#مريودتي
بقلم سندس مالك
-٨-
و مرات القسمه بتختنا في مواقف صعبه ، جاهليين الغلط يكون وين .. غلطنا وين انا و انتي عشان البينا ينتهي ! سوء تفاهم ؟ و لاعناد مني و منك ! و لا عدم رضا الاهل ! المهم انو مستقبلنا اتكتب مع ناس تانيين .. بقيتي مرة زول تاني و أنا ك راجل غريب عنك ما من حقي حتى اعاين ليك بنظره مسيئه ليك ، ما مقتنع بي أسباب زين الخلتو يعمل كده ! إحتمال انو هو فعلا كان قايل انك مجرد نزوه عابره في حياتي ؟ احتمال هو شايف اني نسيتك ! ما قادر القى ليهو مبرر ، و انا بعد اتكلمت معاك اخر مره عرفت انك عملتي كده عشان تختيني في نفس الموقف الختيتك فيهو ، بنلعب بالنار انا و انتي .. ما من حقنا هسي نعاتب بعض او حتى نسأل حصل كده ليه ؟ انا زاتي ماعارف الغلطان فينا منو ؟ انا ولا انتي ولا زين ! ... اتلخبطت التساؤولات الكتيره علي و الحقيقه ضاعت بينا نحنا التلاته .. منو المعاهو حق و منو لا ما عارف ياسندس ، كل العارفو هسي انو انتي بقيتي مرة راجل تاني و ما عندي اي حق عليك .. عارفه ياسندس المظلوم منو فينا ! ياسمينه الماعندها ذنب في معاملتي ليها و لا قسوتي عليها ، البتتسائل كل يوم الناقصها شنو ! لأول مره تمشي لي امها بعد مافترت من التساؤولات قعدت معاها و حكت ليها .. عن معاملتي ليها و عدم قربي منها ، أمها استغربت كبقية الآمهات قالت ليها ليكم تلاتة شهور مع بعض ؟ العيب في منو فيكم ! كانت بتبكي و بتحكي ليها و كأم ماعايزة بيت بتها يتخرب قالت ليها اقترحي عليهو سفره كده امشوا روقوا فيها و بعد السفره تعالي احكي لي الحصل شنو ؟ اذا الموضوع ما اتعالج بعد كده انا بعرف اتصرف كيف .. كنت بشفق على ياسمينه اي صح هي مظلومه بس ما زعلان عليها بس شفقان على حالتها ، هي الرضت تخت نفسها في الموقف ده و رضت بالعرس ده زي ما هو كده .. جاتني ياسمينة و انا في الغرفه شتيل اللابتوب شغال قعدت في الكرسي و كانت بتعاين لي عرفتها عايزة تفتح معاي موضوع قلت ليها قولي الكلام الجيتي عشانو ؟ قالت لي رياض ممكن نعمل سفره ! قلت ليها سفر شنو هسي حاليا في الاوضاع دي مش عارفاني مشغول الايام دي ؟ قالت لي اي عارفاك مشغول بس قالوا باريس الايام دي جوها حلو شديييد .. علييك الله خلينا نمشي لو اسبوعين بس ؟ قلت ليها ياسميينه كدي خليني اكمل شغلي و بعدين بنتفاهم .. وقفت على حيلها وقالت لي عاين يا رياض انا نازله تحت تمام ؟ ما دايره اتناقش زاتو و خليك في شغلك ، ماشه لي لينه تحت .. بعد وصلت الباب قبلت عاينت لي بنفس الصره وقالت لي عازمين ناس زين و سندس عندنا بكره ف ياريت تفضي نفسك شويه لصحبك اذا ممكن ؟ لأنو اساسا ما اتكلمت معاهو بعد العرس و ياهو نفس عذرك مشغول ! ما تحرجنا مع الناس لأننا عزمناهم و حيجونا بكره ... طلعت وقفلت الباب ، اتفاجأت انو سندس بكره جايه ؟ اتجنبتا اشوفها في العرس مع زين و هسي بكره جايه لحدي عندنا ! لو طلعت لي اي مشوار ياسمينه ح تبدا تلاحظ هروبي منهم ؟ و هي اساسا ملاحظه تغيري مع كل الناس .. ما كان عندي حل غير اني استقبلهم الاتنين و احاول ابين اني مبسوط مع ياسمينه قدامها ، جا يوم بكره الأنا كنت شايل همو و ك زول عارف تفاصيل سندس عارف انها ح تكون متشووقه و مبسووطه انها جايه بيتنا البيت الاتطردت منو و اتهانت فيهو ، شفتها 😢 بالتوب و الحنه و جمالها الزايد 😢 شوفتها زادت علي الوجع وجعيين ، قعدت قدامي كانت بتعاين لي بنظرات ثقه و قوه ما حصل شفتها فيها قبل كده .. قواكي زين ! الإبتسامه الفي وشك دي سببها هو ؟ في لحظات نسيتي كنت بريدك قدر شنو ؟ لمن بنقول البنات بياعات كانوا البنات بعترضوا على الكلام ده ، دايما راميين اللوم على الشباب محملنهم مسؤولية عدم الجدية دايما و عدم الوفاء ، و انتي كنتي الزوله الوحيده الإتمنيتتها لي و برضو طلعتي زيك زي بقية البنات ، لما اشوفك بتمنى لو رجع بينا الزمن و عاملتك زي بقية البنات اللعبتا بيهم ، ما كنت ح انكسر و ما كنت ح انعوج كده ، بعاين لي زين و حاولتا اتجاهل نظرات غرورها الطاردتني بيهم ، بعاين لي زين ! مبسوط ؟ عادي كده ! لييه الناس ديل شايفين مشاعري دي حاجه عاديه ممكن تترمي على جنب و من فوقها مصالح الناس اهم ، ليه انا دايما المهمش و المركون في الرف ! سعادة كل الحوليني لازم تعلا فوق سعادتي ؟ ياسمينه طركت الفكره تاني بتاعت السفر قلت ليها لا برضو ، بس زين وافقها متأكد انو وافق لمن شاف ردت فعل سندس على موضوع السفر لمن شاف وشها اتغير شدييد بعد قالوا السفر وبسرعه قالت لا ! حسى بي انها ارتبكت عشاني ؟ حاول يثبت لي نفسو و لي انها ح تسمع كلامو و ح تمشي و ما حيفرق معاها اذا كلنا كنا في نفس المكان ، فعلا لمن شافها اصرت على لا هو اصر على المشي ، ك اتنين رجال عارفين فهم بعض حاولتا اثبت ليهو انو هي زاتها ما ح تفرق ف وافقت لمن شفتها اصرت على لا و هو عايز يمشي ، بتقول اني نسيتها ! بكل سهولة عندك جيت بررتا لي اسباب عشان تعرسها ! بكل بساطه بعتا عشرة صحبك و بتقول انها كانت وحده عا
ديه و انت اكتر زول عارف صحبك و عارف انها الوحيدة الما كانت زي باقي البنات ، للحظه قلبي اتغير اتجاه زين بطريقه سوداء مؤذيه جدا بعد موافقتنا كلنا على الرحله رتبنا المواعيد و قررنا مواعيد السفر و ما هي الا ايام و كنا وصلنا باريس الاربعه ، في يومنا التاني بعد الوصول كنت واقف بسجر في البلكونه شفت سندس نازله و الجو بارد ماشه في الكورنيش و قعدت على الكرسي مواجهه عربية القهوه ، شالت كباية قهوه من الورق و بقت بتشرب فيها كنت بعاين ليها و بسجر بسجر كتيير لساعه و شويه هي قاعده و انا من فوق مراقبها ؛ من وراي فجأة سمعتا ياسمينه شكلها صحت ياداب قالت لي رياض واقف في البلكونه مالك ؟ قلت ليها صباح الخير عايز اشم هواء شويه .. قالت لي اجيب ليك حاجه تتغطى قلت ليها لالا شكرا .. قعدت في الكرسي برضو في البلكونه و انا طوالي غيرت نظراتي لبعيد قالت لي رياض هيي عاين مش ديك سندس قلت ليها وينها؟ قالت لي هناك مالها نزلت من الفندق براها؟ عاينتا ليها وسكتا قالت لي يكون زين ما صحى ؟ قلت ليها انا عرفني شنو ؟ قالت لي مالك طيب بتتلائم ؟ قمتا على حيلي وخليتها مكانها عارف انها زعلت وصرت صرتها الواحده ديك .. عارف انو ياسمينه مستحملاني شديد بس مافي يدي حاجه اقدمها ليها ، دخلتا جوه و خليتها في البلكونه بره لحدي ما ضربت ليهم وقالت ليهم نفطر سوا تحت .. اتلاقينا للفطور جات نازله و المره دي مع راجلها ! 😢 للحظه ندمت على جيتي و انا بهرد في قلبي لسه معاها .. اتونسنا وفطرنا و حاولتا اتجاهلها وما اعاين ليها كتير لو قدرتا ، كان لازم نطلع بالمساء كم مره ورا بعض كده و طلعنا فعلا الاربعه لحدي ما سندس تعبت و نزلتها زادت 💔 لمن شفتها عيانه و ماقادره تمشي حفله صاحبنا الاتعزمنا ليها كلنا الاربعه اخدني الزمن لي ورا و ااتذكرت مره و انا بتكلم معاها زمان ، كانت معزومه عرس وحده من صحباتها في الدفعه و هي مريضه وجسمها مكسر كانت بتتكلم معاي وصوتها متغير ايام الراحه الكانت بينا لمن نسمع اصوات بعض في التلفون ❤ متذكر اني بقيت اشاغل فيها وهي زهجانه من الالتهاب و بتعطس و في نص المكالمه غنيت ليها " ياريتني يشيلني الغيم و اجيك و اسهر عليك و اكون حداك ، و ادفي راسك بي ايدي عز البرد سندك غطاك"
#كسرة
البتحس بي انو الروايه دي فيها تعدي او حاجه عيب تتجاوزها ..
الرواية انا كاتباها من احداث واقعيه ❤ .. و بناقش فيها قضايا كتيره يمكن في ناس ما منتبهين ليها بس بقروا فيها ساي .. بس المركزين ح يعرفوا بعدين القضايا الانا عرضتها في الروايه دي❤
