The Breakers Corazon Sociedad Batch 2 Book 1: Bernard Buenaventura

Prologue

Prologue

"ILAN ba silang lahat?" tanong ni Rafael Choi kay Christopher Samaniego, Jr. habang nasa loob ng private bar ng Society Hotel.

"Twelve," tugon ni Christopher. "Kilala ko silang lahat kaya wala naman sigurong magiging problema."

"Sana nga," singit ni Vincent Fabella na kapapasok lamang ng private bar. "Pero siguradong hindi naman maiiwasan ang gulo, ang mahalaga ay manatili silang magtulungan kung may problema at patatagin ang brotherhood nila katulad nating sampu."

Lumapit sa table nila si Thaddeus Arzadon na may hawak ng isang bote ng wine. "Siguradong wala pa ring mas guguwapo sa akin sa bagong mga Breakers na 'yan," pagyayabang na naman ng lalaki at sinabayan pa ng malakas na tawa. "Pero, siyempre, para sa asawa ko lang ang kaguwapuhang ito."

Naghihikab na tumayo mula sa kinauupuan nito si Justin Aguirre. "Inaantok ako sa kayabangan mo Thaddeus," pang-aasar nito.

Ilang sandali lang ay nagkaroon na ng kanya-kanyang usapan ang mga lalaking naroroon. Tumayo si Christopher mula sa pagkaka-upo at inilabas ang cell phone para sana tawagan ang asawang si Rachel Leigh.

Napatigil si Christopher sa pagpindot nang lumapit sa kanya si Rafael. "So balak mo nang ilipat ang society sa pangangalaga ng mga lalaking 'yon?" tanong nito.

"Ako pa rin naman ang founder nito at walang magbabago doon," ngumiti si Christopher at iginala ang paningin sa paligid. "Gusto ko lang na may mga bagong gumamit sa Society Hotel, bihira na tayong magpunta dito. Parating na sila maya-maya."

Ngumiti rin si Rafael. "Wala namang problema ang magkaroon ng panibagong mga Breakers na makakasama sa society nating ito. Gusto ko na rin silang makilala."

"Huwag n'yo lang silang tatakutin," pagbibiro pa ni Christopher.

Tumawa naman si Rafael at tinapik ang balikat ng kaibigan. "Sige na, tawagan mo na ang asawa mo. Kailangan ko ring tawagan si Ashlee dahil siguradong gagabihin tayo dito, hindi ko gustong mag-alala siya."

Tumango na lang si Christopher at itinuloy na ang pagtawag kay Rachel Leigh na siguradong abala sa pag-aalaga sa kanilang mga anak.