سماح: اي خلي نطيب الصلصله امتاع البرويك
حنتى قمرية: قوليلهم يجبيو كاكويه رك تنسي
منى : حاضر ياعمتي تو نتصل به نقوله
نضت اني عاد لحقت على الفالحه بنت عمي بديرلنا طاسة قهوة مع كيكه امتاعي واني نساعد فيها خش علينا سند جعاااان
اني : وانت ديما جعان لا تعرف تاكل لا تشبع🙄
سند : دخلكش فيا يا مشفشفه🙂
ساجده : خيركم وانتم ديما زي القطوس والفار
اني : هو يناشب😏
سند : انتي اللي بديتي😤
ساجده : خلاص اسكتو صبيت القهوة واتيه الكيكه
اني : اي نطلعو قبل ما تبرد القهوة
سند : وين حصتي
اني : كملت حصتك نبصر تلقاها في الثلاجه
طبعا لان متربين مع بعضنا زي الخوت علاقتنا ماعندناش جو الحشم وعيب نبصرو ونهدروز عادي مع العيله بنات واولاد وعارفه هذا غلط ربي يهدينا
جمانة: هي بنوض نروح تاخر الوقت وبكره بنوض بكري تو نجيكم الصبح نعاونكم
سماح : خليك اهو حوشك خطوة مزال الوقت
منى : تو نكلم سند يسقدك يمشي امعاك
ساجده : كان قعدتي امعانا رقدتي الليله وخلاص
اني: سند برا يرجي فيك
جمانة: لالا متعوده على حوشي منقدرش في عرسك انشاء الله نبات هي بالسلامه
ساجده : تحشمت وجه قعد أحمر مشت تجري
منى : هي يابنات كملوا حوستكم وارقدو ساعه واحد
اني : زي ماما ديما تقدم في الوقت تي قاعده ساعه 12 كيف جت 😬
سماح : هذا هو غدوه راهو بنوضو الصبح عشان نكملوا بكري ونديرو غدنا في وقته
اني : وين اختفت ساجده ؟
سماح : مش عارف بالك في الحمام كلا اني نعست بنمشي نرقد بالله عليك طفي ضي المطبخ بعد تكملي وتاكدو من باب الحوش مسكر زين ولا لا
اني: حاضر تصبحي على خير سموحه😘
_______________________
صباح يوم جديد
سليم : ديرلي طاسة قهوة بنمشي للعمل بسرعة عشان ناخد اجازة اليوم
منى : تفضل قهوتك وليش تاخد في اجازة اهو بوك قاعد وخوك اكيد موجود تو ينقصو من راتبك بعدين
سليم: تي يوم واحد ما ينقص شي هي بالسلامة
منى : في امان الله
سماح : صباح الخير
منى: صباح النور ناضو البنات
سماح : قاعدت راقدت
جمانة : السلام عليكم عليكم صباح الورد
منى وسماح : صباح الخير
منى : اكيد ساهرت امس قتلهن ارقدن بكري
جمانة : نحسابكم بديتو
سماح : لالا مزال
منى : بنمشي انوضهن البايرات
سماح : تضحك هي وجمانة يوتو في الفطور
منى: فتحت باب الدار بقوة
اني: نضت مخلوعه شن في شن صار
منى : مصارش شي راقدت لظهر بس 🙂
اني : ماهو امس سهرنا هذا عليش ما نضتش بكري
منى : نوضي حتى امك جت من الصبح
اني : صار تو بنحصل هزايب ثانيه من ماما
ساجده : قاعده راقده ولا على بالها نوم 😴
منى : خدت طاسة الميه وصبته فوق بنتها
ساجده : ليش يا ماما حرام عليك تخلعي فيا
اني : نضحك على منظر ساجده كيف شعرها ملبول بالميه وهي ترعش لان ميه امصقعه 😂😂
ساجده : اسهويك عليا ليش ما خبرتني 😬
سماح : امي ناضت خلي نرفعلها فطورها
جمانة : خديتي دواها من الثلاجه
سماح : اي خديته وطلعت
منى: تصلي راه شفته تو
سماح: به اكويس عشان تاكل فطورها ساخن
جمانة : ناضو البنات ؟
منى: اي بنتك نطت طول جت مصبيه أول ما فتحت الباب لكن الحصله في ساجده نومها ثقيل بكل
نختصرلكم
فطرنا وغسلت اماعين الفطور اني وساجده وماما درت خلطة العصبان وقعمزت هي ومنى يعبو فيه وسماح تعبي في البوريك واني نعجن في البيتزه وساجده تبرم في الكسكسي
____________________________
ساعه 12 الظهر
محمود : نسمع في سيارة تبيب بييي بيييب
سند : تو نطلع نشوفهم أكيد وصلوا
رجب : آذن الظهر ؟
سليم : مزال
سند : طلعت مش قدنا التبيب عيت جيرانه
سليم : خش جيبلنا طاسة شاهي يا ولد
سند : باهي
ساجده : قريب نكمل مزال نغسل الفواكه بس
اني: طيبت البيتزه وحطيتها في الحافظة
سماح : الحمدلله لحقنا على كل شي
قمريه حنتى : اللي وراه اليد ما يزيد
جمانة : سخني الشاهي يا بنت لهلك برا في المربوعه اهو جاي سند بيرفعه فيسع
اني : باهي يرجي اهو حطيت عالنار وهو طاير
سند : اي طاير لاني مانبيش نشوفك يا وجه الفقر
اني : على اساس اني ميته عليك يا مشفشف
سند : صقع عليك 😎
ساجده : اني كلمت بنطلع نقعمز في صاله لحقي علينا يا بقرة
سند : خدي السفرة والله بقره حقا 😂😂
اني : اخترام نفسك وانتي تو نوريك 😤
___________________
ايمن: كلموهم يفتحو لينا باب السور
ضحى : لالا ما حد يتصل خليها مفاجا
ايوب: يا امتاع المفاجأت هههههه
حسام : من يومها امك اتحب المفاجأت
اياد : حتنى نحبهم كان حد يبي يدرلي مفجأه 🙂
ايمن: اني مديرلك مفجأه اصبر عليا بس
اياد : شنو هي قول فيسع 😍😍
ايوب : وصلنا
يتبع ..
___________________
توقعاتكم الحلقة الجايه !
شن بيقول ايوب لما يشوف قمرية بعد كبرت ؟
هل سماح بتتزوج ولا بتقعد عزباء ؟
سند واياد زي التوام شنو بيصير لما يتلاقو ؟
هل ساجده تعلم بحب قمريه وايوب ؟
هذا كله بتعرفو جاوبه بعدين..
"مع تحياتي اميرة اغسطس ✍🏻
أنت تقرأ
# رواية_ لمة العيله💙
Romanceالرواية، تحكي، عن ..... لمة العيلة وعن قصة حب قمرية وايوب كيف تزوجها وعن سماح اللي بتتزوج براجل عند زوز بنات وعن اجواء الاعراس الليبية كيف تصير وشنو عداتنا وتقاليدنا وهلباااا حاجات بتصير فرح وحزن في شخص بيموت من العيله..
