#طوبى "جنة طوبى"
#جمان_فريد
#الجزء_الحادي_والسبعين"روزناما القسم الأخير"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#دعاء_ذي_النون
ْدعاء ذي النون وهو في بطن الحوت،
قال النبي ﷺ:
دعوة ذي النون وهو في بطن الحوت:
لا إله إلا أنت سبحانك إني كنت من الظالمين، فإنه لم يدع بها رجل مسلم في شيء قط إلا استجاب الله له.
الالباني في صحيح الترغيب والترهيب ١٨٢٦
🌿🌿🌿🌿🌿🌿🌿🌿🌿🌿🌿🌿🌿🌿🌿
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 لن يُحمّلكَ اللهُ شيئاً لا تقوَى عليه...لذلكَ أنتَ دوماً تستطِيع..🍃
_________________________________________
في طريق عامرة بالناس والحركه..
كانت عبير مدرسة سيارتها ع تركينه وهي تسمع من طوبى ماصدمها وضايقها في نفس الوقت..
عبير بصدمه وضيق..
/وحني اللي حاسدينكم ع علاقتكم ونتمنوا في راجل زي راجلك!
طوبى وهي شاده دموعها بقوة..
/ماهو ماليكم الا الظاهر..
عبير بحزن:مش عارفه كيف وحده زيك انتي يخونها..
طوبى بألم؛وعلاش شن فيا زايد..مافياش ميزة ولاحاجه فريده بش ماننخاش..بالعكس اني عاديه زي هلبه نساوين دايرات واجبهم والزايد لايعرفوا يقولوا لا ولايقدروا يقصروا وديما يسايروا ويتحملوا حتى ع حساب انفسهم..
عبير؛المراة اللي زي هكي هي اللي مفروض يحافظوا عليها ياطوبى..
ابتسمت طوبى بألم وقالت:يحافظوا عليها لانها معيشتهم في استقرار وراحه..لكن مايحبوهاش..
عبير بضيق:مش عارفه شن نقولك..
طوبى؛ماتقولي شي ماينفع في شي الكلام توا..تنهدت وقالت..هي روحي بيا للحوش..
هزت راسها وشغلت السيارة وتحركت طول...
وبعد ماتحركت السياره طوبى لفت وجهها للروشن وقعدت تمسح في دموعها قبل لتنزل..
بعدين رسمت ع وجهها ملامح عدم الاهتمام ولفت وجهها القدام...
🍃🍃🍃🍃🍃
"كل مرة براي"
عبد القيوم:مش هك..بس مرات وين تنوى ع حاجه تبي ديرها يجيك شي قوي يمنعك هي هذي..
زميله؛اليومين هادم جوك مش اللي هو صايره معاك حاجه قولي عبدو بالك نقدر نساعد..
عبد القيوم حرك راسه بالنفي وقال:لا مافي شي..بس تقدر تقول مشتاق لهلي ونبي نعدي نشوفهم..
:وبرا ياسيدي خود اجازة وبرا ع الاقل صيم اول اسبوع عندهم.
فرك عبد القيوم صدغه الايسر باصابعه السبابه والوسطى وهو يقول:نفكر فيها...
فجأة رن تليفونه..
نزل يده وعقد حواجبه وخداه من الطاوله لما شاف المتصل ابتسم وفتح الخط وقال..
/القلوب عند بعضها..
"بأمارة الاتصالات اللي كل خمس دقايق يجني منك"
هو بضحكه قال..
/توا طلعت لانرن ولانسأل!..
"لاياباتي مانك مقصر واجد شويه بس"
قعد يضحك..
"اسمع"
/اي نعم..
"جاينك جاينك"
بإبتسامه واسعه قال..
/قلبي حسها والله..امتى؟.
"بكرا بعد العصر نكونوا في طرابلس نكملوا معاك اسبوعين شن رايك"
هو قال:كان عليا انا ماتروحيش بكل..
"ياحبيبي..اها بنقولك جبريل ومراته قال عمك بيجوا حتى هما "
عبد القيوم؛جايين من مصر ؟
"ايه قالوا بيصيموا في ليبيا بين بنغازي وطرابلس"
عبد القيوم:معناها جايين زياره لعيت الواعر..
"اكيد ما عندهم غيرهم معارف في طرابلس"
عبد القيوم هز راسه وهو يقول..
/اممم..
"هي مال مانعطلش عليك نتلاقوا بكرا ان شاء الله"
عبد القيوم:ان شاء الله..تهولتنين امدان "سلمي ع الجميع"...السلام عليكم...
ونزل تليفونه بعد ماسكرت عمته وقال..
/اهم بيجوني برواحهم..
زميله وهو مبتسم قال؛طيب فيك..
عبد القيوم؛مرات ناخدوا مزرعتك يومين تلاته..
:المفتاح وعندك امتى ماتبي برا اني في رمضان مانمشيش غادي..
عبد القيوم؛لكن كان قتلك تعال افطر معانا تجي..
:مانقولش لاللعزايم..
ضحك عبد القيوم بعدين تنهد تنهيده طالعه من الشعور الغير مريح اللي قاعد مسيطر عليه الفترة الأخيره...
🍃يقولوا راحة بال من النعم اللي ماتتقدرش بثمن..
وهي من النعم المنسية اللي مانحسوش بقيمتها الا لما نفقدوها..
فاقد هالنعمه يقعد عايش في حالة قلق وخوف طول الوقت
وهذا اللي صاير مع عيلة لطفي الواعر وع راسهم طوبى بالذات بعد اللي صار اليوم..
الراجل وصلت بيه يهدد بالسلاح..وبعد اللي داره يتكلم عن رجوعها ليه وكأنه امر حتمي..
واللي زيه وفي حالته حيديروا كل شي بش يوصلوا للي يبوه..
وبالذات بعد ردة الفعل اللي دارتها عليه حيزيد الوضع سوء...
باهي لمن تحكي وتقول..
تشوف في وجوههم البائسه وحاسه بالثقل المحطوط ع قلوبهم بعد اللي صار فيها..
كلهم موجوعين عليها فوق اوجاعهم..ماتبيش تزيدهم على مابيهم وترعبهم...
بس هي لازم تقول لحد لازم يكون في حد عنده علم...
🍃مقعمزة في دار الخزين فوق السطح وهي حاطه التليفون
ع وذنها..مدايره اتصال بحد وتراجي في رده...
انفتح الخط وقال..
"السلام عليكم طوبى بنتي كيف حالك"
طوبى:وعليكم السلام خالي..ان شاء الله ماعطلتك ع شي..
"لابنتي حاليا فاضي"
طوبى تنهدت وقالت بشي من الربكه؛باهي..خالي نبيك في موضوع ونبيه يقعد بيناتنا..
"ان شاء الله خير"
تنهدت تاني من التوتر بعدين قالت..
/خالي الجالي يهدد فيا..
"لحظه طوبى لحظه"
سمعت صوت تسكير باب بعدين هو قال..
"احكيلي اللي صار بالتفصيل"
🍃وحكتله طوبى ع كل شي بس قصت جزء المرض متاعه الموضوع حساس بالنسبه ليها هلبه بالذات بعد اللي داراته اليوم قلبها اللي ماتعلمش يأذي حد من قبل مش مطاوعها تأذي انسان بمرضه...يابال لو كان اب بنتها...
