ما اعرف اذا مكتوب نصيبي معاك و لا مع غيرك ، بس تذكر الي يبا الصلاه ما تفوته !!
هذا كان مثال ميثه لسهيل ، فالبدايه خلوني اعرفكم على ميثه
(ميثه بنت جامعيه ، عمرها 20 سنه ، متقلبة المزاج) ،
( سهيل مرشح في كلية خليفه و عمره 24 سنه ، انسان بارد)
8:00 المسـا / جميرا
كانوا ميثه و سهيل على البحر و اصواتهم بدت تعلى مع اصوات البحر ؛
ميثه : سهيل خبرني ليش جي فيني !
سهيل : ميثه شو تبيني اقول ؟
ميثه : بشو قصرت وياك عشان تخليني و تروح لغيري
سهيل : ما اعرف ما اعرف ميثه دخيلج سكري الموضوع
تغيرت ملامح ميثه من الصدمه و تنرفزت و فضلت السكوت
عفرا : انا صدق صدعت من هايل الميانين !!
حمد : مب بس انتي هايل طولوا انا وراي دوام متى بنرد ابغي ارقد و اسبح و اتعشى !
عفرا : هيه والله شكلي بنزل لهم خلهم يكملون ضرابه فالسيارة
نزلت عفرا من السياره و على طول شلت نعالها ب ايدها و دخلت فالرملة البحر و توجهت صوبهم
عفرا : طيور الحب خلصتوا تفاهم ؟
صدت ميثه صوب عفرا و عيونها دموع استغربت عفرا !
ميثه بصوت مبحوح : عفرا تخلى عني يا عفرا . . و حطت راسها على صدر عفرا
استغرب سهيل من كلام ميثه !!!
عفرا : سهيل سير السياره دخيلك نبا نرد
سهيل : ان شاء الله
مسكت عفرا ايد ميثه و هم في دربهم للسياره ؛
عفرا : ميثه حبيبي خلاص ارتاحي و اسكتي عنه
ميثه : عفاري تخيلي جي بكل سهوله يسوي فيني جي !
وقف سهيل و ردد بكلمه : يا ميثه
عفرا : سهيل كمل دربك ، ميثوه ما عليه اصبري تحملي
ميثه حاطه ايدها على قلبها : تحملت وايد والله وايد
ركبوا السياره و تحركوا لمدينه العين ، فنص الدرب
حمد : ها سهيل شو الجدول باجر ؟
سهيل : والله ما ادري شو الترتيب بس دخيلك قبل لا تسير وعني بسير اخلص كم شغله
حمد : يا ريال خل عنك الاشغال لازم نتحرك الصبح الساعه ثمن
سهيل : انت وعني و امورك طيبه
ميثه تهمس بصوت خفيف : عفاري وين بيروحون ؟
عفرا : والله ما ادري ما اعرف
ميثه : اخاف يروح عندها
عفرا : تعوذي من ابليس
حمد : بشو يالسين تتهامسون ؟
عفرا : موضوع بنات . . و ضحكت
