راندا وهى بتضحك :يعنى انتى بدل ما تقابلى العريس هتقابلى امه
وهتخرجيلها بصينية العصير بقى وانتى مكسوفة ووشك فى الأرض
جيهان وهى بتضحك :اه وبابا يقول هنسيبهم لوحدهم شوية ونقعد احنا قصادهم فى الصالة
اميرة وهى بتضحك :وانتى كده هتستخيرى ربنا فى العريس ولا فى ام العريس
ابتسام وهى بتضحك :ولو مرتاحتش بعد الاستخارة عمى قاسم هيكلم العريس يقوله مفيش نصيب ولا هيكلم ام العريس يقولها
نسمة وهى بتضحك :ولو مقدرتش تاخد قرار من اول مرة هتطلب تقعد مع ام العريس مرة تانية
اه ده جواز وحقها تقعد مرة واتنين وتلاتة
الفكرة انه حقها تقعد مع العريس مش مع ام العريس
الاء :اه يا شوية متنميرين
ما خلصنا كفاية تحفيل عليا بقى
خفو الشربات شوية مش كده
كلكم على واحد مش رجولة يا كباتن
وبعدين يا حلوفة منك ليها بينو تعاطف معايا ولو بالكدب
راندا :خلاص متزعليش عايزين وشك يبقى منور ومزاجك رايق وانتى قاعدة مع طنط
انتى هتلبسى ايه صحيح
الاء بغيظ :تصدقو انا اللى غلطانة انى بتكلم مع جذم قديمة زيكم
جيهان :خلاص متقفشيش احنا بنهزر معاكى
فكى بقى مش قصدنا نرخم عليكى والله
اميرة بسعادة :بالعكس احنا عايزينك تتخطبى ونفرح بيكى ونلبس فساتين سواريه
ابتسام :احنا هنأجر ولا هنشترى فساتين
نسمة :ولا نفصل فساتين فى فساتين سوارية بتتفصل على فكرة
راندا :لا الفستان بيتحرق لما يتلبس مرة حرام نشترى او نفصل
احنا نأجر احسن
بس ايه رأيكم نأجر فساتين كلها نفس اللون ولا نخليها الوان مختلفة ونخلى اللون الموحد ده فى الفرح
جيهان :ممكن نخليها لون واحد فى الخطوبة والفرح عادى
نسمة :طيب ما نخليها الوان مختلفة بس شكل الفستان يكون واحد نختار نفس التصميم
ابتسام :فكرة حلوة
الاء :مش عارفة اوصفلكم فرحتى بحماسكم لخطوبتى وفرحى
ده انتم ناقص تختارولى اسماء ولادى
بس هو فى تفصيلة بسيطة وصغيرة يعنى مش كبيرة انتم ناسينها
انا موافقتش اتخطب لسه
انا مقعدتش معاه اصلا ورفضته قبل كده مرتين ده لو تفتكرو يعنى
ابتسام :اه صح
انتى هتعملى ايه مع طنط مامته دى
الاء :عايزة اسجد لربنا شكر من الفرحة
اخيرا حد سأل سؤال مهم وقال حاجة ليها لازمة
هعمل معاها ايه قولولى
جيهان :انتى لو مش عايزة الجوازة دى يبقى تطفشيها
عامليها وحش واتكلمى بقلة زوق وجليطة
الاء :عايزانى اعامل واحدة قد امى ويمكن اكبر منها وموجودة عندنا فى بيتنا بطريقة وحشة واكلمها بقلة زوق وجليطة
ليه متربتش انا ولا ايه
نسمة :خلاص عامليها ببرود
ردى ردود مختصرة فيها رخامة وملل وعدم حماس للكلام
بينى ان الموضوع تقيل على قلبك
راندا :اه كده هى تتحرج وتفهم انك رافضة رفض تام
الاء :انا مبحبش احرج حد ولا بعرف اصلا
ويوم ما احرج حد تبقى واحدة قد ماما
لا مش هعرف
اميرة :يبقى تسكتى خالص متتكلميش نهائى هزى راسك بس
الاء :ليه القطة واكلة لسانى
ما هى اكيد عارفة انى مش خارصة
راندا :انتى هتقرفينا ليه كل ما نقولك حلول متعجبكيش
خلاص مادام انتى محترمة اوى كده وكيوت يبقى عامليها باحترام لأنها فى مقام مامتك واحتمال تبقى حماتك وجدة عيالك
علشان ده مش اسلوب واحدة خارجة تطفش عريس وتبوظ جوازة
اميرة :معاكى حق يا رورو
ابتسام :ايوه فعلا
جيهان :ده حقيقى انتى شكلك مش عايزة تبوظى الجوازة
وشكلك عايزة تطلى بالأبيض
الاء:ولما انا عايزة اطل بالأبيض رفضته مرتين ليه فراغ
نسمة :طيب ما كفاياكى رفض مرتين
وتوافقى وتخلينى أاجر فستان احمر لخطوبتك
اتيليه سهر الليالى فى فستان تحفة عايزة أاجره علشانك يا لولو
راندا :جابو فساتين جديدة
نسمة :اه فى كولكشن جديدة هناك تحفة
جيهان :فيهم فستان تركواز او كشمير
نسمة :مشوفتش غير المعروض بره فى الفاترينة مفيش تركواز او كشمير
بس فيه واحد هافان هيبقى خطير عليكى
جيهان :حلو الهافان برضه ويمكن يكون جوه فى تركواز او كشمير
اميرة :خلاص احنا نروح ونشوف بنفسنا
ابتسام :فكرة حلوة اهو نشوف بنفسنا علشان لو ملقيناش حاجة حلوة نلحق نشوف فى مكان تانى
راندا :طيب عايزين نظبط يوم قريب علشان منتأخرش
الاء :متتأخروش على ايه هو انا خطوبتى الاسبوع الجاى وانا معرفش
انتم بترتبو لايه
لا ده كده فل اوى انا هخرج من المحادثة الجماعية دى
وشوفو انتم مين هتاخد الفستان الهافان ومين هتجيب الكشمير
راندا :يستحسن تخرجى فعلا من المحادثة ونخليها لتجهيزات خطوبتك
مينفعش تعرفى هنعمل ايه فى خطوبتك
فين عنصر المفاجأة