بس يكفيها تقول انه جاها يهددها بالسلاح بش تنعرف مدى خطورة الوضع..
"شوفي طوبى الفتره هادي ماتطلعيش من الحوش الا للضرورة ولو اضطريتي تطلعي عطيني علم وقتها"
طوبى بقلق:اني خايفه لو ماقدرش يوصل فيا يوصل في حد من العيله..
"مادوريش الموضوع هدا اني تو نتصرف المهم ديري اللي قتلك عليه..وحاجه تانيه شفرتك اللي عندك كسريها احرقيها المهم تخلصي منها وديري غيرها"
طوبى بخوف:علاش!؟
"مرات يهددك بمكالمه او رساله يحاول يخوفك او يضغط عليك فاهمه عليا خالو"
طوبى هزت راسها وهي قلقه جدا وقالت..
/ايه فهمتك..
"خالو ماتخافيش بإذن الله حتخلصي منه في القريب العاجل "
طوبى بلعت ريقها وقالت..
/يارب..
🍃ونهي معاها المكالمه وهو يطمن فيها ومن داخل كان متوجس بعض الشي..
بعد ماسكر منها دار اتصال تاني..
قعد يراجي لحظات لين رد الشخص اللي اتصل بيه..
المحجوب:وعليكم السلام عليكم عبد القيوم كيف الحال........
الحمد لله......عبد القيوم فاضي توا؟.............تمام نتلاقوا في ***** نبيك في موضوع.......تم بعد نص ساعه نشوفك..وعليكم السلام...
🍃🍃🍃🍃🍃
الساعه 5:00عصرا...
في احد الاحياء المشهورة في العاصمة طرابلس..
فيلا كبيره ع تلاته ادوار..
في الدور التاني اللي كانوا فيه الديار...تحديدا في دار المعيشه..
كانت في مراة خمسينيه مقعمزة جنبها بنوته عمرها ماتعداش 15 سنه..
الزوز ياكلوا في المكسرات ويتفرجوا ع التلفزيون..
مناسك؛يقتل القفطان يافيزو يقتل..
فوزيه"مرت بوها":لكن ياكبدي يبي وحده سمباتيكه..
مناسك نخصتها بكتفها وقالت؛وانتي اقوى سمباتيكه فيزو..
فوزيه:لاعاد مش زي هادي ياكبدي ممصوصه زي عصاة المكنسه..ماني عارفه كيف عايشات هادم..
مناسك بضحكه؛ع السلاطه والخبز الاسمر لاعصبان لارشده كسكاس..
فوزيه؛يافرخه جيت بندير رجيم كرهتيني فيه..
مناسك وهي تضحك؛رجيم شني ورمضان جاي يافيزو..
"يااااpepole"
فوزيه؛هني هني..
خش عليهم وهو يقول..
/فرخه مناسك نوضي جيبي الغدي فيسع..
وقعمز جنب مرت بوه..
ناضت مناسك وهي تمتم.بتذمر ومشت طلعت من الدار..
فوزيه:وين كنت..
هو شبح للتلفزيون وقال؛في القهوة..ابتسم ابتسامه عريضه وقال..خطيره.هادي..
خدت فوزيه الريموت وغيرت ع الرسميه..
شبحلها بضحكه وقال:حطي ع Bin sport..
عطاته الريموت وقالت؛هاك حط بروحك..
خدي الريموت ورد قناة عرض الازياء..
فوزيه:جيب جاي جيب
هو وعيونه في التلفزيون قال بضحكه..
/غير شويه بس يافوزشين..
قعدت تتلاحق.في الجهاز وهي تقول..
/هات جاي يلي ماتتحشم..وقعدت تتعارك معاه وهو يضحك عليها لين خدت منه الريموت وحطت ع الرسميه ودست الريموت تحت رجلها..
هو قعد يشوفلها ويضحك..
فوزيه ربعت ايديها وهي تشوف للتلفزيون وتقول..
/اسمعه اسمعه يحكي ع بر الوالدين..
مالك؛وخيرني اني مش بار يافوزيشن ماهو ديما نكركرلك وندهور بيك ونرفع فيك لمشاويرك..
فوزيه هزت راسها وهي تشوف للتلفزيون وتقول..
/ربي يهديكم وخلاص..
تنهد وقال؛شن قاعده دير هادي طيب فيه من اول وجديد!؟
ع خشتها وهي تقول..
/هاني جيت وانت ديما متصربع..
هو قال:حطي الصفره وانتي ساكته
حطت السفره قدامه ومشت قعمزت حدا فوزيه..
هو بدي ياكل..
وفوزيه قالت.لمناسك؛اسمعيه كيف يحكي ع بر الوالدين..اسمعي شن يقول ع الام..
باستها من خدها وهي تقول..واعسل ماما في الدنيا..
شبحتلها بطرف عينها بعدين تنهدت بيأس وشافت للتلفزيون..
مالك؛والله يافوزيشن اللي توجعي في راسك وتعبي في روحك ع الفاضي..
فوزيه؛اني ماقتلكم حبوها اني نبيكم ديروا واجبكم ع خاطر ربي بش يفتحها.عليكم..راهو ربي قال لو يشركوا بيا.عاملوهم.كويس كيف المسلمين؟
مالك قعد ياكل بلامبالاة لكلامها..
مناسك بضحكه:فكرتيني بالبنيه اللي جت جديده للمدرسه هدرزتلها وفضفضت شويه طاحت فيا نصايح هادي امكم مهما كان امكم..
فوزيه؛ربي يكملها بعقلها البنيه هادي شدي في صحبتها باهي..
مالك عقد حواجبها وقال:
/اسمها..ومكان سكنها..وبوها شن يخدم وامها شن تخدم فيسع..
مناسك بضيق:مبردك مالك فوتني ترا..
فنص فيها خافت وادرقت ورا فوزيه..
فوزيه:البنيه كويسه ياملوكه..
مالك بنرفزة؛وين تعرفيها يام بس..فرخه مناسك تكلمي خير مانخليك تدوي بطريقتي..
طلعت من ورا فوزيه وقالت وهي مضايقه..
/اسمع كان عرفت امها شن تخدم ماتقوليش معاش تكلميها..
مالك غمض عيونه بنفاد صبر وقال؛تكلمي..
تأففت وقالت؛بوها متوفي وماعندهاش خوت ولاد وامها..
رفع حاجبه..
مناسك بتوتر:مزينه..
ولى للسفره وهو يقول..
/خطي عليها بالاحمر..
مناسك وهي قريب تبكي..
/لامالك بالله عليك لا البنيه محترمه وعسوله وخشت خاطري ونبيها تولي صاحبتي..
فوزيه؛وبعدين تعالى جاي خيرهم المزينات!؟
مالك؛ماخيرهم شي لكن اني مانبيش اختي تصاحب بنتها..
مناسك وهي تستجدي في عطفه..
/البنيه يتيمه وتوجع القلب والله تصخف ومش متاع دوة فاضيه والله كان تشوفها تصخفك اول ايامها في المدرسه تقعد ديما مقعمزه بروحها وماتبيش تكلم حد تحسها متعذبه في حياتها ياروحي..
