الأمير

انا شخصيا ككاتب بدور كتير جدا علي اسم للبطل يبقي ملفت للنظر .. بس المرادي الحقيقة البطل ممكن يبقي اي شخص فينا .. هسميه "س" و س دا ممكن يبقي اي واحد او كل واحد فينا ..
"عربية عطلانة في نص الصحرا الساعة ٣ الفجر ممكن تكون احسن فرصة تشوف فيها النجوم و هي بتلمع في السما .. "
انا " س ".. العادي .. ممكن ابقي بشتغل في مصلحه حكومية او حاجه خاصة .. يمكن حتي سوبر ماركت .. بشوف الناس كل يوم وبيشوفوني .. بيشوفو شاب مكافح بيجري ورا لقمة العيش .. وانا بكره نظرتهم دي كل ما بشوفها .. انا مش العادي .. انا كنت المفروض ابقي مولود في زمن تاني زمن انا فيه سلطان .. زمن انا فيه بغير الدنيا ..
ساعات وانا ماشي في الشارع بتخيل نفسي فارس بقتحم قاعة عرش لملك ! و بشيله واقعد مكانه .. نزعة عدوانية يمكن !
القصة المرادي مش زي كل مرة .. القصة المرادي جوا دماغي ، تعالي افسحك جوا عقلي ! يمكن تفهمه احسن مني ..
انا شخص زيي زيك .. الفرق الوحيد اني بشوف الي انت مش بتشوفه .. بشوف تفاصيلك .. لما بمشي وسط الزحمة ببقي حاطط سماعات في وداني و مش مشغل حاجه .. ببقي سامعكو كلكو ..
ببقي شايف لمعه عين طالب ثانوي وهو بيبيص لبنت معاه في درس .. و الظابط الي بيبص في ساعته متوتر عايز يلحق الغدا .. و بشوف نظراتكم الي مليانة لا مبالاة و دعوات مكتومة ان اليوم يعدي ونوصل للنوم ..
بس انا مش زيكو ..
انا مش عايز ننام ..
انا بستني الشمس تطلع .. بدور ع المختار كل يوم .. بدور عليه جوايا ..
دايما بقول في نفسي انا اتولدت في العصر دا غلط ..
انا ليه متولدتش في عصر الفرسان .. انا ليه متولدتش سلطان .. انا ليه مش بغير العالم ..
الحقيقه حد قالي ان كل دا كلام ملوش اي لازمة .. يمكن بالنسبالك ميكونش حتي عامل جذب ..
زهقت مش كدا ؟
مكسل حتي تقرا الباقي ..
انا مش عارفك
بس انت عارفني اكيد .. انا نص الكوبايه الفاضي .. الحتة الي بتكسل تكملها من الصفحة .. انا كل حاجه انت نفسك فيها ومعندكش الطاقه توصلها ..
انا الانسان .. ربنا خلقني وكرمني علي كل الناس .. خلقني علشان احكم .. خلقني علشان اخد ب ايد الناس لفوق .. انا جوا كل واحد .. فكر فيها كدا ؟ كل انسان في الدنيا جواه اتنين .. ويمكن اكتر ..
واحد بيقوله يلا علشان تحقق يلا الفرص قدامك اهي
وواحد تاني بيقوله امشي جمب الحيط احنا مش حمل فشل ..
انسان يمكن في العشرينات ..يمكن قي التلاتينات .. يمكن مش عارف ؟
عمري اكتر بكتير من الي اقدر احسبه .. انا عشت كل العصور .. عشت في العصور الذهبيه .. بيسموها العصور الوسطي .. مليانه اختراعات وعلم .. الفرق بس انك بتبص من ناحيه غير الي انا ببص منها ..
عشت عصور الفوضي والدمار .. وعشت الازدهار .. شوفت المستقبل الي انت نفسك توصله .. وشوفت الماضي الي نفسك تنساه .. انا الحاضر الي نفسك تعيشه ..
شوقتك للحكاية مش كدا ؟
يمكن مفيش حكاية اصلا ؟
الحكاية جواك .. استناها تطلع .. شوية وقت بس ..
يمكن دا وقتك انك تكتب حكايتك بنفسك ؟

يمكن .. يمكن . 

انسلت الافكار الواحدة تلو الاخرى داخل عقل الشاب المتوسم في نفسه البطولة