ـ هو أنتِ دايمًا شيفاني غلطانة؟
ـ ما أنتِ فعلًا غلطانة يا دنيا!
ـ مش لازم دايمًا تحسسيني أني وحشة يا نور، تعبت من أحساس أني وحشة بسبب كلامك!
كنت بقرأ المسدچ وأنا مش مستوعبة الحروف! أنا بحسسها أنها وحشة! هو عشان بقولها إنها غلطت أبقى كده بوحشّها! هو المفروض عشان أرضيها أسقفلها على الغلط؟
ـ يا ستي أنتِ شايفة ده غلط، وأنا مش شيفاه، خلاص كل واحد حر على فكرة! أنتِ مش واليّة أمري.
للمرة الألف شيفاني بنتقدها! عشان بعاتبها للمرة الألف برضه على نفس التصرف! أقنعها أزاي أني خايفة عليها؟ أقنعها أزاي أني مش عايزاها تغلط عشانها هي مش عشاني! شايفه أني بتحكم فيها! طب أعمل إيه عشان أقنعها أنها لازم توقف عك في حق نفسها؟ أجرب أكلمها بهدوء وليّن؟
ـ ممكن نتكلم منغير شد وتفهمي اللي هقوله؟
ـ ياريت.
خدت نفس وبعدين كتبت:
ـ دلوقت كل الناس اللي حوالينا بيتكلموا عليكِ كلام مش لطيف، وأنتِ بقيتي بتفضلي الناس دي عني يا دنيا، يعني صداقتنا مش مهمة عندك؟ والناس اللي لسه متعرفة عليهم من كام شهر هما اللي مهمين عندك؟ وهما اللي ليهم الأولوية؟
ـ يا نور أفهميني، كونك أنك مش بتحبيهم ده شيء يرجعلك، لكن متفرضيش عليا رأيك، وناس إيه اللي هبعد عن صحابي عشان كلامهم؟
ـ بفرض عليكِ رأيي يا دنيا! يا بنتي أنا بحبك وخايفة عليكِ.
ـ أنتِ مش بتحبيني يا نور، بلاش تضحكِ عليا بالكلمتين دول! ويا ستي لو خوفك عليا هيخليكِ تأذيني بكلامك زي كل مرة يبقى يلـ. ـعن ده خوف مش عايزاه! أنا خلاص تعبت!
بضحك عليها! حُبي ليها بقت شيفاه شيء مُصتنع؟ خوفي عليها مش متقبلاه في حياتها؟! أنا بأذيها بكلامي؟ وجودي بقى مؤذي للشخصية اللي كنت بقول عليها بنتي! خوفي عليها دايمًا بيكون خوف أم على بنتها! كلنا بتغلط أه، لكن لازم حد يجي يقولنا أن اللي بنعمله ده غلط عشان نوقف الغلط!
وقبل ما أروح للتلت نقط اللي في الجمب مسحت دموعي وكتبتلها:
ـ وجودي في حياتك بقى مؤذي يا دنيا؟ وكلامك ده مش مؤذي ليا؟ دايمًا شيفاني وحشة، ودايمًا بتِرمي كلام زي السم في وشي، وعشان أنا مش بظهر زعلي بيكون بالنسبالك أني مش بحس! أني مش فارق معايا الكلام! هو أنا لازم أصرخ في وشك وأقول أني تعبت من كلامك، لازم أطلع سمومي عليكِ زي ما بتعملي معايا عشان تحسي بيا؟ كفاية يا دنيا، كفاية أستنزاف في طاقتي، كفاية تطلعيني أنا الطرف السيء دايمًا! على طول بتقولي أني مش بشوف نفسي غلطانة! طب ما لو شوفتي غلطي تعالي عرفيني عشان أصلح غلطي، زي ما أنا بعمل معاكِ! أنا مش ملاك بجناحات يا دنيا، أنا بغلط زيك، بس الأختلاف اللي بيني وبينك أن أنا بتقبل النصيحة، مش بشوفها نقد في تصرفاتي وفي شخصيتي! بالعكس بشوفها محبة، محبة صدقة مش مزيفة زي ما قولتي! سلام يا دنيا.
خلصت كلامي وأيدي كانت عارفه طريقها، خرجتها من حياتي أو... أو أنا اللي خرجت من حياتها زي ما كانت عايزه، حتى لو هعيش لوحدي، ولكن أحسن من أني أعيش وسط ناس شيفاني شخص مؤذي؟ لأ؛ أنا مش شخص وحش، أنا مش مؤذية، أختياراتي هي اللي صح مش أكتر، ولازم يوم ما أفكر أدخل حد حياتي يكون الشخص ده بيقبلني، بيحبني، متُقبِل كلامي ونصيحتي، يكون شايف حُبي ليه، وشايف كل شيء بقدمه من أجله، مش شخص يهاجمني بتصرفاتي اللي نابعة من قلبي!
#مشهد
#عشوائيات_الواقع
#NORA_SAAD
*******************
الموضوع جديد عليا وأول مرة أجربه، فضلًا لو المشهد عجبك أعمل ڤوت وسيبلي رأيك، وطبعًا مفيش مانع لو قولتلي حابب أكتب عن إيه، ولو لقيت تشجيع هنزل السلسلة على طول❤
وصحيح الفصل أحتمال ينزل بكرا أو الخميس، أشوفكم على خير لأني يجد منتظرة الريڤيو ورأيكم الأخير بتاع الرواية على نار❤
أنت تقرأ
عشوائيات الواقع.
Randomسوف آخذك معي؛ لترى مشاهد صغيرة، مشاهد متفرقه لا يجمعها أي شيء، ولكن كل ما يجمعهم هو أنت يا عزيزي! سوف ترى حالك بين جميع المشاهد، أو أثناء قراءتك سوف تتذكر موقف حدث لك منذ زمن قريب أو حتى بعيد! على أي حال تأكد أنك أنت وحياتك سوف تكونوا جزءًا أصيلًا م...