هو رفع الكاشيك لفمه بياكل عادي..
فجأه وقفه وقعد يدور في عيونه وهو يفكر..
بعدين نزل الكاشيك وشاف لأخته وهو مضيق عيونه وقال..
/امها شن اسمها؟
شبحوا لبعض هي وفوزيه بعدين شبحتله وقالت..
/معروفه هي..فايزة الخويلدي..
بدت ع وجهه ملامح الدهشه..
ومناسك وفوزيه لاحظوها عليه..
مناسك؛خيرك!؟
رمش عيونه بعدين عقد حواجبه ورجع بياكل وهو يقول..
/لاكان مزينه معروفه مش مشكله..
وحط الكاشيك في فمه..
فوزيه ومناسك شافوا لبعض بإستغراب بعدين شافوله..
مناسك:قصدك عادي نصاحبها ونخليها تجيني؟
هز راسه وهو ياكل....
ضحكت مناسك بفرح وقعدت تغني وتصفق..
/وخويا ياخويا ياخويا..
وفوزيه زغردت بصوت واطي بعدين ضحكت..
هو قال؛خلاص اسكتي..
قالت؛هاه..وحطت يدها ع فمها..
وهو رجع ياكل..
وفي لحظه جو بين عيونه عيونها الخايفات الغارقات بالدموع..
تنهد بضيق بعدين رفع راسه للتلفزيون وقال..
/ترا علوا الصوت علوا..
تعجبت فوزيه وقالت:ياهادي ياربي..
وعلت الصوت..
ومناسك تشوف لخوها وهي متعجبه...
🍃🍃🍃🍃🍃
"تفضلوا ابله فايزة"
فايزة وهي دخل في مواد غذائيه وسبيزة قالت..
/سامحينا ياوصال تعبناك من غادي لهني..
:ع اساس جيت كعابي ماهو جيت في سيارة..
فايزة؛ساده ترقايتهم للدروج..
وقعدوا يدخلوا في الحاجات هي وبناتها..
بعدين فايزة قال؛قعمزي هدرزي..
:مرة تانيه ان شاء الله السوبر ماركت معبي بشر خلاص رمضان بعد غدوة..
فايزة بإبتسامه:كل سنه وانتي طيبه..
وبإبتسامه ردت؛كل عام وانتم بخير..بالسلامه.
فايزة؛في امان الله..
ومشت تسقد فيها..
تاله وهي تشوف للحاجات؛هذا كله من اشرف؟
ابتسمت صفاء ومروة تشوفلها..
ع جية فايزة وهي تقول..
/ربي يهديه هكي يحرج فيا..
صفاء:عادي ماما هدا ولدك مش نسيبك بس.
فايزة؛مانبي حد يقول خلوه يصرف عليهم..
صفاء:ياماما طز فيهم الناس معاش دوريهم هما كان يلقوا مايقولوش لا..
مروة:صح ماما.
فايزة بحزم؛المرة هادي نقبلها منه يعاودها بنردهم علبه.
هزت صفاء راسها بآستسلام وموافقه...
فايزة؛هيا عاونوني خل ندخلوهم للكوجينه..
ورفعت شكاير ومشت خشت بيهم للكوجينه ومروة وتاله لحقوها بشكاير..
اما صفاء طلعت تليفونها من جيبها وكتب رساله لأشرف..
(شكرا)
وردت التليفون لجيبها ورفعت شكاير وهي مبتسمه من قلبها ومشت للكوجينه..
☘وفي الحوش اللي جنبهم..
كان حسين يدخل في زوز خرفان بش بيذ.بح.وهم الليله..
وبوه وجده واقفين يشوفوا فيه كيف يدخل فيهم ومعاه واحد..
علي:حطهم غادي غادي..
حسين وهي يكر في واحد منهم..
/حاضر..حاضر..
صفيه وهي واقفه في الباب شافتهم بعدين خشت واتصلت بمطيره اللي ردت عليها طول..
/جابوهم توا..
☘ومطيره من دار المعيشه في حوش خوها ردت عليها..
/خلاص الليله نقعمزوله لحم وبطون..
"ان شاء الله"
وحداها غرفه تشوفلها وهي تتكلم..
☘وبرا من الدار..
في الكوجينه..
كانت فردوس تجهز في حافظات التوابل والحرارات وتحط فيهم في مكان جديد بعد ماغيرت شكل الكوجينه كلها اليوم...
☘وبرا من الكوجينه في الجنان...
كانت آلاء ع الحصيره وهي مربعه رجليها وشاده تليفونها وتشوف في وصفات حلو جديده وتاخدلهم ف "سكرينات"..
☘وحداها بمسافه تحت شجرة الياسمين..
كانت طوبى شاده المصحف وتقرا منه بصوت مسموع ليها هي بس...
"-﴿قَالا رَبَّنَا إِنَّنَا نَخَافُ أَن يَفْرُطَ عَلَيْنَا أَوْ أَن يَطْغَى﴾﴿قالَ لا تَخَافَا إِنَّنِي مَعَكُمَا أَسْمَعُ وَأَرَى﴾"
☘لاتخافا..إنني معكما...أسمع...وأرى☘
🍃🍃🍃🍃🍃
وبرا اسوار حوش لطفي الواعر..
كان عبد القيوم مقعمز في القهوة متاع نضال بروحه وهو يراقب في الوضع ومرة مرة يشوف جهة حوش الواعر...
☘وفي من ملاحظه ومركز عليه...
فراس التونسي اللي ليه فوق الشهر لتوا يبي يعرف شن صار بين الجالي وطوبى..كل اللي فهمه ان الوضع بيناتهم على غير مايرام....
شويه غير عيونه عن عبد القيوم للكانتر اللي جت ووقفت قدام حوش شنيبه..
شويه طلعلها عمر...
ونزلوا منها رجاله وخشوا معاه داخل..
بعد بضع دقائق..
طلعوا بقطع اثاث وقعدوا يركبوا فيهم للسيارة..
🍃عمر وهو واقف يشوفلهم كان حاس بحسرة كبيره في قلبه...
تفكر لما خداه وجابه للشقه..تفكر كيف كانت فرحته كبيره وشوقه اكبر لإجتماعه بأكثر انسانه حبها قلبه...
🍃ويشاء الله اميمه تروح في هالوقت وتشوف هالمشهد حتى هي..
جو عيونها ع كنبه كانت ليها ذكريات حلوة معاها..
وهما مقعمزين يتفرجوا ع فيلم مع بعض ويهدرزوا ويضحكوا مع بعض..
حست في هديكا اللحظه بحنين شديد لهديكا اللحظات..
وبشوق كبير لعمر اللي حباته..
🍃وماتعرفش انه كان يشوفلها وهي تتفرج بحسرة وألم زيه هو..
غيرت عيونها ليه..
وتلاقت عيونهم...شافت في عيونه نظرات الألم..
عكس نظراتها هي اللي كانت نظرات لوم وعتب...
بس كله خلاص معاش ينفع توا..
اللي ينكسر معاش يتصلح وعمره مايرجع زي ماكان...
غيرت عيونها عنه وضربت منبه الصوت..
طلع حسين ومع الرجاله...فتحلها الباب وهي طول خشت بسيارتها..
نزلت منها وهي تشوف للخرفان قالت بإبتسامه..
/ان شاء الله كل سنة وانتم طيبين..
بوها هز راسه..
اما جدها قال:وانتي طيبه..بعدين عقد حواجبه وقاللها..
/خيرهم عيونك؟
اميمه ؛خيرهم؟
بوها قعد مركز في عيونها..
علي؛زي اللي فيهم بكي..
ضحكت وقالت؛مافيهم شي جدي غير النوم نبي نرقد بس..
علي:راجي لين يذن المغرب صلي وبعدين ارقدي..
هي بإبتسامه قالت؛حاضر..ومشت خشت داخل..
فيسع تلاشت ابتسامتها وتبدلت بملامح البكاء سرعت خطواتها لين وصلت لدارها خشتلها طول وسكرتها عليها..
🍃🍃🍃🍃🍃
"يعني مش مضايقك الموضوع"
:علاش بيضايقني! خواتك خواتي يامروة وانتي تعرفي بس نبي ندوي ع حاجه وحده طلوعها.من الحوش مايكونش لغير خدمتها وكان بتطلع لمكان تاني انتي معاها..
مروة؛اكيد من غير ماتوصي..
:ماشي للمحل ماتبي شي..
مروة؛سلامتك...
ومشي راجلها طلع من حداها..
وهي خدت تليفونها وقعدت تكتب في رساله بش تبعتها لصابرين..
🍃وصلت لصابرين وقرتها..
بعدين قالت؛قالتلي تعالي غدوة الصبح..
نجاه:واني غدوة العشيه نكون غادي..يللا مش مشكله اصلا ماقعدلي شي نحوس عليه..
صابرين:زعمه ترتاحي يانجاه غادي؟
بنبرة مكر قالت؛هدا وين بنرتاح.
صابرين:ردي بالك من خديجه ماتقعديش ماشيه وراها وانتي تهزي في راسك..
نجاة قلبت عيونها بملل...
صابرين؛انتي حرة اني عليا ننصحك بس..
نجاة بتكبر؛خليها لروحك تنفعك اكثر..
وناضت وخلتها ومشت خشت لدارها..
صابرين بعصبيه وصوت عالي؛الحق مش فيك الحق فيا الكل.به اللي حارقه دمي عليك..
🍃🍃🍃🍃🍃🍃
يسوق في سيارته وهو يسمع في اغنيه لمغني شعبي ويغني معاه..
"خليها..خليها..خليها بالنصيب"
شويه جاه اتصال..ضغط زر فوق منظومة السيارة انفتح الخط وقال..
/ايوه..
"هاشن جو "
هو غير ضي السياره ولف يمين وقال..
/تمام..
"وينك توا"
بضحكه قال..
/توا كيف خشيت للشارع اللي فيه المركز..
"ايوه سلم وخيي حولها هالمصيبه وفكنا من دوشتها"
ضحك وحرك راسه بإيجاب وقال..
/حاضر..حاضر..ماتبي شي..
"الموزريلا يااسكندر الموزريلا ماتروحش من غيرها تنساها بات في المقر متاعكم"
هو فتح يده وشافلها وقال بضحكه..
/والله كاتبها ع يدي بش ماننسهاش...
"ان شاء الله ياربي ان شاء الله تروح بيها'.
هو بضحكه:تي خلاص عاد سكري مكثر دوتك..
"خزي ع وجهك"
وسكرت الخط..
وهو يضحك..بعدين خش للمركز وشاف اسمه بش يتأكد..ودرس السيارة...
🍃داخل..
اريج وهي تسكر في جهاز التعقيم قالت..
/ياربي نبي نروح بش نلحق ناخد الحاجات..
طلعت من حجرة التعقيم ومشت طول لحجرة الكشف وهي تقول؛خلاص تموا الحالات..
منيه؛راجي شويه بالك يجي حد..
سكتت اريج ومشت قعمزت ع الكرسي..
منيه؛خيرك مستعجله؟
اريج؛عندي مشوار بعد العياده بناخد حاجات..
منيه بإبتسامه؛تمام كان جت حاله توا حتكون الاخيره ونستاذن ونطلعوا..
ابتسمت اريج وقالت:سلمها ياربي..
ضحكت منيه..
شويه جاها اتصال..
رفعت السماعه وقالت؛نعم.......ابعتيه طول..وسكرت..
منيه؛في حالة صاحبها جاي توا..
ناضت اريج ومشت للباب..وفتحاته...
طلع في وجهها..
هي بإبتسامه جاده:اهلا وسهلا تفضل..
هو كانت باديه على وجهه ملامح المفاجأه نزل عيونه وقال بإبتسامه؛مشكورة..
وخش وهو يقول:السلام عليكم..
منيه:وعليكم السلام..تفضل..واشرتلك ع الكرسي..
واريج قعدت تجهز في ادوات الكشف..
قعمز اسكندر وقال:شن الامور..
منيه:تمام الحمد لله...شافت للشاشه وقالت..خميس السايح..شبحتله وقالت..خير خوي شن هي المشكله اللي عندك..
هوقال:اول شي اسم الشهرة متاعي اسكندر ناديني اسكندر وفكينا من خميس..
اريج شدت ضحكتها..
ومنيه وهي تحاول تكون جاده زياده ابتسمت ابتسامه بسيطه وقالت..حاضر..شن مشكلتك خوي اسكندر..
اسكندر:والله شن بنقولك..عندي سوسه متعبه في جرتي العيله كلها كان ناضن عليا نولي طريح الفراش..
منيه بإبتسامه استغراب؛يالطيف..
هو بضحكه:والله زي مانحكيلك..تشوف في هيئتي واضح اني وين نخدم..اقسم بالله ع قد ماصار فيا مااثر فيا شي زيها..
منيه بإبتسامه؛باهي قداش ليك تعاني منها؟
حرك يده حركه دائريه وقال:ايااه..تلاته اربعه سنين..
منيه:ع هكي السن منتهيه..
هو قال؛الحق بدت تتفترش شويه شويه..قلعيها وفكيني منها..
اريج حطت يدها ع فمها وهي تضحك بكتمان..
منيه بإبتسامه؛خل نشوفوها قبل بعدين نقولك شن نديرولها..
هو قال؛تمام..
منيه اشرتله ع كرسي الكشف..
التفت وشاف لأريج اللي بلعت ضحكتها ولبست وجه الجديه..
هو غير عيونه عنها وكان مبتسم بخفه بعدين ناض ومشي للكرسي..
اريج وهي تأشر ع راسها قالتله:الطاقيه..
هو بإبتسامه حولها ومشي للكرسي اللي كان مقعمز عليه وحطها عليه وولى لكرسي الكشف..
اريج زادت ركزت فيه وحست روحها شايفاته قبل..
وبعد تفكير تفكرت..وحست بشي من الارتباك..
هو تمدد ع الكرسي وبدت منيه الفحص..
منيه:مش غير وحده بس عندك ثلاته وحده منهم باديه في جرس العقل..
وخرت منيه وهو قال؛قلعيهم كلهم..
ضحكت وقالت؛لا خل تاخد عليهم علاج يقتل السوسه ماعدا السن اللي قلت عليها معاش ينفع فيها الاالخلع..بس قبلها لما تمشي دير صورة..
هو قال:عندكم هني؟
منيه؛ايه اكيد..شبحت لاريج وقالت..تودلك عليها اريج ع المكان..
هو نزل من الكرسي وقال؛هي تقولي وين واني نمشي بروحي..
اريج بشي من الارتباك ؛اا..تطلع من هني تركب فوق ع اليمين تلقاها..
لاحظت منيه ان اريج مرتبكه شويه استغربت فيها..
هو بإبتسامه قال؛تمام..
ومشي خدي الطاقيه متاعه لبسها وطلع من حداهم..
بعد طلع منيه قالت؛خيرك اريج مش مطولين راهو..
اريج بتوتر؛تي لامشي هكي..هدا نعرفه..
منيه؛تعرفيه؟
اريج؛صاحب راجل خالتي ويعرف خالي جاي لحوش جدي اكثر من مرة..وجتني من وراه مشاكل..قالت كلامها الاخير بحزن..
منيه؛مشاكل شني!؟
اريج بإرتباك؛مش مشاكل بمعنى مشاكل..بس شن بنقولك..خلاص انسي مش حاجه مهمه..
منيه ابتسمت وقالت:ok..
وولت قعمزت ع كرسيها..
🍃وبرا..
خشت سيارة نضال للمركز ودرس وهو يراجي في اريج لأن موعد مرواحها قرب..
نزل مرش السيارة وشاف لسيارتها وملامح الضيق باديه ع وجهه..
🍃داخل...صور اسكندر وخدي الصورة ونزل بيها للدور الاول..
ومشي طول لحجرة منيه..
خش عليهم وقال؛السلام عليكم..
ردوا عليه السلام وهو مشي لمنيه طول مدلها الظرف متاع الصورة..وحط ايديه في جيوبه..
هي قعدت طلعت الصورة وقعدت تشوف فيها..
اريج كانت واقفه وهي تتجنب تشوفله..
اما هو كان يسرقلها في النظر..
منيه؛تمام..تفضل..اريج..
اريج مشت طول للخزانه اللي فيها الادوات وطلعت ادوات الخلع كلهم وهما مرتبات ترتيب صحيح..
حول اسكندر الطافيه وحطها ع الكرسي ومشي طول قعمز ع كرسي الكشف..
منيه جهزت نفسها حتى هي وقربتله وبدت تسمي في الادوات اللي تبيهم...
اولهم ابرة التخدير..
اسكندر؛دقيقة دقيقه هادي شني؟
منيه؛يبرة تخدير استاذ..
اسكندر:ضروري!؟
منيه بضحكه استغراب:اكيد مالاشنو تبيني نحولهالك من غير تخدير..
اسكندر:تي حولي حولي ومادوري شي زمان ظهري هادي انفتح فتحه ياجبارسكروها بموس مكوي بالنار.
غمضت اريج عيونها بوجع..
ومنيه وهي متأثره زيها قالت؛قصدك تحملت هدا كله وماتقدرش تتحمل اليبره..
اريج شدت ضحكتها..
اسكندر:شهاده الله مانتحملها ماعندي علاش نكذب..
مشت اريج طلعت من الحجره بش تضحك براحتها..
منيه وهي شاده ضحكتها قالت؛معليشي تحمل راهو الم الخلع مايقدر حد يتحمله..
هو قال:باهي لكن بالشويه دكتوره..
منيه بإبتسامه؛حاضر..حاضر..افتح فمك ترا..
وضربتله منيه يبرة التخدير بعدين خشت اريج..
وقعدت واقفه وهي مبتسمه...
منيه:تمام..الساعه قداش اريج؟
اريج:سته ونص..
منيه:تمام بنراجو شويه لين تتخدر بعدين نبدوا..
هو هز راسه بإيجاب..
ومشت منيه قعمزت..
وهو شاف لأريج وقالت؛معليشي ياابله..
شبحتلها منيه..
اريج بارتباك:تفضل..
هو قال؛متفكرتيني ولا؟
اريج؛مش بالزبط..
ابتسم وقال؛اني اسكندر صاحب عبد الرؤوف بن موسى قريبكم..
اريج هزت راسها وقال:اها ايه تفكرت توا..
اسكندر:شن حال العيله..الحاج لطفي والحاج علي وحسين..
اريج؛الحمد لله كويسين..
ابتسم وقال؛وصلي لعيال عبد الرؤوف ان بخير واموره تمام التمام..
اريج بلهفه:زرته؟
هو قال:اكيد..اليومين اللي فاتوا وراهو كنت بنجيكم غير مافضيتش بالك غدوة ان شاء الله يصير..
اريج هزت راسها وقالت؛ان شاء الله..
غير عيونه وشاف للسقف وهو يفكر فيها يبي يرجع يكلمها مرة تانيه بس شن بيقوللها!!؟
منيه:هاه خوي مازال ماحسيت بشي..
هو اشرلها ع خده وقال؛معاش حسيت بيه .
ناضت من مكانها وقالت لأريج تقربلها..
وبدت منيه في عمليه الخلع واريج تساعد فيها..
واسكندر يسرقلها في النظر ويشوف فيها كيف مارفعتش عيونها فيه نهائي..
اول مرة شافها فيها لفتت انتباهه..والمرة التانيه حس اتجاهها بإعجاب..وتوا حاس بإنجذاب...
كملت منيه عملية الخلع وهو بعقله مع اريج انتبه بعد كلماته منيه وعطاته تعليمات يمشي عليهم اليوم كله تجنبا للنزيف..
هوناض ومشي للطاقيه متاعه خداها ولبسها..
جاته اريج عطاته ورقه وقالت:عطيها للاستعلامات..
خدي منها الورقه وهز راسه..بعدين رفع يده وحياهم ومشي طلع..
منيه:هي بسرعه لمي الحوسه خل نطلعوا..
اريج بسرعه؛هيا هي..
وبدت اريج تخدم في خدمتها لين كملتها...
بعدين حولت القفازات والبالطو..وغسلت ايديها كويس وعمقتهم..ومشت للحجزه خدت شنطتها وقالت..
/نتلاقوا ع خير دكتورة..
منيه بإبتسامه؛كل سنه وانتي طيبه..
اريج بإبتسامه؛كل عام وانتي بخير..
ومشت بسرعه طلعت من المركز لسيارتها...
ركبتها وشغلتها وتحركت طول...
ونضال طلع وراها...
🍃🍃🍃🍃🍃
خش الصاله ع امه واخته وهو يقول..
عمر:ركبوا اثاث الشقه وكل شي تمام اركبي شوفيها..
خديجه هزت راسها وهي مضايفه..
اما مغليه بملامح وجه تعيسه قالت..
/ارفعني لخوك نشوفه..
تنهد وقال؛باهي يام نوضي وتي روحك..
ناضت مغليه بسرعه ومشت بتطلع وهي تقول..
/شويه بس..
بعد ماطلعت..
عمر سكر الباب وجي لخديجه وهو يقول..
/ انتي كيف راضيه وساكته ؟
خديجه رفعت حاجبها وقالت..
/شن تبيني ندير؟
عمر:اني اللي نعرفك كان حطيتي في راسك شي توصليله لكن واضح الموضوع جاي ع مزاجك..
خديجه؛عمر..ماتفشش غلك فيا..
هز راسه وهو يشوفلها بإمتعاض..
بعدين مشي فتح الباب وطلع..
هي تاففت بضجر وقعدت ساكته..
ع جية امها قالت؛عمر طلع؟
خديجه؛يراجي فيك برا..
مشت مغليه طول...
وهي تنهدت وقالت؛ان شاء الله خير وخلاص..بعدين مشت طلعت من الصاله ومنها من الحوش بكل متوجهه لشقة عمر اللي ولت لنجاة...
🍃🍃🍃🍃🍃
خشت اريج لسوق مشهور للمواد الغذائيه بش بتاخد الحاجات اللي وصتها عليهم امها..
خدت سله وقعدت تلم فيها..
وكل حاجه تاخدها لما تشوف صلاحيتها ومن وين جت..
اخر شي وقفت ع الجبنه اللي كان عليها زحمه..
شافاته..وتفاجئت هلبه وين شافاته..
كان واقف يراجي وهو مربع ايديه..
غيرت عيونها عنه وهي تقول في نفسها..
"حي عليا زعمه كلام نضال حق!؟ ايه والله شكله حق وهدا لاحقني لهني غبارتي"..
هو مل من الانتظار تأفف ووزع نظره ع المكان جو عيونه عليها..تفاجئ لما شافها وابتسم من قلبه ع الصدف اللي قاعده تجمع فيه بيها..
شافها خدت دورها وتقول..
اريج:2كيلو مودزريلا و2كيلو شيدر..
هو ابتسم وقدم واشر للراجل عليها وع الجبنه..
هي انفجعت لما لقاته جنبها تباعدت شويه..
الشاب اللي واقفه ع الجبنه بإستفهام..
/نعم ؟!..
هو حك حاجبه بعدين مد يده وفتحها للشاب وغمزله بعينه..
الشاب فهم عليه وقال وهو شاد ضحكته؛صم وبكم شكله..ضيق عيونه وهو يقرا بعدين قال بضحكه..سامحني خوي مافهمت شي..
هو بدت ع وجهه ملامح الامتعاض التفت لاريج وفتحلها يده..
قرتها وقالت:موزريلا واضحه..
شاف للشاب واشر عليها..
الشاب بضحكه ؛كم تبي؟
اشرله برقم 4..
هز راسه..
اشر ع اريج وحرك سبابته حركة دائريه..
الشاب بإبتسامه قال؛حاضر..
اما اريج تباعدت عنهم شويه..
هو ابتسم وقرب من الشاب وقال بشي من الصعوبه..
/زيدها كيلو واني نخلصك..
الشاب هز راسه وهو مبتسم..
واريج واقفه تستنى وتشوف للساعه..
"ياابله"..
مشتله طول مدلها الاكياس وهي خدتهم ومشت بسرعه..
وهو معاها بعيونه...
☘وصلت اريج للكاصه وحطت السله متاعها والاكياس..
والبنت اللي واقفه عليها قعدت طلع في البضاعه وتحط ع الآله..
واريج تراجي وتشوف للساعه..
بعد ماكلمت البنت قالتلها ع حساب..
طول اريج طلعت الفلوس وعدتهم..عطتها حق الحاجات ودست الباقي وخدت الاكياس..
ووين جت بتطلع تنصدم بنضال وراها...
كان يشوفلها بنظرة حاده خوفتها..
هي عقدت حواجبها وتجاهلت وجوده وتخطاته ومشت بسرعه طلعت...
🍃كانت متوترة ومضايقه هلبه..
وصلت لسيارتها ولما شافتها قالت...
/لااا..شن هدا عاد.!
لقت سيارة تاندرا مسكرة عليها وطول حطت في بالها ان هو دار قصدا عصبت منه ع الآخر..
ع جية هو وين شافها واقفه تراجي ضحك..
وصل فيها وقال بشي من الصعوبه؛اسف سامحيني درست طول..
قطعت عليه وهي تقول بإنفعال..
/قاعدتلحق فيا من تركينه لتركينه وتوا مسكر عليا بسيارتك شن تحسابني!؟.. عيب تصرفاتك هادي عيب ع خاطر صاحبك والرجاله اللي خشيت حوشهم..
هو انصدم ومعاش عرف شن يقول..
وهي كملت تقول..
/بعدين اني مراة متزوجه..
زادت صدمته وحس بإحراج شديد رفع يد ونزل عيونه وقال..
/اسف..سامحيني..اسف..
وخر كم خطوة بعدين لف ومشي لسيارته..
هي قعدت تراجي فيه يحول سيارته وكانت معصبه ومتوتره ع الآخر..غيرت عيونها عنه وقعدت تشوف حواليها ويجوا عيونها في عيون نضال..
اللي كان يشوفلها بنظره استنكار خلت اريج تحس بشعور مزعج للغايه فوق اللي قاعده تحس بيه حاليا..
سمعت صوت عجل سيارة اسكندر اللي حرقهم وهو ماشي بيها..
مشت طول لسيارتها وهي بتبكي بس شدت روحها بقوة..
حطت الحاجات في السيارة..
بعدين ركبت وتحركت وطول...
🍃وهي تسوق شافت من مراية السيارة نضال لاحقها بسيارته..
تنهدت بحرقه بعدين غيرت عيونها للطريق ودموع عيونها بدوا ينزلوا...
🍃🍃🍃🍃🍃
"تصدق يام حتى لما نسافر لادور ولاتسأل ولامعدله عليا بكل..عطيها حوش ماليها ديما تبي حوش ماليها وفي قولة بنمشي نشوف بوي مشغوله عليه واني شني اللي راجلها وليا حق عليها اكثر من بوها..ولاحاجه"
مغليه وهي متأثره ودموعها ينزلواا:الله لايسامحها..
هو ببكي:تصدقي حتى لما نمرض ببرده ولا نتعب من الخدمه مادورنيش بكل نقعد نعاند في روحي بروحي..نروح نبي نلقى غدي باهي نلقها مدايره حاجه نفاص وتاخد وتعجن لروحها في الحلويات وتاكل واني ندف وماشي..
مغليه وهي تبكي؛حسبي الله فيها..
مسح دموعه وقال:تعرفي امتى ولت هكي يام..بعد ماطلقت بنت عمها...
مغليه؛قصدك هديكا الحربا قعدت تعبيلها في راسها..
الجالي بإنفعال مصطنع:مليون في الميه..المخلوقه محسديه وفيها شر مش طبيعي وتكرهني بشكل يالاش اني وقفت ضدها يوم عركتها مع عمر هدا علاش قاعده تنتقم مني وعاد طوبى يام صغيره وع نياتها لعبتلها بدماغها..
مغليه؛وخربت ع روحها الغبيه هادي..
الجالي بتصنع القهر:اااه يام اااه علاش اني حظي هكي من الدنيا قوليلي علاش ديما ناقص من دون الناس..شن داير في عمري بش يصير فيا هدا علاش..
وحط ايديه ع وجهه وقعد يبكي..
هي خداته في حضنها وقالت ببكي..
/عوينه والله الا عوينه الله لاتربجهم ديما محسود وليدي ديما محسود حسبي الله ونعم الوكيل..
وهو يبكي وخلاص..
بعدين بعد عنها وقعد يمسح في دموعه وهو يقول..
/بالنسبه لبوي اني عارفه كويس وعارف طبعه هدا علاش مش واخد منه موقف..لكن محمد ولد المهدي هدا نبيه ينسى ان عنده عم اسمه الجالي..قاعد حاقد عليا من المشكله اللي صارت زمان ع خاطر امه وحصلها فيا فرصه حتى هو..
مغليه بغل:امه هادي مش عارفه شن بنقول عليها وهي بتموت قاعده تفتن وتولع والنار مش عارفه اني كيف بتقابل ربي ع عملها الاسود هدا..استغفر الله العظيم وخلاص..
هو رشف وقال:بينهم وبين ربهم..ع العموم يام اني طلاق مش مطلق.نبي مرتي ونبي نربي بنتي اني وياها وبعد تولي ان شاء الله تو نردلها عقلها ونعرف كيف نسقمها كويس..
مغليه طبطب ع رجله وقالت؛باهي سلم وليدي اللي تبيه نوض توضا وصل المغرب بش ترتاح..
هز راسه وناض وهو يقول؛حسبي الله ونعم الوكيل..
ومشي وهو يمسح في دموعه الزائفه وملامح المكر بدت ع وجهه...
وامه.مررت نظرها ع الفيلا وهي تقول بكره...
/خسارة فيها هالجربه بنت الجرب هادي..
🍃🍃🍃🍃🍃🍃
وروحت اريج للحوش وهي تحاول تتمالك نفسها قدام اهلها..
لعند ماخشت للحمام..
بكت فيه لين ارتاحت بعض الشيء..
بعدين توضت وطلعت بش تصلي وتشكي وتدعي..
🍃وفي جنان الحوش..
طوبى واميمه مقعمزات تحت شجرة الياسمين ويهدرزوا..
اميمه بصدمه:غبر فيه!..
طوبى وهي تحكي بتوتر:حالته بدت تزيد واني خايفه..
اميمه بقلق؛عندك حق تخافي..قعمزي في الحوش ومعاش تطلعي خلاص..
طوبى:قلت لخالي المحجوب..
اميمه:الله! شن قالك؟
طوبى:قالي ماتطلعيش الا للضرورة القصوى وكان جيتي بتطلعي عطيني علم..
اميمه؛باهي اللي قلتيله..
طوبى:ايه حتى اني ارتحت شويه لما حكيتله..ايه وقالي احرقي شفرتك..
اميمه؛احسن..حتى حساب الفيس سكريه الناس هادم توقعي منهم كل شي..
طوبى؛هادي اول حاجه درتها قبل لنكسر الشفره..
اميمه؛كويس بكل..عطيني بطاقة الشخصيه بش نديرلك غيرها غدوة ان شاء الله..
طوبى:تمام...
شدت اميمه يد طوبى وهي تقول:ماتخافيش كلنا معاك..
ابتسمت وقالت؛لولا ربي ثم انتم ماقعدتش واقفه ع رجليا لتوا..
حاوطتها وحطت راسها ع كتفها وهي تقول..
/ياقلبي..ربي يفرج عليك ويخلصك منه ويعوضك احلى عوض..
طوبى بإبتسامه وعيونها؛اجمعين...باهي احكي انتي..
بعدت اميمه وقالت؛شن نحكي؟
طوبى؛عليا اني!؟
تنهدت اميمه بحزن ونزلت عيونها وقالت بألم..
/قاعد ماطلعش من قلبي..
بدت ع وجه طوبى ملامح الحزن وهي تسمع فيها..
نزلوا دموع اميمه وهي تقول..
/قاعد فيا ياطوبى ماقدرتش نحوله مني..تعرفي بكري العشيه واني مروحه شفته جايب سيارة كبيره مطلع فيها اثاث الشقه..انقهرت..اول ايامي معاه فيها كانوا حلوات هلبه..برغم اني كنت خايفه من اهله بس كنت حاسه وقتها اني حنلقى عنده الامان ونقعدوا اني وياه في شقتنا في حوشنا الدافي ونعيشوا احلى عيشه..اتكيت ع الحب هلبه ونسيت ان في حاجات تانيه اهم منه هذا علاش خبت خيبه قويه..
طوبى بحزن:تعرفي زي ماحاسه بالذنب جهة اريج حاسه بالذنب جيهتك انتي حاسه اني السبب في اللي صارلكم..انتي لأنك واجهتيهم ع.خاطري كان مصيرك الفراق..واريج بسبب اللي صارلي.حتى هي مجبورة تفارق..
اميمه مسحت دموعها وقالت؛نهائي ياطوبى والله..اني ياطوبى مالقيتش الراجل اللي نحس معاه بالامان مالقيتش اللي نتحامى بيه لما يعاديني حد ولاننظلم..خسرت عيلي اللي هو عيله حتى هو ماخداش الموقف اللي حسسني فيه اني مهمه عنده...اني فارقت عمر لأنه مش هو الراجل اللي نقدر نكمل معاه حياتي...أما اريج...بصراحه صعب جدا بعد كل اللي صار مازال تقدر تستمر مع نضال بأي شكل..
طوبى تنهدت بحرقه وهي ساكته..
اميمه:في النهايه مقدر ومكتوب وماحد عارف بعدين الخيره وين...
طوبى هزت راسها وقالت؛صدقتي..
"انتم هني"
الزوز شافوا القدام وشهقوا بدهشه..
ناضت اميمه تجري وهي تضحك وضماته بشوق وهي تقول..
/حمد لله ع السلامه..
يوسف وهو حاضنها قال بضحكه:الله يسلمك ياقطوسه..
طوبى وهي تشوفلهم قعدت تتخيل في سدره جايه وراه..
تخيلتها وكأنها تشوف فيها قدام عيونها ودموعها.نزل..
هو شافها..بعد عن اميمه وهو شادها وقال..
/طوبى..
ابتسمت من بين دموعها وقالت؛حمد لله ع سلامتك..
هو قال؛الله يسلمك..اطمني خليت عنده من يرد باله منها اني اصلا حدي اسبوع ان شاء الله ومولي..
طوبى هزت راسها ودموعها ينزلوا زي السيل..
🍃وشويه واجتمعت العيله في حنان حوش لطفي وقعدوا يسمعوا في اخبار سدرة الصحيه من يوسف...
لطفي:يعني في تحسن ولاكيف؟
يوسف؛في امل كبير انها تفيق قبل لتسكر عام قريب ولابعيد مش معروف كله بأمر الله..حني ماعلينا الا الدعاء بس.
علي؛هدا مادايرين ياولدي هدا مادايرين...
ابتسم لطفي ابتسامه باهته وقال:
/وانت شن داير غادي؟
يوسف بإبتسامه؛الحمد لله رب العالمين الخدمه مش عاديه والشركه اللي نخدم فيها فيها عرب تعاونوا معاي هلبه في البدايه وبعدين اني والحمد لله قدرت نثبت نفسي..
صفيه وهي مبتسمه ودموعها في عيونها؛ربي يفتحها عليك من اوسع ابوابه..
وكلهم أمنوا ورا دعائها...
🍃🍃🍃🍃🍃
"اني معاش عندي شي لبعد رمضان الامتحانات"
المهدي:كويس حتى يزن قالي هكي..خلاص بإذن الله غدوة كلنا متسكدين لزليطن..
محمد بإستغراب:زليطن؟
المهدي؛ايه..كلمت عمتي كامله وقلتلها بنصيموا رمضان عندك..
محمد وهو متفاجئ؛جدي عنده علم؟
المهدي:مش مهم..
محمد؛مادام انت هكي تبي حاضر..
المهدي:باهي توا قولي..
بلع محمد ريقه وهو يشوف لبوه..
المهدي:من هي اللي شفتها مع عمك؟
محمد؛قلت امس ماعرفتهاش..
المهدي قعد يشوف لعيونه وهو ساكت..
ومحمد يشوفله وهو يتصنع في الثقه..
المهدي هز راسه وقال؛تمام..تمام..برا لدارك..
محمد هز راسه ومشي طول هربا من بوه..
لكنه خلا الشك يكبر في قلبه انه عارف هوية اللي كانت مع عمه ومايبيش يفصح عنها..
🍃🍃🍃🍃🍃
وفي منتصف هالليله الصيفيه..
كان لطفي مقعمز في جنان حوشه ويفكر بحنين...
رجعت بيه السنين لتالي...
لأيام كانوا فيها كلهم مع بعض...
ايام كان مختار في عمر 10سنوات...وفردوس 7سنوات..وسدرة 4سنوات..
كانوا موتيين ارواحهم بش بيمشوا للبحر..
🌿سدرة؛ماعرفتش نركب ركبوني معاكم..
نزل مختار وجاها ورفعها وهو يقول؛قعمزي وفكينا من دوشتك..
ضحكت فردوس..
وهو مشي ركب السياره من الجهة التانيه..
ع طلعة وردة وهي تقول؛عمي طلع يالطفي.توا شفت صفيه من الروشن الكوجينه وقالتلي طلع..
لطفي:هيا هي..
وركب السياره..وهي ركبت جنبه وسكرت الباب..
لطفي؛مانسيتوا شي..
مختار:لا مانسينا شي هيا اطلع بوي بسرعه..
ضحكوا لطفي وورده..
وشغل السياره وتحرك طول...
سدرة قعدت تصفق وتغني ووقتها كانت لدغه في الشين مبدتلها بحرف الثاء...
"بنمشوا البحر..بنمشوا البحر"
مختار قعد يغني وهو يقلد فيها..
سدرة بإنزعاج؛بوي قوله..
ضحك عليها..
لطفي:مختار خليها خلاث عاد..
قعدوا يضحكوا وورده قالت بضحكه..
/خثي عليك يالطفي..
ومختار وفردوس ميتين ضحك..
عقدت سدره حواجبها ونفخت.خدودها بغضب وشافت للروشن..
🍃ضحك وهو يتفكر في هداكا اليوم..
بعدين غير عيونه لجهة في الجنان.وجت ع باله ذكرى تانيه..
وقتها كان عمر مختار15 سنه..وسدره 10سنوات..
🌿سدرة؛اربطها زين ياولد مانبيش صحباتي يطيحوا..
مختار بضحكه؛عيشه طيح منها هكي ولاهكي سمينه هلبه هديكا..
سدرة بغضب؛الا عيشه معاش تتكلم عليها هكي..
ولطفي حداهم يصلح في السياره وهو يشوفلهم بإيتسامه..
شويه قال؛مختار ترا جيب مفتاح 14..
هو ارتبك وقال؛اما واحد؟
سدرة وهي دير في روحها تجرب في الدرجيحه قعدت تقول بصوت منخفض.
/الكبير اللي من غادي..
هو طول مشاله وخداه ومده لبوه..
خداه لطفي..
ومختار ولى للدرجيحه وقال؛كويس..
سدرة وهي تدرجح بيها قالت بضحكه..
/كويسه بكل..
جي وراها وقعد يدف بيها..
وهي تقول بضحكه؛جو..
وبوها يشوفلهم وهو يضحك...
🍃ضحك مرة تانيه بس نهاية هالضحكه كانت تنهيده حسرة قال بعدها..
"ياريتكم ماكبرتوا"
🍃🍃🍃🍃🍃🍃
تاني يوم..
16 مايو..سنة2018..
الساعه 11:01صباحا..
في مصور كلية الاقتصاد..
كانت اريج تاخد في شيتات محاضرات نضال الاخيره اللي ماحضرتهمش..
خدتهم بعدين طلعت من المصور ومشت طول لسيارتها..
وين وصلت غادي..
لقاته واقف ع السيارة يراجي فيها..
استجمعت شجاعتها وكملت طريقها للسياره..
وهو يلحق فيها بعيونه من ورا نظاراته السود..
مشت بتركب وهي تتجاهل بس وقفت لما سمعاته..
"هدا علاش تبي الطلاق"
قامت عيونها وشبحتله..
نضال بتهكم:ومستعجله بيه قبل ليتم رمضان طلقني..تطلقي من هني ويخطبك هو من هني والعرس بعد العيد مخططه لمستقبلك كويس..
اريج بصدمه:انت شن تخرف!؟
نضال هز راسه وهو مبتسم بسخريه قال:طلعت عبيط للمليون صايرلي زي ماصار لخالتك بالزبط..
اريج بغضب ودموعها عبوا عيونها..
؛سكر فمك ياوقح ياتافه..
قدملها وقال بإبتسامه مستفزة..
/كلام الحق وجاع ولا...لكن نقولك حاجه انتي ماتستاهليش حتى الهزوة انتي مستحقه للشفقه بس..بجديات تصخفي هلبه دوري ع تلقي معاه في مصلحتك بس..لما عرفتي ان ماليك حيوقفوا بيني وبينك ربطتي حبالك بسرعه مع غيري..
قبل كانوا عندك الفلوس..توا فلوس ونفوذ صحة ليك دماغه شغاله مش بتنام..
ومايحسش الا بيدها نازله وجهه بصفعه صوتها مسموع..
عض ع شفه السفلي وشبحلها بحده..
هي بغضب والبكي غلبها..
/تفي عليا نهار حبيت واحد زيك الله يلعن قلبي اللي مالقاش غيرك يحبه...طلعت انذل واحقر من خوتك بألف مرة..الله يلعنكم كلكم...وفتحت باب سيارتها بتركب وهي تبكي..
بعدين شبحتله وقالت بكره..
/رد بالك تنساه اليوم هدا..رد بالك يانضال..
وركبت وسكرت باب السياره بقوة..
بعدين شغلت سيارتها وطلعت بيها بسرعه وهو معاها بعيونه المعبيات دموع وألم وقهرة...
#روزناما
#طوبى
....يتبع....
